Read lugbara Ezira 1 Bible Online

Ezira 1 - lugbara bible

Ezira 1

¹Eli oko Kuro opi amboru Perisiaarini angu nyazurisi, e’yo Yehovani ’yole Yeremia ma tisiri ma ’ye i ’dini ani, Yehova nga di Kuro opi amboruri ma asi enga ’dini azita azizu suru erini ma alia dria, azini eri si e’yo nde ci kini:

²Kuro opi amboru Perisiaari ’yo ’dini: Yehova, Mungu ’buari fe suru dria ovupi nyakua ’diyi ma dri ’bo, azini eri azi ma tia jo sizu i dri Yerusalemu angu Yudaaria.

³’Ba dria emi eselia ovupi ’ba eriniriruri, Mungu erini ma ovu eri be, azini eri ma tu uru Yerusalemu angu Yudaaria, Yehova Mungu Israeliniri ma jo ovupi Yerusalemuari sizu-eri Mungu’i;

⁴’ba ’bani kule jolokoru, angu erini ovuzu ani’boruri ka ovu ngoari ti, ’ba angu erinia ’diyi ma ko eri ma aza dahabu pisi, mele pie, lonyi pie, anyapa pie, azini afa feza ’bani fele avasi jo Munguni ovupi Yerusalemuari ma aza kozu ’diyi be.

⁵O’du ’dasi ’ba suru Yudani ma dri cepi suru Benyaminini be ’diyi enga ra, atalau edeta edepi ’diyi pie, suru ’ba Levini pie, ’ba dria Munguni yi ma asi engale tuzu jo Yehovani sizu Yerusalemua ’diyi;

⁶te ’ba dria ovupi yi ma ageia ’diyii fe yi dri drimbaza, afazu dahaburu piyi fezu yi dri, mele pie, lonyi Pie anyapa pie, afa aje nyapi tu ’diyi pie, drinia afa feza dria ’bani fele avasi ’diyi pie.

⁷Azini opi Kuro ofu afazu dria Yehova vile joni ’diyi, ndra Nebukadinezani jile engazu Yerusalemua, ’bale ndra adrou i vile ma joa ’diyi.

⁸Kuro opi Perisiaari ofu afa ’diyi Mitiredata ’ba silingi ta mbapiri ma drisi, la yi ma kalafe Sesibazari opimva Yudani dri.

⁹Te yi ma kalafe ovu ’di’i: awala meleni kali na, awala dahabuni alifu alu, ni kali iri drini oromi,

¹⁰imvu meleni kali na, imvu dahabuni esele azini ’diyi turu su drini mudri, afazu azini alifu alu be;

¹¹afazu dria meleni azini dahabuni ’diyi ovu alifu towi drini turu su Sesibazarini eji afazu nde ’diyi dria, o’du ’bani ’ba ndra obile ati’boru ’diyi ofuzu engazu angu Babuloniasi, yi ejizu ecazu Yerusalemuarisi.