Read lugbara 1 Suru Ma E'yo 29 Bible Online

1 Suru Ma E'yo 29 - lugbara bible

1 Suru Ma E'yo 29

¹Opi Daudi nga di ’yo ’ba dria yi okupi ’diyi ma tia kini, Sulemani ma mvi, Munguni pele a’duleri, eri nga kiri mvani azini rua be ’bele’beleru, te azi nderi ovu amboru tu; jo amboru opini ’diri ovuni ’ba dri ku, te Yehova Mungu dri,

²Ma ede mani ma okpo driasi, jo Mungu manini ma e’yosi mele afa meleru ’diyisi, dahabu afa dahaburu ’diyisi, mola afa molaru ’diyisi, aya afa ayaru ’diyisi, pati afa patiru ’diyisi; oni aje be amboru ’diyi, oni ’bani o’bale o’ba ’diyi pie, oni ’bani otile oti ’diyi pie, oni wura be ndu ndu ’diyi pie, oni ndu ndu aje nyapi tu ’diyi pie, oni okporu wura be ndrizaru ’diyi pie kakau.

³Drinisi, mani ma asi ’bale avaru jo Munguni ma driarisi, isu de ma ngulupi ovu lonyi mele pini dahabu beri be indi, ma fe di eri jo Mungu manini dri, afa dria mani edele ngonde jo alatararu ’diri ma e’yosi ’bo ’diyi ma dria dika.

⁴Mani feleri awa’di ’di: onzi meleni alifu na, mele nde Ofiriari, onzi dahabu alaruni alifu aziri ’bani ngale jo ma abi rua a’bule aniri,

⁵mele afa meleru ’diyisi, dahabu afa dahaburu ’diyisi, azini afa dria onduou azi ngapi ’diyini ngale edele yi ma drisiri ma e’yosi indio A’di le avasi i fezu ceni o’du ’disi Yehova drini ya?

⁶’Dini ’ba opiru atapi ma ori’ba dri cepi ’diyi pi, ’ba ’wara suru Israelini ma dri cepi ’diyi pie, ’ba ’ba alifu ma dri cepi ’diyi pie, ’ba ’ba turu dri cepi ’diyi pie, ’ba azi opini ma drilia ’diyi pie dria fe afa feza ceni avasi.

⁷Yi fe azi jo Yehovanirinisi mile onzi alifu towi, silingi alifu mudri, dahabu onzi alifu mudri, mola onzi alifu mudri drini aro, aya onzi alifu turu alu.

⁸’Ba oni aje nyapi tu ’diyi isuzu yi be ’diyi yi fe oni nde ’diyi lonyi jo Yehovanirini dri, geri Yehieli ’ba Gerisomuni Vurisi.

⁹’Dini ’ba nde yi ovu di ayikosi yini afa ofele avasi cenirisi, a’disiku yini afa feza avasi fele asi adarusi Yehova dri cenirisi; opi Daudi ovu vini ani ayikosi amboru.

¹⁰E’yo ’disi Daudi inzi ru Yehovani awa’difosi ’ba dria yi okupi ’diyi ma milia; Daudi kini: Asi ndriza mi vu ’dani ’dani, Yehova la, Mungu ama a’bi Israeliniri.

¹¹Yehova la, ambo pi, okpo pie, diza pie, agaza pie, azini inzita diza beri pie, yi dria mini; afa dria ovupi ’bua azini nyakua ’diyini ovule minirisi; opi nyaza ovu mini, Yehova la, azini mi ovu ’bazaru uru afa dria ma drilia aga dria.

¹²Lonyi pi inzita be iri tro yi enga mi vu, azini mi ovu ’ba dria ma opiru mi’i. Okpo pi okpo amboru be ovu mi dria; azini mi dri eco ’ba ’bazaru arriboru azini okpo fezu ’ba dria dri.

¹³Te curu’do Mungu amaniri, ama fe awa’difo mi dri, ama inzu ru mini dizaruri ra.

¹⁴Te ma a’di’i, azini ’ba mani yi ’ba ngoniru, ’dini amani ecozu afa feza fezu avasi ceni ’dinile ya? Afa driani engale mi vorisi, ama omvi di afa mini mi dri ’bo.

¹⁵Amani ovule ani’baru mi milia, azini ’ba emuzani ekile ama a’bipi driani ovulerile; o’du amani ovuzu nyakua ’diyi ovu ekile endrilendrile, azini ama adrini ’dani ’dani ku.

¹⁶Yehova Mungu amani la, afa dria ta mbale ’diyi, amani edele jo sizu mi dri ru mini alatararuni ovuzu alenia ci ’diyi enga mi dria, te afa dria yi nuru.

¹⁷Ma ni vini alu indi, Mungu mani, kini mi ’ba ma asi o’bi ra, azini mi ovu ayikosi e’yo kililirurisi; te ma’i, asi kililiru manirisi ma fe te afa feza ’diyi dria avasi ceni, te curu’do ma ndre ayikosi ’ba mini ’doa indi afa feza fezu mi dri avasi ceni.

¹⁸Yehova la, Mungu ama a’bipi Iburahimu pini, Isaka pie, Israeli beri la, mi ma ’ba e’yo ’dirini ovuzu ’dani egata ’ba minini egale yi ma asiari ma alia, mi ede asi yini mi vu fo!

¹⁹Mi fe vini asi kililiruri ma mvi Sulemani dri, azita mini ’diyi ma ta mbazu, e’yo eti nzeza mini pie, azita mini sile ’diyi pie, afa ’diyi dria ’yezu, jo amboru opiniri sizu indi, mani eri ma afa edele ngonde ’bori’i.

²⁰Daudi nga di ’yo ’ba dria yi okupi ’diyi ma tia kini, Emi inzi di Yehova Mungu emini ma ru awa’difosi. ’Dini ’ba dria yi okupi ’diyi inzi Yehova Mungu yi ma a’bipiniri ma ru awa’difosi ra, yi elu yi ma dri va Yehovani inzizu azini opini inzizu indi.

²¹Azini yi ede edeta Yehova dri, azini fe edeta vezaru Yehova dri drusi ’dini, o’du nde ’dari ma vutia, ada monio alifu alu, kabiloago alifu alu, kabiloanzi alifu alu, afa mvuza yini edetaru ’diyi pie, edeta be kakau ’ba Israelini dria ma e’yosi;

²²te yi mvu, yi nya Yehova ma milia o’du ’dasi ayiko amboru be. Yi nga di Sulemani opi Daudi mvi ’ba opiru pale iririsi, yi osu odu drinia eri ’bazu ovuzu opiru Yehova dri, osu vini odu Zadoki ma dria ovuzu atalau edeta edepiriru indi.

²³’Dini Sulemani nga di ri oguna Yehovaniri ma dria opiru ati Daudi ma paria; eri ’ye drilebasi, ’ba Israelini dria inzi eri ma e’yo ra.

²⁴Azini ’ba ’wara dria, ’ba okporu ’diyi pie, anzi dria Daudi vile ’diyi pie fe yi ceni alu indi opi Sulemani dri.

²⁵Yehova nga di Sulemani ’ba inzitaru tu ’ba dria Israelini ’diyi ma milia, fe eri dri inzita opini diza beri, drio erini nga fele opi azini dri sraeli ma eselia kuri,

²⁶Te Daudi Yese mvi nya angu opiru ’ba Israelini ma rilia dria.

²⁷Ewu ndra erini ’drizu opiru ’ba Israelini ma driliari ovu eli kali su; eri nya opi Hebironia eli aziri, azini eri nya opi Yerusalemua eli kali na drini na,

²⁸Eri dra de eri ovu mbazauru eli be kakau lonyi erini pi inzita be amboru tu. I mva erini nga di opi nya eri ma pariani,

²⁹Te ’yeta opi Daudini, oke ’diyi pi vile ’diyi be, mi lu, yi ovu sizaru buku Samueli ’ba e’yo ndreza ndrepirini sileri pi ma alia, buku nabi Natanini sileri pie, buku Gadi ’ba e’yo ndreza ndrepirini sileri pie;

³⁰si vini opi nyaza erini pi ma e’yo, okpo erini dria pie, ewu agapi eri ma driasi, azini ’ba Israelini ma driasi, azini opi nyaza juruni ma driasi ’diyi pie dria.