Read lugbara 2 Suru Ma E'yo 16 Bible Online

2 Suru Ma E'yo 16 - lugbara bible

2 Suru Ma E'yo 16

¹Eli Asani opi nyazu kali na drini aziarisi, Baasa opi Israelini tu a’di ’dizu Yuda be, eri si Ramaa, eri ma oga ani geri ’ba fupi Asa opi Yudani vusi ’diyi pi dri ’ba fipi eri vu ’diyi be dria.

²Vilerisi Asa o’du dahabu pi mele be lonyi jo Yehovani vileri ma eselia opi vile joari be, pe ’ba ti jizu Beni-hadadi opi Suriani ovupi Damasikiari vu, kini,

³Aziza ovu ama eselia mi be, ekile ndra erini ovule mi ati pi ma eselia ma ati berile. Mi ndre, ma pe dahabu pi ma ti mele be mi vu ’di; mi mi mu di aziza emini emi eselia Baasa opi Israelini beri anzu, ’dini eri ma nga ma vusi ani beni.

⁴Te Beni-hadadi eri e’yo opi Asaniri ra, eri pe asikari ovupi asikari erini ma drilia ’diyi a’di ’dizu aku Israelini ’diyi be; yi eza Iyoni pi, Dani pie, Abeli-maimu pie, aku dria afa ta mbazu Nafutalini ’diyi pie dria.

⁵Eri eca ’dini, Baasani e’yo nderi eriria, eri ku Ramani sikokoru ja, ku azi ini ra,

⁶Vilerisi opi Asa o’du ’ba Yudani ’diyi dria, yi o’du oni azini pati Baasani Ramani sizu ’diyi, ji ra, si ani Geba pi Mizipa be.

⁷Te o’du ’dasi Hanani ’ba e’yo ndreza ndrepiri emu Asa opi Yudaari vu, ’yo eri ma tia kini, Mini mi atile opi Suriaari ma ruaarisi, azini mini mi atile Yehova Mungu mini ma ruaa kurisi, e’yo ’disi asikari ongulumuru opi Suriaarini ’diyi apa mi driarisi ’bo.

⁸’Ba Etiopiaa ’diyi pi ’ba Lubi ’diyi be, yi ndra ongulumuru amboru ku ya? Gari yini ’ba nzupi akanya dria ’diyi be, kalafe yini agani drile ku ya? Te ti, mini mi atile Yehova ma ruaarisi, eri fe ndra yi mi dria ra.

⁹A’disiku Yehova ma mile onzu ’dile azini ’dole angu wudrikuru dria ma alesi, eri ma e’da i okporu ’ba asi be kililiru i vu ’diyi ma aza kozu beni. ’Disini mi ’ye mini ondua kokoru; e’yo ’disi engazu curu’do mi nga di ovu a’di ’diza be ’dani.

¹⁰Vutinia Asa ovu di adrasi ’ba e’yo ndreza ndrepiri be, ’ba ani eri arujoa, aokoni eri nyale kai eri ma ruaa e’yo ’dirisirisi. Asa inza vini ’ba nde ’diyi ma azi ewu ndesi indi.

¹¹Azini mi ndre, ’yeta Asani ’yele, oko azini vile ’diyi, mi lu, yi ovu sizaru buku opi Yudani azini Israelini ’diyini ma alia.

¹²Te eli kali na drini oromi Asani opi nyazurisi, azo bi eri paa, azo erini ndra ovu okporu tu; te azo erini ma alia eri ndani ani Yehovani ku, te lu ’ba ojouru ’diyi.

¹³Te Asa la i a’bipi be, dra de eli erini opi nyazuri ca di kali su drini alu ’bo.

¹⁴Yi sa eri nyadri eri ma ngulupiniri ma alia, erini gale i ma ngulupini aku Daudini ma aliari. ’Ba eri ma avu pari dria, gapi tre ajinguru aji ngupi arikarirurisi azini obiese esele ndu ndu ’ba onduouru aro edepi ’diyini osalerisiri; yi eve afa veza karakarau eri dri.