Read lugbara Ezira 4 Bible Online

Ezira 4 - lugbara bible

Ezira 4

¹Te ari’ba Yuda pini Benyamini be ’diyi ka eri kini anzi ndra ’bani obile jile angu azinia ati’baru ’diyi yi hekalu si Yehova Mungu Israeliniri dri,

²yi osi yi ogogo Zerubabeli vu, azini ’ba suru atapini dri cepi ’diyi vu, ’yo yi tia, Emi fe ama ma si jo nde emi be tualu; amani Mungu eminiri ndale ekile emini ndalerilerisi; ama e’do ndra edeta edezu eri dri e’dozu kpere ewu Esari-hadoni opi Asuriaarinirisi, eri ama ejipi ’doari’i.

³Te Zerubabeli pi, Yesua pie, azini ’ba joloko atapi ma suru dri cepi Israelini ’diyi ’yo yi ma tia, E’yo emini ama be jo sizu Mungu amaniri drini yo; te ama ngulupi nga jo ’diri si Yehova Mungu Israeliniri dri ama’i, ekile Kuro opi Perisiaarini azile ama tiarile.

⁴Ka’dini ’ba angu ndeni ’diyi fe ’ba Yudani ma dri aka aka, azini yi ecandi yi yini jo siria tu,

⁵yi omve ’ba ’ba mile imbapi ’diyi geri ndruzu afa yini lele ’yeleri ma dri jazu, o’du Kuro opi Perisiaarinia dria, kpere Dario opi Perisiaarini e’dozu angu nyazuria.

⁶Ahasueruni angu nyaria, erini e’doria angu nyaria, yi si waraga ’ba ovupi angu Yudaa azini Yerusalemua ’diyi ma ruaa asu suzu.

⁷O’du Aritaserisesinisi, Bisilamu pi Mitiredati pie, Tabeeli pie, azini ’ba joloko eri ma agyiru ’diyi pie, si waraga Ariraserisesi opi Perisiaari vuni; waraga nde yi si sita ’ba Suriaa ’diyinisi, azini Suria tisi.

⁸Rehumu ’ba angu dri cepiri pi, karani Simisai be, yi si waraga Yerusalemuni esuzu opi Aritaserisesi vu ’dinile-

⁹’dini Rehumu ’ba angu dri cepiri pi, karani Simisai pie, azini ’ba joloko yi ma agyiru ’diyi pie, nga di si ani, ’ba Dinani pie, ’ba Afarisatikini pie, ’ba Taripelini pie, ’ba Afarisini pie, ’ba Arikevini pie, ’ba Babulonini pie, ’ba Susanikini pie, ’ba Dehani pie, ’ba Elamuni pie,

¹⁰azini suru joloko Osinapari opi ambo inzile turini ejile ’bale aku amboru Samariaaria, azini angu ma joloko Yi Raza ma tia ’aa’dasiri ma alia ’diyi, azini ’dini ’dini.

¹¹Waraga yini tini pele opi Aritaserisesi vuri ma alia, e’yo sizaniri ’ dini Ama’i ati’ba mini ’ba ovupi Yi Ara ma tia ’aa’dasi ’diyi, ama zi mi ci eli

¹²Opi ma ni ’dini kini ’ba Yahudini engapi mi vu ’diyi emu ama vu Yerusalemua ra. Yi aku lepi fupi opi ma ruaasi amve, aku onzikanyaru tu nderi si’i; yi de abi kaliru ’bo, azini yi ede jo ma eti dika ’bo.

¹³Opi i ma ni di ’dini, kini ’ba ka aku ’diri si de ra, abini ka i de ra, yi ngani musoro ’be ku, kani luwalo, kani silingi afa onzezuri aluni ku indi azini o’du vilerisi e’yoni nga ofu candiru opiyi dri.

¹⁴Te curu’do amani a’i opi vile akuari nyalerisi, ovuni onyiru ku amani drinza opini ndrezu, e’yo ’disi ama pe ’ba ti e’yoni ecezu opi dri ani,

¹⁵’dini ’ba ma nda e’yoni buku ’bani e’yo ovupi ’yezaru o’du mi a’bipini ma alia ’diyi sizuri ma alia. ’Dini mi nga e’yo isu buku nde e’yo sizuri ma alia, azini mi nga ni ani kini, aku ’diri aku lepi fupi opiyi ma ruaasi amve, azini opi piyi ecandipi ’ba angu nyapi ’diyi beri, ’dini engazu drio yi adri opi ma e’yo ga si omba ’bazu. Eza ndra ani aku ’diri e’yo ’disi.

¹⁶Ama ece e’yoni opi dri ’dini, kini aku amboru ’diri ka ovu sizaru ra, azini abini ka i de ra, ka’dini mi ngani angu Yi Ara ma tia ’aa’dasiri nya dika ku.

¹⁷’Dini opi nga di e’yo omvi Rehumu ’ba angu dri cepiri vu, azini Simisai karani vu, azini agyi yini ovupi Samariaa ’diyi vu, azini ’ba angu Yi Ara ma tia ’aa’dasiria ’diyi vu indi: Asi anzuru, azini zita azini ’dinile ’diyi pie.

¹⁸Waraga emini ti epele ma vuri ovu lazaru kililiru ma milia ra.

¹⁹Te ma azi e’yoni, yi nda e’yoni, yi isu ani ’dini kini, aku ’ diri, engazu andra driorisi, enga omba ’bazu opiyi be, fu opiyi ma ruaasi amve, ga azita si ada.

²⁰Isu de opi okporu yi ndra indi angu nyazu Yerusalemua, azini angu Yi Ara ma tia ’aa’dasiri nyazu dria; azini ’ba adri ndra musoro pi fe yi dri, luwalo pie, silingi afa onzezuri pie.

²¹E’yo ’disi emi ma ’ba azitani ’ba nde ’diyi ma ku ani ja beni, ’dini aku amboru ’diri ma ovu sizaru ku ani, kpere mani ngaria azitani ’baria.

²²Emi ndre emi ovu mile be, emi ma ovu ava kokoru e’yo ’dirisi ku; e’yo ’diyi eco te zo amboru candi fezu opiyi dri a’disi ya?

²³’Dini Aritaserisesi ma waraga ma siza aziniri ka ovu lazaru Rehumu pi ma milia Simisai karani pie, azini agyi yini pie ’bo, yi mil mbele Yerusalemua ’ba Yahudini vu yi omi yi okposi afa yini ’yeleri kuzi ja,

²⁴’Dini ’ba nga di jo Munguni ovupi Yerusalemuari ma azi ku ja; ku eri ja cazu eli iri. Dario opi Perisiaa rini angu nyazurisi.