Read lugbara 2 Suru Ma E'yo 22 Bible Online

2 Suru Ma E'yo 22 - lugbara bible

2 Suru Ma E'yo 22

¹Te ’ba ovupi Yerusalemua ’diyi ’ba eri ma mvi vile Ahaziani ovuzu opiru eri ma paria’i; a’disiku ’ba o’biru emupi ’ba Arabuni be pari yini hema asozuria ’diyi ofu anzi ’wara ’diyi dria ’bo ’Dini Ahazia Yehoramu opi Yudaari ma mvi nya di opini.

²De isu Ahazia ma eli kali su drini iri erini e’doria opi nyazurisi, nya opi Yerusalemua eli alu. Andri ma ru Atalia, Omiri zi’i.

³Aci vini indi geri suruti Ahabuni ’diyinisi, a’disiku eri ma andrini adri e’yo ama eri imbazu onzi ’yezuni.

⁴Eri ’ye e’yo onzi Yehova ma milia, ekile suruti Ahabuni ’diyini ’yelerile; a’disiku ’ba ’diyi adri e’yo ama eri dri atini drazu ’bori ma vutia, erini dri jazu ani.

⁵Eri aci vini indi ekile yini amalerile, mu Yehoramu Ahabu mvi opi Israeliniri be a’di ’dizu Hazaeli opi Suriaari be Ramotigileadia, ’Ba Suriaa ’diyi gbi Yoramuni, ku ebiru,

⁶Eri nga dri atri lani Yezireelia, ebi eri gbizu Ramaa erini a’di ’diria Hazaeli opi Suriaari beri atizu. Azini Azaria Yehoramu mvi opi Yudaari esi va emuzu Yezireelia Yehoramu Ahabu mvini ndrezu erini ovule azorurisi.

⁷Te isu dri jaza Ahazianiri ma e’yo enga Mungu vu, erini mule ndra Yoramu vurisi. A’disiku ka eca ’bo, fu muzu tualu Yoramu be omba ’bazu Yehu Nimisi mvi be, agu Yehovani odu osule drinia suruti Ahabuni ’diyi ofuzuri’i.

⁸E’yo nga di eca ani ’dinile, Yehuni e’yo liza ma e’yo ’yeria suruti Ahabuni ’diyi ma dria, ’dini eri isu karianzi Yudani ’diyi agupianzi Ahazia ma adripini ’diyi be, yini de azi ngaria Ahazia driria, nga yi ofu indi.

⁹Eri nga Ahaziani nda, yi nga eri bi indi de isu zi i Samariaa, yi ebi eri ejizu Yehu vu, ’di eri ra. Sa vini eri ra, a’disiku yi ’yo ani kini, Eri bani Yehosafati Yehovani ndrupi i ma asi driasiri ma mvi’i. Suru Ahazianiri ma okpo cali opi nyaza bizu ku.

¹⁰Te Atalia Ahazia andrini ndreria kini i mvi dra di ’bo, eri enga di karianzi suru Yudani ’diyi ofu dria ra.

¹¹Te opi zi Yehosabeati nga Yoasi Ahazia mvi ’du, nga eri ogu opianzi ’bani ofule ’diyi ma eseliasi ra, nga eri ’ba pari ’bani lazuri ma alia endria eriniri be. ’Dini opi Yehoramu zi Yehosabeati, atalau Yehoyada ma oku (a’disiku eri ndra Ahazia ma amvi) zi eri Ataliasi ra, ma fu eri ku beni;

¹²eri ovu di zizaru yi be jo Munguniri ma alia eli azia; te Atalia nga di angu nyani.