Read lugbara Ezira 7 Bible Online

Ezira 7 - lugbara bible

Ezira 7

¹Te eri nga di eca ’dini afa ’diyi ma vutia, Aritaserisesi opi, Perisiaarini angu nyaria, Ezira Seraya mvi, Azaria mvi, Hilikia mvi,

²Salumu mvi, Zadoki mvi, Ahitubu mvi,

³Amaria mvi, Azaria mvi, Meayoti mvi,

⁴Zerahia mvi, Uzi mvi, Buki mvi,

⁵Abisua mvi, Finehasi mvi, Eleazari mvi, Aroni atalau edeta edepiamboruri ma mvi-

⁶Ezira ’diri enga Babulonia. Te eri ovu karani azita Musani nipi turi, azita nde Yehova Mungu Israelinirini feleniri; te opi a’i zita erini ’diyi dria ra, ekile Yehova Mungu erini ma drini ovule eri ma driarile.

⁷Anzi Israelini azini yi enga eri be indi, atalau edeta edepi ’diyi azini pie, ’ba Levini pie, ’ba ongo ngopi ’diyi pie, ’ba jotile agei tepi ’diyi pie, ’ba Netini pie, yi emu Yerusalemua eli aziri opi Aritaserisesini opi nyazurisi,

⁸Eri emu Yerusalemua mba towisi, eli opini aziri nderi ma alia;

⁹te mba okori ma o’du alurisi eri e’do muzu engazu Babulonia, azini mba towi ma o’du alurisi eri ca Yerusalemua, ekile Mungu erini ma drini ovule eri ma dria onyirurile.

¹⁰Isu de Ezira ’ba i asi ’bo azita Yehovani ndazu azini ’yezu indi, e’yo erini azile ’diyi pi imbazu angu Israeliniria e’yo liza be.

¹¹Waraga Aritaserisesini sile karani Ezira atalau edeta edepiri dririi ma siza aziniri eri ’di’i, Ezira nderi e’yo azita Yehovanini nipiri, e’yo erini azile Israeli vu ’diyi nipiri indi.

¹²Aritaserisesi opi opiniri, Ezira atalau edeta edepi, karani azita Mungu ’buarini nipiri vu, ma zi mi ci ci-, onyiru tu-, azini e’yo azini ’diyi pie.

¹³Ma azi azita ’dini kini, ’Ba Israelini dria, atalau edeta edepi yini ’diyi pie, ’ba Levini pie angu mani nyaleri ma alia, ka le ceni tuzu Yerusalemua, ma tu mi be.

¹⁴A’disiku opi pini mi ti pele ’ba erini aziri e’yo amapi ’diyi berisi, mi ma zi Yuda pi ma e’yo Yerusalemu be, ekile azita Mungu minirini ovupi mi driarini lelerile,

¹⁵azini mi ma ji dahabu pi mele be, opini fele avasi ’ba erini e’yo amapi ’diyi be Mungu Israelini driri, eri’i ovupi Yerusalemuari’i,

¹⁶azini mi ma ji vini dahabu pi mele be dria mini ngale isule angu Babuloniari dria, afa ’bani fele ceni avasi ’diyi be, azini ata atalau edeta edepi ’diyini fele avasi ’diyi be indi, yini fele Mungu yini ma jo Yerusalemuari ma e’yosi ’diyi.

¹⁷Ka’dini mi nga afa ’diyi je ecekokoru silingi ’diyisi: monio piyi, abilo ranyaru pie, kabiloanzi pie, edeta yini anyafurasi ’diyi pie, edeta afa mvuzasi ’diyi pie, mi ma fe yi edetaru pari edeta edezuri ma dria jo Mungu eminirini ovupi Yerusalemuari ma alia.

¹⁸Te dahabu joloko acepi mele berisi, emi ’ye ekile ovupi onyiru emi milia mi adripi berile, ekile Mungu eminirini lelerile.

¹⁹Mazu ’bani fele mi dri inzita Mungu ma joari ma e’yosi ’diyi mi ji yi Mungu Yerusalemuari ma drilia.

²⁰Azini afa dria acepi Mungu mini ma jo ma azi ngazani lele drinia, mini ngale lele fele ’diyi, mi ma fe yi engazu opi vile jo silingi ta mbazuri ma alia.

²¹Azini ma’i, adaru ma’i opi Aritaserisesi, ma azi azita ’ba silingi ta mbapi yi Ara ma tia ’aa’dasi ’diyi dri dria, ’dini: Afa dria Ezira atalau edeta edepi karani azita Mungu ’buarini nipirini a’ile emi tiari, ka ovu ngoniri ti, emi ’ye eri ecekokoru,

²²cazu kpere onzi dahaburu turu alu, kani o’biza anyani turu alu, kani obi patiefi -ma suni turu alu, kani lu’bu amboru oduni turu alu, azini a’i ma ovu fezaru erini lelerile lakokoru.

²³Afa dria Mungu ’buarini azileri ma ovu ’yezaru kilili, jo Mungu ’buariniri ma aza kozu; a’disiku adra ma enga angu opi pini nyale anzi erini beri vu a’disi ya?

²⁴Ama ’yo vini alu mini ra, azita a’ini ’bani musoro pi, luwalo pie, silingi afa onzezuri pie, a’izaru atalau edeta edepi ’diyi pi dri ku, ’ba Levini pie, ’ba ongo ngopi ’diyi pie, ’ba jotile agei tepi ’diyi pie, ’ba Netini pie, kani ati’ba jo Mungunia ’diyi pie dria.

²⁵Te mi’i, Ezira, ondua Mungu minini mi driarisi, mi ope ’ba e’yo lipi ’diyi pi, ’ba e’yo amboru lipi ’diyi be, ngapi ’ba dria Yi Ara ma tia ’aa’dasi ’diyi ma e’yo lipi ’diyi, ’ba dria Mungu mini ma azita nipi ra ’diyi; te mi ma imba ’ba azita nde nipi ku ’diyi indi.

²⁶’Ba Mungu mini ma azita ’yepi azita opini be kuri, ’ba ma li e’yo drinia ecekokoru, kani eri ma dra ra, kani ma dro eri ra, kani ma opa afa erini ra, kani ma ’ba eri arujoa.

²⁷Awa’difo Yehova, Mungu ama atapini vu, erini e’yo ’ dinileri ’bale opi ma asia, jo Yehovani ovupi Yerusalemuari ’bazu ndrizarurisi.

²⁸azini erini asi ndriza fele ma dri opi ma milia, ’ba erini e’yo amapi ’diyi be, azini opianzi okporu opini ’diyi dria ma miliarisi. Ma isu okpo ekile Yehova Mungu maniri ma drini ovule ma driarile, azini ma oku ’ba ambo ambo ’diyi Israeli ma eselia tuzu ma be tualu.