Read lugbara 2 Suru Ma E'yo 19 Bible Online

2 Suru Ma E'yo 19 - lugbara bible

2 Suru Ma E'yo 19

¹Yehosafati opi Yudani atri dri i vile joa asi anzuru be Yerusalemua.

²Te Yehu Hanani mvi ’ba e’yo ndreza ndrepiri fu dri fuzu eri be, ’yo opi Yehosafati ma tia, Mini ’ba onzi ’diyi ma aza kozu, mini ’ba Yehovani ngupi onzi ’diyi lezu, eri onyiru ya? E’yo ’dirisi adra engapi Yehova ma miliari ovu mi dria ani.

³Te ti, afa azini onyiru ’diyi e’da yi mi alia ra, mini wura Aserotiru ’diyi onzele angu ma aliarisi ra, azini mini mi asi embale Munguni ndazurisi.

⁴Yehosafati ovu di Yerusalemua; eri fu mu acizu ’ba ma eselia dika engazu Beeri-sebaa cazu angu oni be Efiraimuniria, yi omvizu dika Yehova Mungu yi ma a’bipiniri vu.

⁵Eri o’ba ’ba e’yo lipi ’diyi aku dria abi kaliru be angu Yudania ’diyi ma alia dria, aku vusi aku vusi,

⁶’yo ’ba e’yo lipi ’diyi ma tia kini, Emi ma ega e’yo emini ’yeleri e’yere fo, a’disiku emi lini e’yo ’ba dri ku, te Yehova dri; eri ovu emi be indi emini e’yo liria.

⁷Ka’dini curu’do uri Yehovaniri ma ovu emi dria; emi ’ba lasi e’yo ’diri ma ta mbazu, emi ’ye, a’disiku e’yo onzi Yehova Mungu amaniri vu yo, openi ’ba ku, eri a’ini afa feza ’ba ti razuri ku.

⁸Yehosafati o’ba vini Yerusalemua ’ba Levini piyi ma azi, ’ba edeta edepi ’diyi be, ’ba ’wara Israelini yi ma a’bipi ma ori’ba dri cepi ’diyi pie, e’yo liza Yehovaniri pi ma e’yosi agata gaza be. Te yi nga di emvi Yerusalemua.

⁹Eri azi e’yo yi tia ’dini kini: Emi ma ’ye ’dini uri Yehovanisi, a’ita adaru be, azini asi kililirusi;

¹⁰yi ka e’yo agataru eji emi vu engazu emi adripi aku yini ma eselia ’diyi vu, ari ofuza pi ma esele cozu ari ofuza aziniri be, azita pi ma esele cozu e’yo azile azini ’diyi be, aziza pi e’yo liza be, emi ma tre yi dria yi imbazu, e’yo onzi kazu yi ndezu Yehova ma milia ku, azini adra kazu emuzu emi ruaa emi adripi be ku indio Emi ma ’ye ’dini e’yo onzi kazu emi ndezu e’yo liza ma alia ku.

¹¹Te emi ndre, Amaria atalau edeta edepi ambori ovu emi drilia le’Yo dria Yehovani ’diyisi; azini zebadia Isimaeli mvi, ambo ori’ba Yudani ma dri cepiri ovu emi drilia e’yo opinisi dria; ’ba Levini indi nga ovu ’ba emi dri cepi ’diyiru. Emi ma ’ye asi tezasi, te Yehova ma ovu ’ba e’yo kililiru ’yepi ’diyi be!