Read lugbara 2 Suru Ma E'yo 6 Bible Online

2 Suru Ma E'yo 6 - lugbara bible

2 Suru Ma E'yo 6

¹Sulemani ’yo kini, Yehova ’yo ra kini i nga adri ini inicici idururi ma alia.

²Te di ma si mi dri jo mini adrizu aleniari ’jo, pari mini ngazu rizu ’dani ’daniri.

³Vutinia upi oja i mile, eri fe asi ndriza ’ba ongulumuru Israelini ’diyi dri dria, te ’ba ongulumuru Israelini ’diyi dria nga pa so urulesi ra.

⁴Eri ’yo ra, Yehova Mungu Israeliniri ma ovu inzizaru; eri ’yo ndra i ma tisi ma ati Daudi ma tia, te o’du andrurisi eri ma dri fe e’yo nde ma ’ye i ndra ini ’yolerile, kini,

⁵Engazu o’du mani ’ba mani ofuzu angu Misiriasirisi, ma peni aku amboru aluni suruti dria Israelini ’diyi ma eselia, ma dri jo sizu ma runi adrizu alenia aniri ku; ma peni vini ndra ’ba azini ovuzu opiru ’ba mani Israelini ma drilia aluni ku.

⁶Te ma pe Yerusalemuni ra, ma ru ma ovu alenia ’daa beni, te ma pe ndra Daudini ovuzu opiru ’ba mani Israelini ma drilia’i.

⁷Eri ovu ndra ’ ma ati Daudi ma asia jo sizu Yehova Mungu Israeliniri ma rusi.

⁸Te Yehova ’yo ma ati Daudi ma tia, Te eri ovu ndra mi asia jo sizu ma rusi ra ’bo, azini mi ’ye onyiru e’yo egazu ’dinile mi asia;

⁹te ti, mi ngani jo nderi si mi’ini ku, te mvi mini efupi mi aliari nga jo nde si ma rusini.

¹⁰Curu’do Yehova ’ye e’yo erini ’yole ’bori ra; te ma enga ma ati Daudi ma paria, rizu oguna Israeliniri ma dria, ekile Yehovani azilerile, ma si jo nde Yehova Mungu Israeliniri ma rusi ’bo.

¹¹’Dale ma ’ba sanduku, ovupi aziza Yehovani erini ndra azile anzi Israelini beri be alenia ciri.

¹²Eri so pa pari edeta edezu Yehovaniri ma drilia, ’ba ongulumuru Israelini dria ma milia, eri aja i ma dri indi.

¹³(De Sulemani ede apa pa sozuri molasi, oconi wuale towi, walani vini wuale towi, izuni wuale na, i’di di eri irii dria agadua biri, so di pa drinia, osi kumuti va ’ba ongulumuru Israelini ma drilia dria, nga i dri aja uru ’bualeru;)

¹⁴te eri ’yo ra, Yehova la, Mungu Israeliniri, Mungu azini mileni yo kani ’bua kani nyakua; mi mba aziza mini ma ta yiki ale berisi ati’ba mini acipi mi drilia yi ma asi driasi ’diyi vu;

¹⁵mi mba e’yo mini ’yole mira Daudi ati’bo mini ma ati ma tiari ma ta eri vu; adaru mi ’yo ndra mi tisi, mi fe mi drisi e’yo nde ma ’ye i trotro, ekile erini ovule andrurile.

¹⁶Ka’dini curu’do, Yehova Mungu Israeliniri la, mi mba di e’yo mini azile ati’bo mini ma ati Daudi vuri ma ta fo, ’yozu kini, ’Ba mini ngani ece ma milia rizu oguna Israeliniri ma dria ku, anzi mini ka acita yini ma ta mba, acizu azita mani alia ekile mini acile ma drilia ’borile.

¹⁷Te curu’do, Yehova Mungu Israeliniri la, mi fe di e’yo mini ’yole ndra ati’bo mini Daudi ma tiari ma eca adaru ekile mini ’yolerile.

¹⁸Te Munguni nga adri ’ba be nyakua ada ya? Mi ndre, ’bu pi ’bu ’buniri be yi funi dri mini ovuzu alenia ku; ka’dini jo mani sile ’dori nga eco mi dri ngoni ngoni ya!

¹⁹Te ti, mi a’i zita ati’bo minini zileri matu ’baza erini be, Yehova Mungu mani la, wuta mani wule mi vuri erizu zita ati’bo minirini zile mi driliari be;

²⁰mi mile ma ovu di zizaru mgbo jo ’dori vu ani etusi inisi dria, adaru pari nde mini e’yoni ’yole kini mi nga mi ru ’ba ’daari vu, mi ma eri zita ati’bo minirini ngale zile erini mile ’baria pari ’dori vuri.

²¹Mi eri matu ’baza ati’bo minirini ’ba mini Israelini indi, yi ka zita zi mile ’baria pari ’dori ’vu; adaru, mi eri pari mini ovuzuri ma alia ’bua; te mini eriria mi wu onzini indi fo!

²²’Ba ka onzi ’ye ’ba i ma jo ejeliari vu, yi ka fe eri ma so oyo, eci ka emu oyo sozu pari mini edeta edezuri ma drilia jo ’dori ma alia,

²³etu nderisi mi eri ’bua, mi ’ye, mi li ati’ba mini ma e’yo, e’yo onzi ofezu ’ba onziri dri geri erini omvizu be eri ma ngulupi dria, azini ’ba kililiruri e’dazu ’ba kililiru, eri ofezu onyi erini vusi.

²⁴Te ’ba mini Israelini ’diyi ka nga ovu ’bazaru va juru ma palaa, yini e’yo onzi ’yele mi vurisi, yi ka nga yi oja dika mi vu, ka nga ru mini e’da, zizu azini matu ’bazu mi drilia jo ’dori ma alia;

²⁵ka’dini mi di ma eri ’bua, mi wu e’yo onzi ’ba mini Israelini, mi omvi yi dika angu mini ndra fele yi dri azini yi ma a’bipi driria.

²⁶’Bu ka nga ozoo obe ci, ozoo ka ’di ku yini e’yo onzi ’yele mi vurisi, yi ka nga mi zi mile ’bazu pari ’dori vu, ka nga ru mini e’da, ka e’yo onzi yini ku, ewu mini yi dri candi fezurisi,

²⁷ka’dini mi di ma eri ’bua, mi wu e’yo onzi ati’ba minini azini ’ba mini Israelini ’diyini be, pari mini yi imbazu, yi dri geri onyiru ecezu yi ma aci alenia aniria, mi pe ozoo ti angu mini fele ’ba mini dri awuafaruri ma dria.

²⁸Liki amboru ka ’de angua, kani azo muani, kani oli aciru afani ’wizuri, kani afani mazu ozoosiri, kani ombi, kani o’doa; kani juru yini kal yi ace angu aku yiniria, dra ngoni ngori kani azo ngoni ngori ka ovu ra;

²⁹’ba alu, kani ’ba mini Israelini dria, ’ba alu alu yini dra onzi yi ma ngulupini azini candi yi ma ngulupini niria, yini zita ngoni ngori ziria, kani matu ngoni ngori ’baria, yini dri yini ajaria jo ’dori vu;

³⁰ka’dini mi eri ’bua pari mini adrizuria, mi wu onzi, mi ofe ’ba dri alu alu mini yi ma asi nile ’diyi, acita yini vusi (a’disiku mi’i, mi a’dule ni anzi ’bani ma asi ra);

³¹’dini yi ma ru mi, acizu geri mini ma alia, o’du dria yini adrizu angu mini fele a’bi amani driri ma alia ’diyisi.

³²Indi vini ani’bo ovupi ’ba mini Israelini kuri ma e’yosi, eri ka nga emu engazu angu ziria ru mini amboruri pi ma e’yosi, dri mini okporuri pie, wu ejuza miniri pie, yi ka nga emu ra zita zizu mile ’bazu jo ’dori vu,

³³etu ndesi mi eri ’bua pari mini adrizuria, mi ’ye e’yo dria ekile ani’bo nderini wule mi vurile; suru wudrikuruni dria ma ni ru mini ani, ma ru mi ekile ’ba mini Israelini mi rulerile beni, ’dini yi ma ni ani kini omve jo mani sile ’dori mi rusi.

³⁴’Ba mini ka nga fu omba ’bazu juru yini be, geri ngoni ngori mini yi ti pezurisi, yi ka nga zi mi tia mile i yini ’bazu aku mini pele ’dori vu, azini jo mani sile mi rusiri vu indi,

³⁵etu ndesi mi eri zita yini engazu ’bua, matu ’baza yini be, mi fe e’yo yini ma so pa kililiru ani.

³⁶Yi ka e’yo onzi ’ye mi vu (te ’ba aluni yo e’yo onzi ’yepi kuri) aoko ka mi nya yi ruaa, mini ani yi fezu juru ma dria, ’dini juru yi nga yi obi jizu ati’baru angu azinia ziri kani ogogo;

³⁷te angu ’bani yi ojizu ovuzu ati’baruria yi ka nga ega yi ma asia, yi ojazu dika, matu ’bazu mi vu angu ’bani yi ojizu ovuzu ati’baruri ma alia, ’yozu kini, Ama eza ra, ama ’ye e’yo pirimasi, ama ’ye onzi;

³⁸yi ka nga emvi mi vu yi ma asi driasi azini yi ma orindi driasi indi, angu yini ovuzu ati’baruria, pari andra ’bani yi jizu ati’baruria, yi ka nga zita zi mile yini ’bazu yi vile angu mini fele a’bi yini driri vu, azini aku mini pele ’bori vu, azini jo mani sile mi rusiri vu indi,

³⁹ka’dini mi eri ’bua, ada pari mini adrizuri ma alia, mi eri zita yini matu ’baza yini be, mi fe e’yo yini ma so pa kililiru, mi wu e’yo onzi ’ba mini e’yo onzi ’yepi mi vu ’bo ’diyini ra.

⁴⁰Curu’do, Mungu mani la, ma zi mi tia, mi fe mi mile ma ovu zizaru mgbo, mi ega mi bile zita ’bani mi zizu angu ’doriari erizu.

⁴¹Ka’dini curu’do mi enga, Yehova Mungu la, fizu pari mini ava lizuri ma alia, mi’i, sanduku okpo minirini be. Mi fe ’ba mini edeta edepi ’diyi ma su pata yi ruaa, Yehova Mungu la, mi fe ’ba alatararu mini ’diyi ma ovu ayikosi onyi ma alia.

⁴²Yehova Mungu la, mi oja ’ba mini odu osule driniari ma mile kalaa ku! Mi ega dika yiki ati’bo mini Daudi vuri fo!