Read lugbara 2 Suru Ma E'yo 5 Bible Online

2 Suru Ma E'yo 5 - lugbara bible

2 Suru Ma E'yo 5

¹’Dini azi dria Sulemanini ’yele jo Yehovanisiri de di ira. Te Sulemani eji afa ndra i ati Daudini ’bale ndu Mungu dri ’diyi, adaru dahabu pi mele be, afazu imvuru ’diyi pie dria, ofi di yi jo Munguni ma pari lonyi ta mbazu ’diyi ma alia.

²’Di ma vutia Sulemani oku ’ba ’wara Israelini ’diyi pi Yerusalemua, ’ba ambo suruti vusi ’diyi pie dria, yi ’ba opiru ’ba yi ma atapi vile ori’ba ma dri cepi anzi Israelini ma eselia ’diyi, sanduku aziza Yehovanirini ofuzu aku Daudini Zioniasi ejizu uru,

³Agupi Israelini oku yi dria, emu, opi vu omu amboru mba azirisiria.

⁴’Ba ’wara Israelini ’diyi eca dria ra, ’ba Levini nga di sanduku ’du ani.

⁵Yi eji di sanduku pi uru hema ti ecitaniri pie, afazu alatararu dria ovupi Hema ma alia ’diyi pie; ’ba edeta edepi ’ba Levini ’diyi eji yini.

⁶Opi Sulemani ’ba ongulumuru Israelini yi okupi eri vu ’diyi pie dria oso pa sanduku ma drilia, kabilo olizu ti be karakarau, ’bani ecole yi ma kalafe lale ku yini ovule o’birurisi ’diyi.

⁷Atalau edeta edepi ’diyi ofi sanduku aziza Yehovanirini i ma paria, pari e’yo ecezani jo ma aliaria, kpere pari alatararu turi ma alia, adaru kerubi ma opile ma etia.

⁸Te kerubi aja yi ma opile pari sandukuniri ma dria, kerubi nde a’bu sanduku pi ma dri ci, kali erini eri ’duzu ’diyi be.

⁹Te kali ’diyi yi ovu izu ’dipi, ’dini ’ba ovupi sanduku pari e’yo ecezaniri ma driliari ma ageiari eco kali nde ’diyi ma drile nezaru; te ’ba amve ’diyi econi yi nezaru ku; te eri ovu ’dale ecazu kpere andru.

¹⁰Afa azini sanduku nde ma alia yo, pe kiri oni ’bararu iri Musani o’bale alenia Horebua, pari Yehovani aziza azizu anzi Israelini ’diyi be yini efuria angu Misiriasiria ’diyi.

¹¹Te eri nga di eca ’dini, ’ba edeta edepi ’diyi ka efu pari alatararuriasi ’bo (te etu ’dasi kuhani ndra indi ’diyi dria ’ba ndra yi alaru, yi mbani amuti yi ma azi awazuri ma ta ku;

¹²azini indi ’ba Levini ndra ongo ngopi ’diyi dria, Asafu pi, Hemani pie, Yedutuni pie, yi ma anzipi pie, adripi pie, su bongo mile be nyiriru yi ma ruaa, o’du aya cole co ’diyi pi, o’di zaburi ngozu ’diyi pie, o’di azini be yi ma dria, oso pa pari edeta edezuri ma kala etuni efurialeruria, ’ba edeta edepi ’diyi oso pa turu alu drini kali iri yi be ’daa indi guka vuzu);

¹³te eri nga di eca ’dini, ’ba guka vupi ’diyi ongo ngopi ’diyi pie ka ongo ngo tualu ekile ’ba alule, ka o’duko alu fe erizaru yini Yehova ma ru inziria, awa’difo feria indi, yi ka yi ma o’duko enga uru guka piyisi, aya cole co ’diyi pie, o’di ongo ngozu ’diyi pie, ka Yehovani inzi kini, Eri onyiru, yiki erinirini ovule ’dani ’danirisi, ka’dini etu ’dasi iriti nga di ga jo ma alia tre, ada jo Yehovaniri,

¹⁴’dini iriti ndesi ’ba edeta edepi ’diyi econi pa sozaru azi ngazu ku; a’disiku diza Yehovani erini gale jo Munguniri ma alia trerisi.