Read lugbara 2 Suru Ma E'yo 35 Bible Online

2 Suru Ma E'yo 35 - lugbara bible

2 Suru Ma E'yo 35

¹Yosia nga di omu agaza ’ba drilesiri ’ba Yehova dri Yerusalemua; yi oli agaza ’ba drilesiri mba okori ma o’du mudri drini surisi.

²Eri oti ’ba atalauru ’diyi azi yini vusi, omi yi asi ava fezu yi dri azi Yehova vile joari ’yezu.

³Eri ’yo ’ba Levini ’ba Israelini dria imbapi ovupi alaru Yehova vu ’diyi ma tia kini, Emi ma ’ba sanduku alatararu jo Sulemani Daudi opi Israeliari ma mvini sileri ma alia; afa nziza nderi ngani ovu emi gbudria dika ku. Curu’do emi ma nga di azi Yehova Mungu eminiri pi dri, ’ba erini Israelini ’diyi be.

⁴Emi ma ede emi ori’ba emi a’bipini vusi, amuti emini ma alia, e’yo Daudi opi Israelinirini silerile, azini e’yo eri ma mvi Sulemanini silerile indi.

⁵Emi ma oso pa pari alatararuri ma alia ekile emi adripi ’ba nde ma anzipini yi awale ori’ba yi a’bipiniri vusirile, ekile ’ba Levini yi awale alu alu ori’ba yi ma a’bipini vusirile indi.

⁶Emi ma oli agaza ’ba drilesiri, emi ma ’ba emi alatararu, emi ede afa emi adripi dri indi, ’yezu ekile e’yo Yehovani fele Musa ma drisirile.

⁷Azini Yosia fe anzi ’bani ’diyi dri anyapa nyiri ma eselia kabiloanzi ndrianzi be, fe yi dria agaza ’ba drilesiri ma edetaru, ’ba dria ndra ovupi indi ’diyi dri, fe kpere kalafeni caria alifu kali na ’ dipi, ti ranya alifu na be indi; ’diyi dria afa opini ’diyi.

⁸’Ba ’wara erini fe afa feza ceniri ’ba nde ’diyi pi dri, atalau pie, ’ba Levini ’diyi pie. Hilikia pi Zekaria pie, Yehieli pie, yi ’ba ambo jo Yehovani ma dri cepi ’diyi, fe ’ba edeta edepi, ’diyi dri anyapa nyiri alifu iri drini turu azia, ti ranyaru ’diyi turu na be, omu agaza ’ba drilesiri ma edetaru.

⁹Konaniani alu indi, Semaya pi, Netaneli pie, eri ma adripi pie, Hasabia pie, Yeyeli pie, Yozabadi pie, yi ’ba ambo ’ba Levini ma drilia ’diyi, yi fe ’ba Levini dri anyapa nyiri alifu towi, ti ranya turu towi indi, omu agaza ’ba drilesiri ma edetaru.

¹⁰’Dini yi ede azi inzizaniri ra, ’ba atalauru ’diyi nga pa oso pari yini ma alia, ’ba Levini indi amuti yini vusi, ekile azita opinirile.

¹¹Yi oli di kabilo agaza ’ba drilesiriniri ra, ’ba atalauru ’diyi oya ari yini a’ile yi ma driarini, ’ba Levini wu enyinini.

¹²Yi nga di edeta evezaru ’diyi wu pari azinia, yi ma nga yi fe Yehova dri ekile ’ba nde ma anzipini yi awale ori’ba yi ma a’bipini vusirile, ekile erini ovule sizaru buku Musani ma aliarile. Yi ’ye vini ti ranyaru ’diyi vu trotro ’dini.

¹³Yi ozo kabilo agaza ’ba drilesiriniri ma za acisi azitani lelerile; te yi a’di edeta alatararu ’diyi yisi otakasi, otaka yakaru ’diyisi, ajikosi, oji yi mbele mbele agu ma anzi vusi dria.

¹⁴Vileri yi nga afa ede yi ma ngulupini, ’ba edeta edepi ’diyi be, a’disiku ’ba atalauru ovupi Aroni anzipiru ’diyini ovule azi be tu edeta evezaru ’diyi pi edezu edeta ososi ’diyi be kpere inisirisi; ka’dinile ’ba Levini ede di afa yi ma ngulupini ’ba edeta edepi Aroni anzipiru ’diyi be.

¹⁵Asafu anzipi ongo ngopi ’diyi yi ma paria, ekile azita Daudi pini azile Asafu pie, Hemani pie, Yedutuni ’ba opini afa ndreza ndrepiri pierile; ba kalitile agei tepi ’diyi oso pa kalitile vusi dria; te e’yo azini yi nzezu aziasini yo, a’disiku yi ma adripi ’ba Levini ’diyini afa edele yi drinirisi,

¹⁶’Dini azi Yehovani inzizuri dria ovu edezaru o’du nde ’da ma vusi, omu agaza ’ba drilesiri ’bazu, edeta evezaru ’diyi edezu pari edeta edezu Yehova driri ma dria, ekile opi Yosiani azilerile.

¹⁷O’du ’dasi anzi Israelini ndra indi ’daa ’diyi ’ba omu agaza ’ba drilesiri, azini yi mba omu mikate akufi kokoruri ma ta o’du aziri ’dipi.

¹⁸Engazu nabi Samueli ngarerisi ’bani omu agaza jo drilesiri ma azi Israelia ’dileni ku; opi Israelia ’diyi ma azi ’bani vini omu agaza jo drilesiri Yosia pini ’bale ’ba edeta edepi ’diyi pie, ’ba Levini ’diyi pie, ’ba dria Yuda pia Israeli be ovupi ndra indi ’diyi pie, ’ba Yerusalemua ’diyi pie driarile ’dini ku.

¹⁹’Ba ndra omu agaza jo drilesiri eli Yosiani opi nyazu mudri drini aroria.

²⁰E’yo ’diyi ma vutia Yosiani hekalu edezu ’boria, opi Misiriari tu a’di ’ dizu Karikemisia Ufirate ma tia ogogo; Yosia fu di a’di ’dizu eri be.

²¹Te eri epe ojio ma ti eri vu, kini, Amani mi be a’di e’yoni ya, mi opi Yudaari la? Ma emuni andru a’di ’dizu mi be ku fo, te lu a’di ’dizu suru amani ovuzu yi be ari’baruri be a’dule; te Mungu azi mani ’yezu mbele. Mi ku fizu mi drisi la, Munguni ma be, eri kazu mi dri jazu ku.

²²Te ti Yosia leni i mile enze vile eri vusi ku, te eri ’ba i ndu i ma ’di a’di eri be beni, Eri erini e’yo Nekoni ’yole engapi Mungu ma tiliari ku, te emu di a’di ’dizu ani e’bua Megidoa.

²³’Ba osu gbipi ’diyi gbi opi Yosiani ra; opi nga ’yo ati’ba erini ma tia, Emi ’du ma ’doarisi ra; gbi ma onzi ’bo.

²⁴’Dini ati’ba erini ’du eri gari ombani ma aliasi, ’ba eri gari erini iriri ma alia, ji eri Yerusalemua; dra di ra, yi sa eri ma avu pari eri ma a’bipi sazuria. ’Ba dria Yudaa ’diyi pi Yerusalemua ’diyi be ’owu Yosiasi ra.

²⁵Yeremia wu i Yosiani imvo ongosi; ’ba ongo ngopi, agupiru azini okuru ’diyi dria ongo Yosia ma ru candi ongo yinisi kpere andru. ’Ba e’yo ’diyi azitaru Israeli ma eselia, te mi ndre, si yi imvo ongo ma alia.

²⁶Te e’yo Yosiani ’yele ’diyi ma joloko, ’yeta erini onyiru ekile sile buku azita Yehovanirini ma aliarile ’diyi pie,

²⁷’yeta erini, okori pi vileri be, mi ndre, yi ovu sizaru buku opi Israelia ’diyi pini Yudaa ’diyi beria.