Read lugbara 2 Suru Ma E'yo 30 Bible Online

2 Suru Ma E'yo 30 - lugbara bible

2 Suru Ma E'yo 30

¹Hezekia nga ojio ti pe Israeli pi vu Yuda be dria, si waraga Efiraimu pi vu Manase be indi, kini yi ma emu jo Yehovani Yerusalemuaria omu agaza ’ba drilesirini ’bazu Yehova Mungu Israeliniri dri.

²A’disiku opi pi ama e’yo ’bo ’ba ’wara pie, ’ba ongulumuru Yerusalemua ’diyi be dria, omu agaza ’ba drilesirini ’bazu mba iriri ma alia.

³A’disiku yi econi eri ’ba etu nde ’dasi ku, ’ba edeta edepi yi ma ngulupi ’bapi alatararu ’bo ’diyi ma kalafeni cale nga kurisi, ’ba okuni vini nga ndra yi Yerusalemua ku indi.

⁴E’yo nde ovu onyiru opi pi ma milia ’ba ongulumuru be dria.

⁵’Dini yi azi azita e’yoniri ekuzu Israeli ma eseliasi dria, engazu Beeri-sebaa kpere Dania, yi ma emu omu agaza ’ba drilesirini ’bazu Yehova Mungu Israeliniri dri Yerusalemua; a’disiku yi okuni yi ndra nga kakau omu nde ’bazu e’yonirini; silerile ku.

⁶’Dini ’ba waraga ojipi ’diyi aci waraga opi pini osile ’ba ’wara erini be ’diyi be, yi ojizu Israeli pi ma eseliasi Yuda be dria, ekile trotro opini azile ’borile, ’yozu kini, Emi anzi Israelini ’diyi la, emi ma oja emi dika Yehova Mungu Iburahimu pini, Isaka pie, Israeli beri vu, ’dini eri ma emvi emi joloko acepi yi opapi opi Asuriaa ’diyi ma dria ’bo ’diyi vu beni.

⁷Te emi ma ovu emi atapi piyile, emi adripi be ’dini ku, yi ’ye onzi Yehova Mungu yi ma a’bipiniri vu, ’dini eri ce yi ma angu fu andruru ani, ekile emini ndrelerile.

⁸Curu’do emi ma ovu di ombe teza be emi a’bipini ndra ovulerile ku, te emi ma fe emi ngulupi Yehova dri, ma fi ani pari erini alatararu erini ’bale alatararu ’dani ’daniri ma alia, emini azi ngazu Yehova Mungu eminiri dri, ’dini adra erini okporuri ma oja i ani emi vurisi ra beni.

⁹A’disiku emi ka emi oja dika Yehova vu, emi adripi piyi emi anzipi be nga asi ndriza isu ’ba ndra yi obipi ati’baru ’dayi ma milia, yi nga emvi dika angu ’diri ma alia ani. Te Yehova Mungu eminiri eri asi ndriza be, yikini tu, eri ngani i ma mile oja emi vurisi ndu ku, emi ka emvi eri vu.

¹⁰’Dini ’ba ojioru ’diyi aci aku ambo ambo vusi angu Efiraimuni pi ma eseliasi Manaseniri be, kpere cazu Zebulunia; te yi ogu yi, drinza fezu yi dri, ede vini yi ma e’yo ra.

¹¹Te ka tro ngoni ti, ’ba Aseri pia, Manase pie, Zebuluni be ’diyi ma azi do yi e’yere, emu Yerusalemua ra.

¹²Azini dika, dri Munguni ovu indi Yudaa, asi alu fezu yi dri azita opi pini ’ba ’wara be e’yo Yehovanisiri ’yezu.

¹³’Dini ’ba o’biru nga yi oku Yerusalemua omu mikate akufi kokoruniri ’bazu mba iririsi, ada ’ba ongulumuru amboru tu.

¹⁴’Dini yi nga enga, nga pari edeta edezu Yerusalemua ’diyi anzu, nga vini pari obiese vezu ’diyi anzu dria indi, ejizu yi o’bezu yi raza Kidroni ma alia.

¹⁵Vutinia oli agaza ’ba drilesiri mba iriri ma o’du mudri drini surisi. ’Ba edeta edepi ’diyi pi ’ba Levini be ovu drinzasi tu, ’ba yi ma ngulupi alaru ra, eji edeta vezaru jo Yehovaniri ma alia.

¹⁶Nga ani pa oso yi ma paria yini yi otileri vusi, ekile azita Musa ’ba Mungunirini azilerile; ’dini ’ba atalauru ’diyi oya ari yini a’ile ’ba Levini driri,

¹⁷A’disiku ’ba kakau ’ba yi okupi ’diyi ma eselia ’bani nga yi alaru ku; e’yo ’disi yi fe ’ba Levini dri azi agaza ’ba drilesiri olizu ’ba alaru ku ’diyi dri dria, yi ’bazu ani alaru Yehova vu beni.

¹⁸A’disiku ’ba o’biro, adani ’ba Efiraimu pia, Manase pie, Isakari pie, Zebuluni pie ’diyi kakau bani ndra nga yi alaru ku, te kiri ti, yi nya omu agaza ’ba drilesirini ’dani, te e’yoni silerile ’dini ku. A’disiku Hezekia zi Mungu tia yi dri kini, Yehova onyiruri ma wu ’ba dria alu alu

¹⁹i asi fepi Mungu, Yehova Mungu i ma a’bipiniri ndruzuri ma ezata fo, ka tro ovuni alaru pari alatararuri ma edeza alarurile ku ti.

²⁰Yehova eri e’yo Hezekianiri ra, eri ati ’ba nde ma rua ra.

²¹Anzi Israelini ndra ovupi Yerusalemua ’diyi ’ba omu mikate akufi kokoruniri o’du aziri ayiko amborusi; ’ba Levini pi ’ba edeta edepi ’diyi be inzi Yehovani o’du vusi o’du vusi, ongo ngozu o’di o’duko be uru ’diyisi Yehova dri.

²²Hezekia ’yo vini e’yo asi omizani ’ba Levini ovupi onduaru azi Yehovani ngapi ’diyi ma tia dria. ’Dini yi nya omu kpere o’du aziri, edeta asi anzuruni ’diyi edezu, azini ezata e’dazu Yehova Mungu yi ma a’bipiniri vu.

²³’Ba dria ongulumuru ’diyi ede e’yo o’du aziri azini ’diyi ma ta mbazu; ’dini yi mba o’du aziri azini ma ta ayikosi.

²⁴A’disiku Hezekia opi Yudaari fe ’ba ongulumuru ’diyi dri edetaru ti ranya alifu alu, azini kabilo alifu aziri, ’ba ’wara indi fe ’ba ongulumuru dri ti ranya alifu alu, kabilo alifu mudri be. ’Ba edeta edepi ’diyi kakau ’ba yi alaru.

²⁵’Dini ’ba ongulumuru Yudaa ’diyi pi dria, ’ba edeta edepi ’diyi pie, ’ba Levini pie, ’ba ongulumuru dria engapi Israelia ’diyi pie, ’ba omuru ndra engapi angu Israelinia ’diyi pie, ’ba omuru ovupi angu Yudaa ’diyi pie, ovu di ayikosi.

²⁶’Dini ayiko amboru ovu Yerusalemua, a’disiku engazu mira ewu Sulemani Daudi mvi opi Israelini ngarerisi, ayiko ovuni Yerusalemua ’dini ku.

²⁷Vutinia ’ba atalauru ’ba Levini ’diyi be nga enga asi ndriza a’izu ’ba nde ma dria; yi ma o’duko ovu ani erizaru ra, zita yiniri emu kpere pari erini alatararuri ma alia, kpere ’bua.