Read lugbara 2 Suru Ma E'yo 34 Bible Online

2 Suru Ma E'yo 34 - lugbara bible

2 Suru Ma E'yo 34

¹Yosiani de eli be aro erini e’dozu opi nyazurisi, eri nya opi Yerusalemua eli kali na drini alu.

²Eri ’ye e’yo onyiru Yehova ma milia, ri ad a’bi Daudi ma pamvusi; ojani i dri ndialeru kani dri ejialeru ku.

³A’disiku eli erini opi nyazu arori ma alia, de isu kiri eri nga mvaaru, eri e’do Mungu i a’bi Daudiniri ndruzu; azini eli erini opi nyazuri ka eca mudri drini iri ’bo, eri e’do Yuda pi ’bazu alaru Yerusalemu be pari uruleru ’diyi pi wuzu, wura Aseriru ’diyi pie, wura opale ’diyi pie, wura edele aya akapi acisi ’diyi pie dria.

⁴Yi onyo pari edeta edezu Baali dri ’diyi va eri ma milia; oga vini wura etuni ndra o’bale yi ma drilia uru ’diyi; onyo wura Aseriru ’diyi pi nyiri nyiri wura opale ’diyi pie, wura edele aya akapi acisi ’diyi pie dria, nga yi ’i furaru yi erezu nyadri ’ba ndra edeta edepi yi dri ’diyini ma dria.

⁵Eri eve falako atalau nde ’diyini yi vile pari edeta edezu ’diyi ma dria, ’ba di Yuda pi alaru Yerusalemu be.

⁶’Ye ’dinile indi trotro aku Manase pini ’diyi ma alia Efiraimu pie, Simeoni pie, kpere cazu Nafutaliniria, ’ye trotro yi vile andru ma ageia indi.

⁷Eri onyo, pari yini edeta edezu ’diyi va, ogba wura Aseriru ’diyi pi wura opale ’diyi be furaru, eri oga wura etuni dria angu Israeliniasi dria va, nga di dri atu Yerusalemua ndo.

⁸Te eli erini opi nyazu mudri drini arori ma alia, erini di angu pi ’bazu alaru jo nde be ’borisi, eri pe Safani Azalia mvi pi ma ti, Maaseya opiru aku ma driliari pie, Yoa Yoahazi mvi ojio sipiri pie, ngazu jo Yehova Mungu erinirini edezu dika.

⁹Yi emu ani Hilikia atalau ambori vu, fe drinia silingi ndra ’bani jile jo Munguni ma alia, ndra ’ba Levini jotile agei tepi ’diyini okule Manase pi dri, Efiraimu pie, ’ba Israelini ma joloko acepi ’diyi pie dria, Yuda pie dria, Benyamini pie, ’ba ovupi Yerusalemua ’diyi pie.

¹⁰Yi fe di silingi nde ’ba azi ngapi ovupi azi jo Yehovani ma aliari ma drilia ’diyi dri; ’ba azi ngapi jo Yehovani ma alia ’diyi fe vini di silingi nde jo edezu alaru i paria o’di dika.

¹¹Adani yi fe silingi nde ’ba bau fapi ’diyi pi dri, ’ba jo sipi ’diyi be, ngazu oni opale opa ’diyi pi jezu ani, pati ecizu ’diyi be, ngazu jo ndra opi Yudaa ’diyini ezale ’bo ’diyi ma pati edezu.

¹²’Ba ’diyi nga azi nde asi adarusi. ’Ba yi ma drilia ’diyi yi Yahati pi Obadia be, ’ba Levini Merari anzipiru ’diyi; Zekaria pi Mesulamu be, Kohati anzipiru ’diyi, azi nde arizu mbele; ’ba Levini ma azi ’diyi pie, ’ba dria ovupi onduaru o’di pi cozu ’diyi.

¹³Azini indi yi ndra ’ba teri ojipi ’diyi ma drilia, ’ba dria azi ndu ndu ’yepi ’diyi etuzu; ’ba Levini ma eselia ’ba azini yi ’ba e’yo sipi ’diyi, ’ba azi ma drileru ’diyi, ’ba kalitile ma agei tepi ’diyi.

¹⁴Te yini silingi ’bani okule Yehova vile joa ’diyi ofuriaria, atalau Hilikia isu buku azita Yehovanirini, ndra fele Musa driri ra.

¹⁵Hilikia nga e’yo omvi Safani waraga sipiri ma tia kini, Ma isu buku azitaniri Yehova vile joa ’do; Hilikia fe di buku nde Safani dri.

¹⁶Safani ’du buku nde ji opi vu, omvi vini e’yo opi tia dika kini, E’yo dria mini kule ati’ba mini vuri, yi eri ’ye.

¹⁷Yi da silingi yini isule Yehova vile joari va ’bo, fe di yi ’ba azi drilia ’diyi pie dri, ’ba azi ’yepi ’diyi be.

¹⁸Safani ojio sipiri nga e’yo olu opi tia kini, Atalau Hilikia fe ma dri bukuni. Safani nga di e’yo aleniari la opi ma drilia.

¹⁹Te eri nga eca ’dini, opi ka e’yo azitani ’diyi eri ’bo, asi i ma bongo ra.

²⁰Opi nga e’yo azi Hilikia pi dri, Ahikamu Safani mvi pie, Abidoni Mika mvi pie, Safani ojio sipiri pie, Asaya ati’bo opiniri pie dria, kini,

²¹Emi mu Yehovani zi masi, azini ’ba acepi Israeli pi ma alia Yuda be ’diyisi, e’yo lale buku yini isuleri ma aliari ma e’yosi; a’disiku adra Yehovaniri ’depi ama driari eri amboru, ama a’bipini e’yo Yehovani ma ta mbale ’yezu ekile e’yo dria sile buku ’ di ma aliarile kurisi.

²²’Dini Hilikia pi, ’ba azini opini azile ’diyi be, mu Hulida nabi okuru, Tokati Hasira mvi ma mvi Salumu, ’ba afa suza ma ta mbapiri ma oku vu (isu de eri Yerusalemua woko iriri ma alia), yi olu eri tia e’yo nderi ra.

²³Eri nga e’yo omvi ’yo yi tia, Yehova Mungu Israeliniri ’yo ’dini: Emi olu ’ba emi ti epepi ma vuri ma tia ’dini,

²⁴Yehova ’yo ’dini, Mi ndre, ma nga e’yo onzi eji angu ’dori ma dria, ’ba ovupi alenia ’diyi be, azini trita dria ovupi sizaru buku yini lale opi Yudaari ma driliari ma aliari indi.

²⁵A’disiku yi ku ma ’bo, yi eve obiese mungua azini ’diyi dri, fezu ani aokoni ma nyazu azi dria yini ’yele yi ma drisirisi, e’yo ’disi adra mani ’de pari ’dori ma dria ani, te adra nde ngani i inyu aluni ku.

²⁶Te opi Yudaa emi ti epepi Yehovani zizuri ma tia, emi ’yo ani tinia kini, Yehova Mungu Israeliniri ’yo ’dini: E’yo mini erile ’borisi,

²⁷mi asini ovule menemenerurisi, azini mini mi dole e’yere Mungu ma driliarisi, mi ka e’yo erini ’yole pari ’dori pi ma dria ’ba ovupi alenia ’diyi beri eri ra, te mi do mi e’yere ma drilia ra, mi asi afa suza mini ra, wuzu ma drilia mindresi; ma indi ma eri mi ra, Yehova ’yoni.

²⁸Mi ndre, ma nga mi omvi mi a’bipi vu, yi nga mi ji mi ’bilia asi anzurusi, mi mile ngani e’yo onzi dria mani ngale ejile pari ’dori pi ma dria ’ba ovupi alenia ’diyi beri ndre ku. Yi eji di e’yoni opi vu dika.

²⁹Opi nga di ’ba ti pe ’ba ’wara ovupi Yuda pia Yerusalemu be ’diyi okuzu dria.

³⁰Opi tu uru jo Yehovaniria, tualu ’ba dria Yudaa ’diyi pie, ’ba Yerusalemua ’diyi pie, ’ba edeta edepi ’diyi pie, ’ba Levini ’diyi pie, ’ba dria ’wara ’diyi pie, nyiri ’diyi pie; eri la yi ma bilia e’yo dria ovupi buku azizani yini isule jo Yehovani ma aliari ma alia ’diyi ra.

³¹Opi so pa pari iniria, eri azi aziza Yehova ma drilia acizu Yehova ma vutia, azita erini pi ma ta mbazu, e’yo eti nzeza erini ’diyi pie, e’yo erini azile ’diyi pie, asi driasi azini orindi driasi, ngazu e’yo azizani ovupi sizaru buku nde ’diri ma alia ’diyi ’yezu.

³²Eri fe ’ba dria ovupi isuzaru Yerusalemu pia Benyamini ’be ’diyi ma so pa aziza nde a’izu. ’Ba ovupi Yerusalemua ’diyi ’ye aziza Mungunirile, Mungu yi ma a’bipiniri.

³³Yosia wu afa onzikanyaru ngule onzi ’diyi angu Israelini ndu ndu ’diyi ma aliasi dria, eri fe ’ba dria ovupi Israeli ma alia ’diyi ma nga azi, adani ma nga azi Yehova Mungu yiniri inzizu. Ewu erinisi dria yi kuni Yehova Mungu yi ma a’bipiniri ma vuti bikokoru ku.