Read lugbara 2 Suru Ma E'yo 7 Bible Online

2 Suru Ma E'yo 7 - lugbara bible

2 Suru Ma E'yo 7

¹Te Sulemani ka de zita zizu ’bo, aci esi va engazu ’buarisi, ve di edeta vezaru ’diyi pi anyapa olile edetaru ’diyi be; te diza Yehovani ga jo ma alia tre.

²’Ba kuhaniru ’diyi econi ani fizaru jo Yehovaniria ku, diza Yehovanirini gale jo Yehovani ma alia trerisi.

³Anzi Israelini dria lu ’dani, ndre acini esiria va engazu ’buarisi ra, azini diza Yehovanirini ovuria jo ma dria; yi nga ani avu va, yi andreti ’bazu va nyakua, irii edele oni otizarusiri ma dria, yi inzi awa’difo fezu Yehova dri, ’yozu kini, Te eri ovu onyiru, azini yiki eriniri ovu ’ dani ’ dani.

⁴’Dini opi pi tualu ’ba be dria yi ofe edeta Yehova ma drilia.

⁵Opi Sulemani fe ti alifu kali iri drini iri, azini kabilo alifu turu alu drini kali iri, edetaru. ’Dini opi pi tualu ’ba dria be fe jo nderi Mungu dri.

⁶’Ba kuhaniru ’diyi oso pa, azi yini ’yele ’diyi vusi; anzi Levini ’diyi oso pa indi, o’di ’bani ongo ngozu Yehova dri ’diyi be yi ma dria, ndra opi Daudini edele awa’difo fezu Yehova dri-yiki erinirini ovule ’dani ’danirisi-’diyi, Daudini ndra Mungu inziria afa nde ’diyisi; ’ba edeta edepi ’diyi vu guka yi ma drilia; ’ba Israelini dria oso pa ani uru.

⁷Azini indi Sulemani ’ba irii jo Yehovani driliari ma esele agaduari alatararu, a’disiku pari nderia ’daa eri fe edeta vezaru ’diyi pi oso edeta asi anzuru ’diyiniri be; eri ’ye ’dini a’disiku pari molaru edeta edezu ndra Sulemanini edelerini ovule wererisi, econi dri fu edeta vezaru piyi o’bazu drinia ku, edeta ede edepi anyafurasiri pie, oso pie.

⁸’Dini ewu nderisi Sulemani pi. Israeli be dria ’ba omu o’du aziri; ongulumu kakau ’diyi enga ango dri dria engazu pari ’bani adrizu fizu Hamatiaria cazu kpere Yi Ara Misirinia.

⁹O’du arorisi yi oku yi tualu okuza inzizarurisi; a’disiku yi oku yi tualu okuza pari edeta edezu fezu Mungu driria o’du aziri, ’ba vini omu indi o’du aziri drinia.

¹⁰Mba aziri ma o’du kali iri drini nasi eri fe ’ba nde dri geri mvizu hema yiniria, de yi ayikosi azini nyonasi asi yini ma alia, onyi Yehovani ecele Daudi pi dri, Sulemani pie, ’ba erini Israelini ’diyi pie ’borisi.

¹¹’Dini Sulemani de di jo Yehovaniri sizu ra, jo opiniri be indi afa dria Sulemanini egale i ma asia edezu jo Yehovani ma alia jo i vileri be, eri ’ye e’yo nderi onyiru drilebaru.

¹²Te Yehova nga i e’da Sulemani dri inisi, nga ’yo tinia kini, Ma eri zita mini ’be, ma pe pari ’dori ma ngulupisi ovuzu jo edeta edezuriru.

¹³Ma ka ’bu ma ti opi ci, ozoo ma ’di ku ani beni, kani ma ka ombi azi emuzu afa angu ndea ’diyi onyazu, kani ma Ita azo muani ma ti epe ’ba mani ’diyi ma eselia,

¹⁴’ba mani ovupi omvezaru ru manisi ’diyi ka yi do e’yere afukokoru, zita zizu, ma mile gazu, azini yi asi ojazu geri yini onziri kuzu, ka’dinile ma nga yi eri engazu ’bua, ma nga ezata yini wu ra, ma nga angu yiniri ma dra ati indi.

¹⁵Te curui ’do ma mileni nga ovu zizaru mgboru, ma nga ma bile ega, zita zile pari i ’doriari ma e’yo erizu.

¹⁶A’disiku ma pe jo ’dori eri ’bazu alatararu ’bo, fezu ma runi adrizu alenia ’dani ’dani; ma mileni azini ma asini nga ovu ’daa ’dani ’dani.

¹⁷Te mi’i, mi ka nga aci ma drilia ekile mi ati Daudini acilerile, ’yezu dria ekile mani azita fele mi dririle, e’yo mani azile ’diyi ma ta mbazu, e’yo liza mani be,

¹⁸ka’dini ma nga fe oguna opi nyaza minirini ma so pa ’dani ’dani, ekile mani ndra azile mi ati Daudi tiarile, ’yozu kini, ’Ba mini ngani ece ovuzu ’ba dri cepiriru Israeli ma drilia aluni ku.

¹⁹Te emi ka emi oja e’yo mani azile ’diyi kuzu azita mani be, mani o’bale emi drilia ’diyi, azini emi ka nga mu azi ngazu Mungu azini ’diyi dri yi inzizu,

²⁰ka’dini ma nga yi onze kpere olasi angu mani, mani fele yi dririasira; azini jo ’dori, mani ’bale alatararu ma rusiri, ma nga eri ’be ma miliarisi ra, te ma nga eri ’ba ovuzu e’yo o’dukoru, azini ajidimaru suruti dria ma eselia ani beni.

²¹Azini jo ’dori indi, ka ovu izu ngopi ti, ’ba dria alu alu ngapi agapi kalanisiri nga osu osu, yi nga ’yo ani, Yehova ’ye angu ’dori ’doni, azini jo ’dori ’doni, a’di e’yosi ya?

²²Te yi nga e’yo omvi kini, A’disiku yi ku Yehova Mungu yi ma a’bipiniri ra, andra yi ofupi angu Misiriniasiri, yi obi yi Mungu azini vu yi inzizu, azi ngazu yi dri; e’yo ’disi eji di ocoko ’diyi dria yi ma ruaa ani.