Read lugbara 2 Suru Ma E'yo 17 Bible Online

2 Suru Ma E'yo 17 - lugbara bible

2 Suru Ma E'yo 17

¹Te Yehosafati eri ma mvi nya opi eri ma pariani, eri ’ba i okporu omba ’bazu Israeli be.

²Eri o’ba asikari aku ambo ambo dria abi kaliru be Yudaa ’diyi ma alia ci, o’ba asikari angu agei tepi ’diyi angu Yudani pi ma alia aku ambo ambo Efiraimuni ’diyi be, ndra eri ma ati Asani opale ’diyi.

³Te Yehova ovu ndra Yehosafati be, erini acile geri oko i a’bi Daudini ’diyi ma aliarisi; eri ndruni adrou Baaliru ’diyi ku,

⁴te eri nda Mungu eri a’bipiniri’i, acizu azita erini ’diyi ma alia, te ’yeni ekile Israelini ’yele ku.

⁵E’yo ’disi Yehova fe suru nyazani pa sozu okporu eri ma dria; te Yuda dria eji afa feza Yehosafati dri; eri ovu ndra lonyi be ekpete, inzita be tu.

⁶Eri enga i asi uru acizu geri Yehovani ma alia; azini vini onze pari uruleru ’diyi pi Yudaasi wura Aseriru ’diyi be ra.

⁷Te eli erini opi nyazuri ka ca na, ope ’ba ’wara erini opiru ’diyi ma ti, ada yi Beni-haili pi, Obadia pie, Zekaria pie, Netaneli pie, Mikaya pie, ’ba imbazu aku ambo ambo Yudaa ’diyi ma alia;

⁸azini tualu yi be ’ba Levini ’diyi Semaya pi, Netania pie, Zebadia pie, Asaheli pie, Semiramoti pie, Yehonatani pie, Adoniya pie, Tobiya pie, Tobadoniya pie, yi ’ba Levini; azini yi be indi Elisama pi, Yehoramu be, ’ba edeta edepi ’diyi.

⁹Yi imba ’ba Yudaa, de buku azita Yehovanirini yi ma dria ci; yi aci aku dria Yudaa ’diyi ma alesi dria, ’ba imbazu ’ba nde ma eselia.

¹⁰Uri Yehovani ’de suru nyaza angu Yudani ma ageia ’diyi ma dria dria, ka’dini yi ’bani ani omba Yehosafati be ku.

¹¹’Ba Filisitiaa ’diyi ma azi eji afa feza Yehosafati dri, dahabu be musororu; ’ba Arabua ’diyi indi eji eri dri anyapa nyiri ’diyi ’o’biru, eji kabiloago alifu aziri drini turu aziri, ndriago alifu aziri drini turu aziri indi.

¹²Yehosafati idri i ovuzu amboru tu. Eri si jo okporu Yuda ma alia kakau, aku ambo ambo afa ta mbazu ’diyi be,

¹³eri ovu azi be kakau aku ambo ambo Yudaa ’diyi ma alia. Eri ovu asikari ombani, ’ba okporu asi teza be ’diyi be Yerusalemua indi.

¹⁴Yi ma kalafe ekile yi ma a’bipi ma ori’ba vusi ndra ’dini: Yuda eselia ’ba asikari alifu alu dri cepi ’diyiru: Adina ’ba asikari dri cepiri pi, ’ba okporu asi teza be ’diyi be alifu turu na;

¹⁵’ba eri vutiari Yehohanani ’ba asikari dri cepiri pi, ’ba eri be ’diyi pie alifu turu iri drini kali aro;

¹⁶vutiniari Amazia Zikiri mvi, eri i ngulupi fepi Yehova dri asisi ceniri’i, eri be ’ba vini alifu turu iri, ’ba okporu asi teza ’be ’diyi.

¹⁷Azini Benyamini ma eselia: Eliada ’ba okporu asi teza beri, ’ba eri be alifu turu in osu ’dupi gombere be ’diyi;

¹⁸eri ma vutia Yehozabadi’i, ’ba eri be yi ’ba alifu turu alu drini kali aro yi edepi ngonde omba tezu ’diyi.

¹⁹’Ba ’diyi dria ndra ’ba azi ngapi opi ma ageia ogogo ’diyi, te drinia ’ba azini indi lale ku opini o’bale aku abi kaliru be ’diyi ma alia Yuda dria ma eselesi ’diyi.