Read lugbara 2 Suru Ma E'yo 3 Bible Online

2 Suru Ma E'yo 3 - lugbara bible

2 Suru Ma E'yo 3

¹’Di ma vutia Sulemani e’do di jo Yehovani sizu Yerusalemua, oni Moria ma dria, pari ndraka Yehovani i e’dazu eri ma ati Daudi driria, pari ndra Daudini edele ngonde, Orinani ’ba-Yebusiniri ma akuma ma aliaria.

²E’do jo sizu mba iriri ma o’du iririsi, de di isu nya opi eli su ’dipi ’bo.

³Te jo eti Sulemanini ’bale erini jo siria Mungu dri ’diyi ndra ’dini: jo ma oconi wuale kali azia o’biza aluri ma vusi, walani wuale kali iri.

⁴Jobileko ovupi jo ma driliari ma oconi wala joniri vusi wuale kali iri, oco edrezari turu alu drini kali iri; a’bu eri ma rua aleniari mele alarusi.

⁵Opi jo ambori ma ale masa patisi, a’bu eri ma rua aleniari mele alarusi, opa drinia wura itu pati pini ekilaza be.

⁶O’ba oni aje nyapi tu ’diyi jo nde ma ruaa. Mele eri mele engapi Parivaimuari’i.

⁷A’bu jo pi ma rua melesi, pati jo dria ’diyi pie, pari fizu jotilea ’diyi pie, jo ma abi pie, jotile ada ’diyi pie dria; opa wura kerubini abi ma ruaa indi.

⁸Ede jo alatararu agapi turi; oconiri trotro jo ma walale wuale kali Iri, walaniri vini alu wuale kali iri indi; a’bu ruani mele onyiru turisi, mele nde ma kalafe onzi turu azia.

⁹Azini nziza musumariniri ndra sekeli kali towi meleni. A’bu di jo aliza uruleru ’diyi ma rua melesi indi.

¹⁰Te jo alatararu turi ma alia eri ede wura iri kerubini, azi wura edezurisi, yi a’bu yi ma rua melesi.

¹¹Kerubi ’diyi ma opile dria tualu wuale kali iri: kerubi alu ma opileni wuale towi, cazu trua jo ma abi vu; opile kala aziniari ovu tro tro ’ dinile wuale towi, cazu trua kerubi aziniri ma opile vu.

¹²Kerubi aziniri ma opileni wuale towi, cazu towi jo ma abi vu; opile azini indi ovu wuale towi, cazu ecizu kerubi aziniri ma opile vu.

¹³Opile kerubi ’diyini aja yi cazu dria wuale kali iri; yi so pa uru yi ma pasi, yi ma andretini angu lu jo vuleru.

¹⁴Eri ede bongo jo ale alizuri bongo blururi pisi, okalakokalaruri pie, ekaruri pie, bongo mile be nyiriari pie, ede kerubi ma wura bongo nde ma ruaa.

¹⁵Ede azini afa pa sopi piriru jo ma drilia ’diyi iri, oco yini edrezari wuale kali na drini towi, drini erini o’bale drinia uru ’diyi yi alu alu wuale towi.

¹⁶Eri ede anziriku pari e’yo ecezaniri ma alia, o’ba di yi afa pa sopi piriru ’diyi ma dria; ede azini patiefi pomegranateni ma wura turu alu, o’i di yi anziriku ma ruaa,

¹⁷Edre afa piriru ’diyi hekalu ma drilia, aluri kala dri ndialeruria, aziniri kala dri ejialeruria; da kala dri ndialeruri ma ru Yakini’i, kala dri ejiari ma ru Boazi’i.