Read lugbara 2 Suru Ma E'yo 8 Bible Online

2 Suru Ma E'yo 8 - lugbara bible

2 Suru Ma E'yo 8

¹Te eri nga eca ’dini eli kali irini agaria ’boria, ewu Sulemanini jo sizu Yehova dri azini i ma ngulupi dri ’borisi,

²Sulemani si aku andra Huramuni fele Sulemani dri ’diyi, fe anzi Israelini ma ovu alenia ’daa.

³Te Sulemani nga mu Hamatizobaa, nga eri nde ombasi ra.

⁴Eri nga di Tadimorini si angu roko driaria, aku dria afa ta mbazu ’diyi be, erini sile Hamatia ’diyi.

⁵Azini indi si Beti-horoni uruleruri pi, Beti-horoni valeruri be, to kali yi ageia ci, abi kaliru ’diyi pie, kalitile pie, katala yi ecizu ’diyi pie dria.

⁶Baalati pi, aku dria afa ta mbazu Sulemanini ovuzu yi be ’diyi pie, aku dria erini gari ombani ta mbazu ’diyi pie, aku ’ba erini nzupi akanyasi ’diyini pie, jo dria Sulemanini lele sile ayiko fezu i dri Yerusalemua ’diyi pie, Lebanonia ’diyi pie, angu dria opi nyaza erini ma alia ’diyi pie dria.

⁷Azini ’ba dria acepi ’ba Hitini ’diyi pi ma eselia, ’ba Amorini pie, ’ba Perizini pie, ’ba Hivini pie, ’ba Yebusini pie, ovupi ndra Israeliru ku ’diyi,

⁸’ba nde ’diyi ma anzipi, yini kule yi vutia angu nde ma alia, anzi Israelini ofule ku ’diyi, Sulemani oku yi okposi azi ngazu ati’baru, yi nga ovu ’dini ecazu kpere andru.

⁹Te Sulemani ’bani anzi Israelini ’diyi ma azi ati’baru azi iniri ngazu aluni ku; te eri ’ba yi ’ba a’di ’dipi ’diyiru, azini opi amboru ’ba a’dini ’diyi dri cepi ’diyiru, azini ’ba gari ombani ma driliariru, azini ’ba nzupi akanya dria ’diyi ma driliariru indi.

¹⁰’Ba ’diyi dria ’ba amboru ’ba dri cepiriru opi Sulemanini ’diyi, yi ’ba turu iri drini kali towi, ovupi opiru ’ba ma drilia ’diyi.

¹¹Te Sulemani nga Farau zini eji uru engazu aku Daudiniria, eri ofizu jo erini sile eri driria, a’disiku eri ’yo ani ’dinile, kini, oku mani ngani ovu Daudi opi Israeliniri ma joa ku, a’disikuniri pari sanduku Yehovanirini ecazu yi vu ’bo ’diyini ovule alatararurisi.

¹²Vutinia Sulemani fe edeta vezaru Yehova dri, pari edeta edezu Yehovani erini edele jobileko ma drilialeruri ma dria,

¹³ekile azi o’du alu alu vusirini lelerile, edeta fezu ekile Musani ndra azilerile o’du sabatoni vusi, o’du mba o’dirurini vusi, o’du omu azile paleko na eli vusi ’diyini vusi-ada omu nde yi ’diyi: omu mikate nyale akufi kokoruri pi, omu sabato ’diyiniri pi, omu nyale borokoari pie.

¹⁴Eri azi amuti ’ba edeta edepi ’diyini azi yini inzitaniri ngazu ekile Daudi eri ma atini azilerile, anzi Levini ’diyi pie azi yini vusi Mungu inzizu azini azi ngazu ’ba edeta edepi ’diyi ma drilia, ekile azi o’du alu aluni lelerile, ’ba lotile agei tepi amuti yini vusi kalitile alu alua ’diyi pie dria; Daudi ’ba Mungunirini ndra azile ’dinilerisi,

¹⁵Azini yi kuni ani azita opini azile ’ba edeta edepi ’diyi pi dri, ’ba Levini be, e’yo azinisi aluni ku, kani lonyi ma e’yosi ku indi.

¹⁶’Dini azi dria Sulemanini ovu ’di edezaru engazu o’du erini e’dozu jo Yehovani ma eti sizurisi kpere azi nderini i dezuria, Ka’dini jo Yehovaniri de di i ’yeke kilili.

¹⁷Vutinia Sulemani nga mu Ezioni-geberia azini Eloti ovupi yi kutia angu Edomuniaria.

¹⁸Te Huramu nga oguru ma ti ope eri vu, ati’ba ini ma driarisi, ati’ba miri ma e’yo nipi ra ’diyi pie, yi nga dria ca tualu ati’ba Sulemanini ’diyi be Ofiria, ’daarisi nga mele onziru turu su drini kali towi e’du, nga yi eji opi Sulemani vu.