Read lugbara Ezira 3 Bible Online

Ezira 3 - lugbara bible

Ezira 3

¹Te mba aziri ka eca ra, azini anzi Israelini ovu de aku ambo ’diyia, ’ba oku yi woro tualu ekile ’ba alule Yerusalemua.

²Yesua Yozadaki mvi nga di pa so uru adripi erini atalauru edeta edepi ’diyi be Zerubabeli Sealitieli mvi pie, adripi erini ’diyi pie, yi si pari edeta edezu Mungu Israelini driri, afa veza evezu drinia ani, ekile erini ovule sizaru azita Musa ’ba Mungunirini ma aliarile.

³Yi edre pari edeta edezuri eti dria, ’ba angu ’da ’diyi ma urini yi bile cirisi; azini yi fe afa veza drinia ’daa Yehova dri, afa veza nde yi ve o’biti be azini ondre be indi.

⁴Yi ’ba omu nyale borokoari ’ trotro ekile erini ovule sizarurile, azini yi fe afa vele o’du vusi ’diyi kalafesi, kile azitani ’yolerile, ekile azi yini ngale etu vusi etu vusirile;

⁵vutinia yi fe afa feza vele etu vusi etu vusi ’diyi, azini afa feza mba o’diruni pie, azini afa feza omu dria Yehovani azile tani mbazu alatararu o’du peleri vusi ’diyini pie, afa feza ’ba dria alu aluni lele fele avasi Yehova dri ’diyi pie dria.

⁶Engazu mba aziri ma o’du alurisi yi e’do afa feza vezu Yehova dri. Te de isu yi ’bani ngahekalu Yehovani eti ku.

⁷Yi fe vini silingi ’ba onduouru azi ngapi onisi ’diyi pi dri, ’ba bau edepi ’diyi be; azini yi fe afa nyaza pi afa mvuza pie, odu pie, ’ba Sidonia ’diyi pi dri ’ba Turoa ’diyi be, yi ma eji ani mariopati engazu Lebanoniasi cazu miri tia kpere Yopaa, ekile Kuro opi Perisiaarini a’ile felerile.

⁸Vini efizu jo Munguni Yerusalemuari ma eli iri ma ma iririsi, erubabeli Sealitieli mvi pi, Yesua Yozadaki mvi pie, azini adripi yini ma joloko atalau edeta edepi ’diyiru, azini ’ba Leviniru ’diyi pie, azini ’ba dria ndra ’bani ile ati’boru emupi Yerusalemua ’diyi pie, e’do azi yini ra. Yi ope ’ba Levini ovupi eli be kali iri, kani ’di agapi ra ’diyi, jo Munguni ma azi ndrezu.

⁹Te Yesua pi anzi erini pie, adripi erini pie, azini Kadimieli pi anzi erini pie, anzi Yudani ’diyi, yi so pa ’ba jo Munguni ma azi ngapi ’diyi ndrezu, tualu anzi Henadadini pie, anzi yini pie, azini adripi yini ’ba Levini pie.

¹⁰’Ba hekalu Yehovani sipi ’diyi ka etini e’do si ’bo, yi fe atalau edeta edepi ’diyi ma su bongo yini atalauniri, yi ma so pa guka be, azini ’ba Levini anzi Asafuni ’diyi ma so pa aya coza be, Yehovani inzizu, ekile aziza Daudi opi ’ba Israelinirini azilerile;

¹¹yi alu alu ngo ongo eselesi eselesi, yini awa’difo feria Yehova dri, yini ’yoria, Te eri ovu onyiru, yiki erini ovu Israeli vu ’dani ’dani. ’Ba dria otre o’duko amborusi uru, yi inzi Yehovani, a’disiku yini jo Yehovani ma eti e’dole sile ’borisi,

¹²Te atalau edeta edepi ’diyi kakau, azini ’ba Levini, azini ’ba suru atapini ma dri cepi ’diyi, yi ’ba mbazaru ndra jo okori ndrepi ’diyi, ka jo ’diri ma eti ’ba yi milia ’bo, yi wu o’duko ambosi, te ’ba kakau oyu ayikosi uru indi;

¹³’dini ’ba econi ndra ani iyikiyi ’diri amazaru kani eri o’duko ayikoni kani awuni yani ku, a’disiku ’bani otrele o’duko urusirisi, o’duko nderi ovu ndra erizaru ziri tu.