Read lugbara 2 Suru Ma E'yo 2 Bible Online

2 Suru Ma E'yo 2 - lugbara bible

2 Suru Ma E'yo 2

¹Te Sulemani nga e’yo ede i asia jo sizu Yehova ma rusi, azini jo sizu i dri opi nyaza ini ma e’yosi.

²Sulemani nga ani ’ba ola alifu kali aziri teri ojizu, ’ba azini alifu kali aro oni onzezu oni ruaa, ope ’ba azini alifu na drini turu azia ovuzu yi ma drilia azi ndrezu.

³Sulemani nga di ojio ti pe Huramu opi Turoari vu, ’yozu tinia kini, Ekile andra mini ’yele ma ati Daudi dri, mini ndra mario pati ma ti pezu jo ndra erini ovuzu aleniari sizurile, mi ’ye ma be ’dini indi.

⁴Mi ndre, ma le curu’do jo sizu Yehova Mungu mani ma rusi, jo nde fezu eri dri, obiese osale afa arikariru ’diyisiri evezu eri ma drilia, mikate ecetaru o’du vusiri pisi, edeta vezaru o’bitisi ’diyi pie, ondresi ’diyi pie, sabatosi ’diyi pie, mba o’dirusi ’diyi pie, okuza o’du opele omuru Yehova Mungu amanini ’diyisi ’diyi pie dria. E’yo ’diri e’yo azitaru ’dani ’daniri Israeli dri.

⁵Jo mani ngale sileri eri amboru, a’disiku Mungu amani eri amboru Mungu dria ma drilia.

⁶Te a’dini nga eco jo sizu eri drini ya, ’bu pi, ’bu ’buniri be yini dri fule erini ovuzu alenia kurisi? a’di’i, ngazu jo sizu eri dri, pe lu ngazu obiese vezu eri drilia’i ya?

⁷Awa’dini, mi epe mani ’ba onduouru mele pi ma azi nipi ra, dahabu pie, mola pie, aya pieri, nipi bongo okalakokalari pi sopi ekandrindriri pie, blururi pie, azini ovupi onduaru afa oliza ndu ndu olizuri, agu nde nga ovu onduou azini ovupi ma be Yudaa azini Yerusalemua ekile ma ati Daudini ndra edelerile ’diyi be tualu.

⁸Mi epe mani mario pati pi ma ti indi, masa pie, sandali pati pie, engazu Lebanonia; te ma ni ra ati’ba mini ni pati gazu Lebanonia tu. Azini mi ne, ati’ba mani yi nga ovu ati’ba mini ’diyi be tualu,

⁹ngazu pati joni ’diyi edezu ma dri karakarau, a’disiku jo mani ’yele sileri nga ovu amboru osutaru.

¹⁰Mi ne, ma nga ati’ba mini pati gapi ’diyi dri nganu efifiru fe o’biza alifu kali iri, onduni o’biza alifu kali iri, patiefi ma suni obi alifu kali iri, azini oduni indi obi alifu kali iri.

¹¹Huramu opi Turoari nga di e’yo omvi waraga erini tini pele Sulemani vurisi kini, A’disiku Yeho’ani ’ba erini ’diyi lele turisi, ’ba ani mi ovuzu opiru yi ma driliani.

¹²Huramu nga vini ’yo ’dinile indi kini, Yehova Mungu Israelini ’bu pi ’bapi nyaku beri ma ovu inzizaru erini opi Daudi dri mva onduaru e’yo amapi, ’ba e’yo vapi onduasi, ngapi jo sipi Yehova dri, azini opi nyaza erini dri indiri felerisi.

¹³Curu’do ma pe agu onduouru ovupi e’yo vaza be, ndra ovupi ma ati Huramu be okokari ma ti ’do.

¹⁴Eri oku Dani ezoruri ma mva, atini ndra ’ba Turoari. Eri onduouru azi ngazu mele pi edezu, dahabu pie, aya pie, oni pie, pati pie, bongo okalakokalaruri pie, blururi pie, bongo mile be nyiriri pie, ekandrindriruri pie driari, ni afa oliza ndu ndu olizuri ra, azini egata dria egazu onduasi indi; mi ma pe pari eri dri ’ba mini onduouru ’diyi be, ’ba onduouru opi mani Daudi mi atini ’diyi be indi.

¹⁵Ka’dini curu’do nganu pi, ondu pie, odu pie, patiefi ma su pie, opi manirini e’yoni ’yole ’bori, eri ma pe di afa ’diyi ma ti ati’ba erini vu;

¹⁶te ama nga pati ga engazu Lebanonia fudri ci ekile mini ngale lele ngopirile ’dipi; ama nga yi oli mi dri ombezaru tualu geri miri driarisi cazu Yopaa; mi nga di yi oji uru Yerusalemua ndo.

¹⁷Sulemani nga di ani’ba ovupi ndra angu Israelini ma alia ’diyi ma kalafe la dria, ndra Daudi eri ma atini yi laleri ma vutia; ’ba isu yi ovu alifu turu alu drini kali towi, drinisi alifu na drini turu azia.

¹⁸Yi ma eselia eri nga ’ba alifu kali aziri ’ba teri ojizu, azini ’ba alifu kali aro oni onzezu oni ruaa, te alifu na drini turu azia ’ba ma drilia azi ndrezu, ngazu azi awazu ’ba nde dri.