Read lugbara 2 Suru Ma E'yo 21 Bible Online

2 Suru Ma E'yo 21 - lugbara bible

2 Suru Ma E'yo 21

¹Yehosafati la i a’bipi be, sa eri ma avu a’bipi be tualu aku Daudiniri ma alia; eri ma mvi Yehoramu nya di opi eri ma pariani.

²Eri ma adripi yi indi, anzi Yehosafatini ’diyi: Azaria pi, Yehieli pi, Zekaria pi, Azaria pi, Mikaeli pi, Sefatia pie; yi dria Yehosafati opi Israeliniri ma anzi.

³Yi ati fe yi dri afa feza amboru, dahabu pi, mele pie, afa aje ambosi ’diyi pie, fe aku acele abi kalirusi Yudaa ’diyi indi; te di sururuni fe di Yehoramu dri a’disiku erini ovule mva osipi okori’irisi.

⁴Te etu Yehoramuni i engazu uru suru i atini ma driliaria, ka i imba okporu ’bo, ofu i ma adripi dria seisi ra, ’ba ’wara Israelini ’diyi ma azi be indi.

⁵Yehoramu ovu ndra eli be kali na drini iri erini e’dozu opi nyazurisi, eri nya opi Yerusalemua eli aro.

⁶Eri nga aci geri opi Israelini ’diyini ma alia, ekile suruti Ahabunirini ’yelerile; a’disiku Ahabu zini ovule oku erinirisi. Eri ’ye e’yo ovupi onzi Yehova ma miliari.

⁷Te Yehova leni suru Daudiniri ma dri ja ku, aziza ndra erini azile Daudi beri ma e’yosi, ekile erini azile tala fezu eri dri anzi pie ’danirile.

⁸Ewu erinisi Edomu mbu Yuda ruaasi amve, yi ’ba opi yi ma ngulupini ceni.

⁹Yehoramu nga di zo ’aa’dasi ambo erini asikari dri cepi ’diyi be, gari erini ombani be dria; enga inisi ofu ’ba Edomua eri acepi kuru ’diyi ra, ’ba gari ombani dri cepi ’diyi be.

¹⁰’Dini Edomu mbu Yuda ma ruaasi amve kpere o’du andru’disi. Libina mbu vini eri ma ruaasi amve etu ’dasi indi, a’disiku erini Yehova Mungu i ma a’bipiniri kule ’borisi.

¹¹Azini indi eri ede pari uruleru ’diyi angu oni be Yudaniria, fe ’ba ovupi Yerusalemua ’diyini ali o’bazu, omi Yudani ’yezu ’dini indi.

¹²E’yo siza eca eri vu engazu nabi Eliya vu, ’yozu kini, Yehova Mungu mi ati Daudiniri ’yo ’dini, Mini acile mi ati Yehosafati pi ma geri Asa opi Yudaniri beri ma alia kurisi,

¹³te mini acile geri opi Israelini ’diyini ma aliarisi, te mi fe Yuda pini ali o’bazu ’ba ovupi Yerusalemua ’diyi be, ekile ndra suruti Ahabunirini ’yelerile, azini alu indi mi ofu mi aciripi mi ati vile joa mi agapi onyisi ra’diyi;

¹⁴mi ndre, Yehovaninga ’ba mini ’diyi ofu azo muanisi kakau, mi anzipi yi, mi okupi be, afa mini ’diyi pie dria;

¹⁵mi nga ovu azoru tu azoni mi bile fi aliarisi, kpere mi fini ngazu ani efuzu o’du vusi o’du vusi, azo mi bipi fiarisi.

¹⁶Te Yehova enga Yehoramu ma dria ’ba Filisitiaa ’diyi pi ma asi ombaru ’ba Arabuni ovupi ’ba Etiopiaa ’diyi ma kalaa ’diyi be;

¹⁷yi etu a’di ’dizu Yuda be, yi fi suru nde ma eselia okposi, yi ji afa dria ovupi opi vile joa yini isule ’diyi, agupianzi erini ’diyi piyi, oku erini ’diyi be, ’dini mva aceni eri dri aluni ku pe lu Yehoahazi, anzi erini ma eselia mva vile asizuri’i.

¹⁸E’yo ’diyi ma vutia dria, Yehova co eri azo eri ma fi alia ecopi atipi kurisi.

¹⁹Te e’yo nga eca ’dinile, ewuni agaria, eli iri ma vutia, eri ma fi efu amve azo ndesi, eri nga di dra azo eri bipi onzi turisi. Te ’ba erini ’diyi eveni afa veza eri dri ekile yini afa evele eri a’bipi dririle aluni ku.

²⁰De isu eli erini kali na drini iri, erini e’doria opi nyaria, nya opi Yerusalemua eli aro, ku opi ra, te ’ba leni eri avasi ku. Yi sa di ani eri ma avu aku Daudiniria, te pari ’bani opi sazu ’diyi ma alia ku.