Read lugbara 2 Suru Ma E'yo 31 Bible Online

2 Suru Ma E'yo 31 - lugbara bible

2 Suru Ma E'yo 31

¹Te e’yo ’diyi ka di yi de dria ’bo, ’ba Israelini dria ovupi ’daa indi ’diyi fu mu aku Yudaa ’diyia, onyo pati i’diza piriru ’diyi, oga wura Aseriru ’diyi va, onyo pari uruleru ’diyi pi, pari edeta edezu ’diyi be, engazu Yuda piasi dria Benyamini be, azini Efiraimu pi ma alia Manase be indi, kpere yini deria yi ezaria dria ’boria. Vilerisi anzi Israelini dria atri di dri ra, ’ba dria alu alu mvizu yi vile awuruso vu, kpere yi vile akua.

²Hezekia ede amuti ’ba atalauru ’diyi pi dri ’ba Levini ’diyi be, yi otizu amuti yini vusi ’ba dria alu alu azi iniri vusi azi iniri vusi, ’ba edeta edepi ’diyi pi ’ba Levini be indi, edeta vezaru ’diyi pi edezu edeta asi anzuruni ’diyi pie, azi ngazu azini awa’difo fezu, inzita inzizu pari Yehovani ovuzuri ma kalitilia.

³Afa feza opini engapi afa eri vile ’diyi ma eseliari eri edeta vezaru ’diyi, adani yi edeta vezaru o’bitisiri, pi ondreniri be, azini edeta vezaru sabatosi ’diyi pi, mba o’dirusi ’diyi pie, omu azile ’diyisi ’diyi pie, ekile sile Yehova vile azita ma aliarile.

⁴Azini indi eri azi ’ba ovupi Yerusalemua ’diyi ma fe afa feza ma esele ’ba edeta edepi ’diyi pi vileri ’ba Levini be, ’dini yi ma fe yi ma ngulupi azita Yehovani vu beni,

⁵Azita ’dini ’baria i ereriaria indikindi, anzi Israelini nga anya kapi okori pi fe fudri ci, afa mvuza pie, odu pie, anyusu pie, afa dria kapi amvua ’diyi pie dria; yi eji afa dria ma esele mudri ma azi aluri fudri ci.

⁶Anzi Israelini piyi anzi Yudani be, ovupi aku Yudani ma alia ’diyi, yi eji alu indi ti pi ma esele mudri ma azi aluri, kabilo be, eji vini afa feza fele alaru Yehova Mungu yiniri dri ’diyi ma esele mudri ma azi aluri indi, yi oda di yi nguru nguru.

⁷Yi e’do afa yini okule nguru nguru ’diyi ma eti odazu mba narisi, yi de di mba azirmsi.

⁸Hezekia pi ’ba ’wara ’diyi be ka di emu afa odale nguru nguru ’diyi ndre dria ’bo, yi inzi ani Yehova, fe asi ndriza ’ba erini Israeliru ’diyi dri.

⁹Hezekia nga di ’ba atalauru ’diyi pi ozi ’ba Levini be, afa ’bani odale nguru nguru ’diyi ma e’yosi.

¹⁰Azaria atalau ambori ovupi ori’ba Zadokiniri, nga e’yo omvi eri tia kini, Engazu ’bani e’dozu afa feza ejizu jo Yehovani ma aliarisi, ama nya ra, ama tra ra, joloni ace ekpete ekpete; a’disiku Yehovani asi ndriza fele ’ba erini dririsi, te afa ta mbale amboru ’diyi joloko kuleri’i.

¹¹Hezekia nga di e’yo azi jo aliza edezu jo Yehovaniri ma alia; yi ede di yi ra.

¹²Yi eji di afa fele Mungu dri ’diyi pi, o’ba yi alenia asi adasi, afa yini ma esele mudri ma azi aluri pie, afa feza fele alaru ’diyi pie dria. Konania ’ba Leviniri ovu afa feza nde ’diyi ma drilia, vunisiri adri Simei’i;

¹³Yehieli pi, Azazia pie, Nahati pie, Asaheli pie, Yerimoti pie, Yozabadi pie, Elieli pie, Isimakia pie, Mahati pie, Benaya pie dria, yi ovu ndra ’ba ma drilia Konania pi ma palaa adri Simei be, ekile opi Hezekia pini yi opele Azaria jo Munguniri ma driliari berile.

¹⁴Kore Imina mvi ’ba Levini, kalitile etuni efurialeruri ma agei tepiri, ovu ndra afa feza ceni fele Mungu dri ’diyi ma drilia, afa feza Yehovani ’diyi pi awazu afa alatararu tu ’diyi be.

¹⁵Eri ma vutisi yi Edeni pi, Miniamini pi, Yesua pi. Semaya pi, Amaria pi, Sekania pie aku ’ba edeta edepi ’diyini ma alia, ekile ’bani yi otile azi yinisirile, afa awazu yi adripi dri amutisi, ’ba ’wara piyi dri ’ba nyiri ’diyi be dria trotro;

¹⁶fe vini ’ba yini olale ’ba agupiru a’bianzi olazasi ’diyi dri indi, e’dozu ’ba capi eli be na ’diyisi muzu drile, adani ’ba dria alu alu fipi Yehova vile jo ma alia, ekile azi o’du alu alusirini lelerile, azi ’bani yi ayuzuri ngazu amuti yini vusi ’diyi.

¹⁷Azini ’ba atalauru olale ’ba agupiru a’bianzi olazasi ori’ba yi ma a’bipini vusi ’diyi pi dri, ’ba Levini engazu eli kali irisi tuzu drile, ’bani yi ayulerile amuti yini vusi ’diyi be.

¹⁸Azini yi be anzi nyiri yini, ’bani olale a’bianzi olazasi ’diyi pi, oku Iyini pie, agupianzi yini pie, ezoanzi yini pie, ’ba ongulumuru ma eselia dria, a’disiku azi ’bani fele yiniruri ma alia yi alaru e’yo alatararuri ma alia.

¹⁹Te anzi Aronini ’ba edeta edepi ovupi amvu angu aku yini ma ageiaria ’diyi dri, ’ba azini indi aku dria alu alu ma alia yi ma ru osile ’diyi, ngazu afa yiniri awazu fezu ’ba agupiru ’ba atalauru ma eselia ’diyi pi dri, ’ba dria olale a’bianzi olazasi ’ba ma eselia ’diyi be dria.

²⁰Hezekia ’ye ’dinile Yuda ma alia dria; eri ’ye azi ovupi onyiru, kililiru, azini adaruri Yehova Mungu eriniri ma milia.

²¹Te azi dria erini e’dole ’yele jo Yehovani ma alia ’diyi, kani azita ma e’yosi ’diyi, kani e’yo azile ’diyi ma alia dria, Mungu ini ndazu, eri ’ye asi driasi, ovu ani drilebaru.