Read lugbara 2 Suru Ma E'yo 18 Bible Online

2 Suru Ma E'yo 18 - lugbara bible

2 Suru Ma E'yo 18

¹Te Yehosafati ovu lonyi be ekpete, ru inziza be tu; eri eci i agyiru Ahabu be.

²Te eli azini ma vuria, mu Ahabu vu Samariaa. Ahabu oli kabilo piyi ti pie, eri dri karakarau, ’ba ovupi eri be ’diyi dri indi, nga eri omi muzu uru Ramotigileadia i be.

³Ahabu opi Israelini nga e’yo ’yo Yehosafati opi Yudani ma tia kini, Mi le mu ma be Ramotigileadia ra ya? Nga omvi tinia kini, Ma ovu ekile mile, ’ba mani ovu ekile ’ba minile; ama nga ovu mi be tualu omba ’di ma alia ra.

⁴Te Yehosafati ’yo opi Israeliniri ma tia kini, Ma zi mi tia, mi ndru andru e’yo Yehovani raka.

⁵’Di ma vutia opi Israelini oku nabi yi tualu, ’ba turu su, eri ’yo yi tia, Onyiru ama ma mu a’di ’dizu Ramoti-gileadi be, kani ma ma mu ku ya? Te yi ’yo, Mi mu; a’disiku Munguni nga eri fe opi ma dria ra.

⁶Te Yehosafati ’yo ra kini, Nabi azini Yehovaniri indi yo ya, ’dini ama ma zi e’yo tinia ya?

⁷Opi Israelini ’yo Yehosafati ma tia, Ace ’ba alu amani ecole e’yo zile Yehova tia geri eri vurisiri ra, te ma ngu eri onzi, a’disiku eri adrini e’yo mani olu onyiru aluni ku, te lu etuzu e’yo onzi’i; agu nde eri Mikaya mila mvi’i. Yehosafati ’yo, Opi ma ’yo e’yo ’dini ku fo!

⁸Opi Israelini nga di asikari ambo omve, nga ’yo tinia kini, Mi eji Mikaya mila mvini mbele.

⁹Te opi Israelini pi Yehosafati opi Yudaniri be, bongo suza opiniri be yi ma ruaa, yi ri alu alu oguna opini dria irii pari ’bani fizu kalitile Samarianiria; te nabi dria ovu e’yo te ngapi ecapiri oluzu yi ma drilia.

¹⁰Zedekia Kenaana mvi ede ini o’yu ayaru, eri ’yo ra, Yehova ’yo ’dini, O’yu ’diyisi mi nga ’ba Suriaa ’diyi omi vile cazu yini dri jaria.

¹¹Te nabi dria yi ondri e’yo ’dinile, yi ’yo, Mi tu Ramoti-gileadia, mi nga ovu drilebaru; te Yehovani nga eri fe opi ma dria.

¹²Ojio mupi Mikayani omvepiri ’yo ’dini eri tia,kini,Mi ndre, curu’do nabi yi e’yo ’yo opi ma tia dria onyiru ti alusi; e’yo ’ disi, ma zi mi tia, onyiru e’yo mini ma ovu ekile e’yo yini ’yoleri ma azile, mi ’yo e’yo onyiru.

¹³Te Mikaya ’yo, Ekile Yehovani ovule idrirurile, e’yo Mungu manirini ’yoleri, ma nga e’yo nderi ’yo’i.

¹⁴Te eri ka eca opi vu ’bo, opi ’yo tinia, Mikaya La, onyiru ama ma mu Ramoti-gileadia a’di ’dizu, kani ma ma mu ku ya? Te eri ’yo ra, Emi mu, emi nga ’ye drilebaru; yi nga ovu fezaru emi dria.

¹⁵Te opi ’yo eri tia, Ma nga e’yo azi mi tia okposi pale si ya, e’yo azini ’yozu ma tia ku pe kiri mi ma ’yo e’yo adari ru Yehovanisi’i ya?

¹⁶Te eri ’yo, Ma ne Israeli dria erezaru oni dria ekile kabilo ’ba yi ocepiri kokoru ’diyile; te Yehova ’yo, ’Ba ’diyi ovu opi kokoru; onyiru yi dria alu alu ma mvi asi anzu be jo yinia.

¹⁷Opi Israelini ’yo Yehosafati ma tia, Ma ’yoni te mi tia ku, eri ngani e’yo mani olu onyiru ku, kiri onziri’i ku ya?

¹⁸Te Mikaya ’yo, E’yo ’disi mi ma eri e’yo Yehovani: Ma ndre Yehovani riria oguna opini eriniri ma dria, ongulumu ’bua ’diyini pa soria eri ma dri ndiria azini eri ma dri ejia;

¹⁹te Yehova ’yo, A’dini nga Ahabu opi Israeliniri obeni, erini tuzu e’dezu Ramoti-gileadia ani ya? Te aluri ’yo ’doni, aziniri ’yo ’dini.

²⁰Te orindi alu efu pa sozu Yehova ma drilia, ’yozu, Ma nga eri obe ma’i. Yehova ’yo tinia, E’yo ngosi ya?

²¹Te eri ’yo kini, Ma nga fu ovu orindi inzoru nabi erini ’diyi ma tilia dria. Te eri ’yo ra, Mi nga eri obe, mi nga eri aga indi; mi fu, mi ’ye ’dini.

²²’Dini curu’do mi ne, Yehova ’ba orindi inzoru nabi mini ’diyi ma tilia dria; Yehova ’yo e’yo mini onzi ’bo.

²³’Di ma vutia Zedekia Kenaana mvi si ogogo, sa Mikayani o’boloa, eri kini, Orindi Yehovani nga ma vusi geri ngorisi ’yozu mi tia ya?

²⁴Te Mikaya omvi e’yo kini, Mi ne, mi nga e’yo nderi ndre o’du mini ngazu fizu jo alealeruria mini mi zizurisi.

²⁵Te opi Israelini ’yo, Emi bi Mikayani, emi omvi eri vile Amoni ambo aku amboru ma dri cepiri pi vu, opi mvi Yoasi be;

²⁶emi ’yo, Opi ’yo ’dini, Emi ’ba agu ’dori jo arunia, emi fe eri dri enya candiniri, yi mvuza candiniri be kiri’i, cazu kpere etu mani emuzu asi anzu beria.

²⁷Te Mikaya ’yo, Mi ka nga emvi asi anzu be ra, de di ’do Yehova ’yoni e’yo ma tisini ku. Eri ’yo indi, Emi eri, emi suruti dria!

²⁸’Dini opi Israelini pi Yehosafati opi Yudaniri be tu di Ramoti-gileadia ra.

²⁹Opi Israelini ’yo Yehosafati ma tia kini, Ma nga bongo toko su ’ba kazu ma nizu ku, ma nga mu fi ombaa, te mi ma su bongo mi vile opiniri. Opi Israelini su di bongo toko ’ba kazu i nizu ku, yi mu di ombaa ra.

³⁰Te opi Suriaari fe azita ambo asikari gari vile ’diyi ma drilia ’diyi dri, kini, Emi ’di a’di ’ba toko ’diyi be ku, ’ba ambo ’diyi be ku, kiri opi Israeliniri be a’dule.

³¹Eri nga eca ’dini, ambo asikari gari vile ’diyi drilia ’diyi ka Yehosafatini ne ’bo, yi ’yo, ’Di opi Israeliniri’i. ’Dini yi oja yi kalaasi a’di ’dizu eri be; te Yehosafati ga lulu, azini Yehova ko eri ma aza ra. Mungu ’ba e’yo yi ma asia eri kuzu.

³²Eri nga eca ’dini, ambo asikari gari vile ’diyi ma drilia ’diyi ka ne eri opi Israelini yo, yi oja yi vile, ku di eri drozu ja.

³³Te agu alu nzo osu ini, eri gbi ’ye saaru, gbi opi Israelini pari gombere ayaru ombaniri ma tini ecizuria; e’yo ’disi eri ’yo asikari gari erini ma ti dropiri ma tia, Mi oja mi kalaa, mi ofu ma a’diasi amve, a’disiku gbi ma mgbi ra.

³⁴A’di nderi eca o’du nderisi okporu tu, te ti, opi Israelini ati i gari erini ma alia i mile ’bazu ’ba Suriaa ’diyi vuleru kpere ondresi; te etuni ’yeria ’deria, dra ra.