Read lugbara 2 Suru Ma E'yo 28 Bible Online

2 Suru Ma E'yo 28 - lugbara bible

2 Suru Ma E'yo 28

¹Ahazini de ndra eli be kali iri erini e’dozu opi nyazurisi, eri nya opi Yerusalemua eli mudri drini azia. Eri ’yeni e’yo onyiru Yehova ma milia ku, ekile ati Daudini ’yelerile,

²te eri aci geri opi Israelini I’diyiniri ma alia. Eri ede wura inzile inzi aya akapi acisirisi ’diyi Baali dri,

³drinisi vini nga obiese eve a’bu Hinomu mviniria, nga i vile anzi eve edetaru ada indi, ekile e’yo onzikanyaru ngule onzi suru Yehovani o’bele amve anzi Israelini ma drilia ’diyini adrile ’yelerile.

⁴Eri ede vini edeta, eri ve obiese pari uruleru ’diyia, azini oni dria, azini pati ibiru ’diyi ma etia dria.

⁵E’yo ’disi Yehova Mungu eriniri ku di eri opi Suriaari ma dria, yi nde eri ra, obi ’ba erini ati’baru o’biru tu, eji yi Damasikia. Ku eri vini opi Israelini ma dria indi, eri nde eri a’disi ra, o’di ’ba kakau.

⁶Te Peka Remalia mvi ofu ’ba alifu turu alu drini kali iri o’du alu ma alia Yudaa, yi dria ’ba asi be agupiru ’diyi, yini Yehovani Mungu yi ma a’bipiniri kule ’borisi.

⁷Azini Zikiri ’ba okporu Efiraimuari fu Maaseya opi ma mvi pi, Azirikamu ambo jo opini ma driliari pie, Elikana ovupi opi ma vutiari be.

⁸Anzi Israelini ’diyi obi yi ma adripi ati’baru ’ba alifu turu iri, oku piyi, agupianzi pie, ezoanzi pie; opa vini afa opaza yi ma dria karakarau, ji afa nde yini opaleri Samariaa.

⁹Te nabi Yehovaniri ndra ’daa indi, i ma ru Odedi’i; eri fu mu dri fuzu ’ba ongulumuru emupi Samariaa ’diyi be, ’yo ani yi tia, Emi ndre, Yehova Mungu emi a’bipinirini ovule adraru Yuda berisi, eri fe ani yi emi dria ra; te emi ofu yi aoko o’dukonini cazu kpere ’buarisi.

¹⁰Azini vini curu’do emi le anzi Yudaa ’diyi pi ombe anzi Yerusalemua ’diyi be, ma ovu ati’ba emini agupiru azini okuru. Te emi indi, ezata emi ma ngulupini ezale Yehova Mungu emini vu ’diyi emi vu yo ya?

¹¹E’yo ’disi emi eri ma curu’do, emi ma pe ari’ba emini obile ati’baru emi adripi ma eselia ’diyi ma ti vile, a’disiku adra okporu Yehovaniri ovu emi dria.

¹²O’du ’dasi ’ba azini suru Efiraimuni ma dri cepi ’diyi, Azaria Yohanani mvi pi, Berekia Mesilemoti mvi pi, Yehizikia Salumu mvi pi, Amasa Hadilai mvi pie dria, oso di pa uru ’ba emupi ombaa ’diyi ogazu,

¹³’yo yi tia, Emi ngani ati’ba nde ’diyi eji ’doa aluni ku, emini e’yo ngapi ezata Yehova vuri ejipi ama driari egale’irisi, fezu e’yo onzi amani ’diyi pini ezuzu ezata amani be; ezata amanirini ovule amborurisi, azini vini adra amboru ovu suru Israelini ma dria indi.

¹⁴’Dini asikari a’di ’dipi ’diyi ku ati’ba piyi afa opale ombaari be ’ba ’wara piyi ma milia ’ba ongulumuru ’diyi be dria.

¹⁵’Dini ’ba nde yi ma ru osile ’bo ’diyi nga enga uru, nga ati’ba o’du, nga ’ba yi ma eselia pililiru ’diyi osu afa suza engapi afa opale ’diyi ma eseliarisi; yi nga bongo osu yi ma ruaa, nga enyiriko osu yi ma paa, nga yi dri afa nyaza piyi fe afa mvuza be, nga yi ma rua efi odusi, nga ’ba okpo kokoru yi ma eselia ’diyi dria o’ba akanya ma dria, nga yi eji yi ma adripi vu Yeriko aku itu pati beria. Vilerisi yi nga dri atri mvi vile Samariaa.

¹⁶Etu nde ’dasi opi Ahazi pe ojio ti opi Asuriaa ’diyi vu yi omvezui ma aza kozu beni.

¹⁷A’disiku ’ba Edomuni eca dika ’bo, ofu ’ba Yudani ’diyi, obi ’ba azini ati’baru.

¹⁸’Ba Filisitiaa ’diyi indi fi aku angu Eleria, azini Yuda ma kala Uruleruria ’diyi ma alia ’bo, obi Beti-semesi pi, Aiyaloni pie, Gederoti pie, Soko pie aku erini nyiri nyiri ’diyi be, Timina pie aku erini nyiri nyiri ’diyi be, Gimizo pie aku erini nyiri nyiri ’diyi be dria; yi ri di ’daa.

¹⁹A’disiku Yehova omvi Yudani va Ahazi opi Israeliniri ma e’yosi, erini e’yo ’yele pirimaru Yuda ma aliarisi, erini e’yo ezale tu Yehova vurisi.

²⁰Tiligatipilineseri opi Asuriaari emu di eri vu ani, te fe eri dri candi’i, awuni eri dri okpo fe ku.

²¹A’disiku Ahazi ’du lonyi ma esele engazu jo Yehovani ma alia azini engazu jo opi pini ambo erini beri ma alia indi, fe eri opi Asuriaari dri; te e’yo nde koni eri ma aza ku.

²²Te etu erini ovuzu candisirisi, opi Ahazi nde ’diri eza di drile drile aga ra Yehova vu.

²³Te eri ede edeta mungua Damasikia eri ndepi a’disi ’diyi dri, te eri ’yo ra, Mungu opi Suriaa ’diyinirini yi ma aza kolerisi, e’yo ’disi ma di nga yi dri edeta ede’i, yi ma ko ma aza indi beni. Te yi awu fe eri ma dra ra, Israeli be dria.

²⁴Ahazi nga vini afazu Mungu vile joa ’diyi oku, nga afazu Mungu vile joa ’diyi olinyirinyiri,nga jotile Yehova vile joa ’diyi opi ci; eri ede i dri pari edeta edezu Yerusalemu ma kalaa dria.

²⁵Azini aku ambo ambo Yudani ’diyi ma alia Idria alu alu eri ede pari uruleru ’bani obiese vezu Mungu toko ’diyi dri, Yehova Mungu eri ma a’bipiniri ma asi engazu adraru,

²⁶Te e’yo erini ’yele ’diyi ma joloko, geri erini dria, oko ’diyi azini vile ’diyi pie, mi ndre, yi ovu sizaru buku opi Yudani ’diyi pi ma e’yo sizuri ma alia opi Israelini ’diyi be.

²⁷Ahazi la i a’bipi be, yi sa eri avu aku ma alia, ada Yerusalemua, a’disiku ejini eri ma avu pari ’bani opi Israelini sazu ’diyia ku. Hezekia eri ma mvi nya opi eri ma pariani.