Read lugbara Ezira 8 Bible Online

Ezira 8 - lugbara bible

Ezira 8

¹’Ba suru atapi yinini ma dri cepi ’diyi, azini ’ba tupi ma be engazu Babulonia ewu opi Aritaserisesini angu nyazurisi ’diyi ma a’bi olaza eri ’di’i:

²Engazu anzi Finehasini ’diyi ma eseliari, Gerisomu’i. Anzi Itamarini ’diyi ma eseliari, Danieli’i. Anzi Daudini ’diyi ma eseliari, Hatusi’i,

³anzi Sekaniani ’diyi ma eselia. Engapi anzi Parosini ’diyi ma eseliari Zakaria’i; a’bianzi olaza erini ma alia yi la eri be indi ’ba agupiru ’diyi turu alu kali towi.

⁴Anzi Pahati-moabuni ’diyi ma eseliari, Eliehoenai Zerahia mvi’i; ’ba agupiru ’diyi eri be ruru iri.

⁵Anzi Sekaniani ma eseliari, Yahazieli mvi’i; ’ba agupiru ’diyi eri be turu na.

⁶Anzi Adinini ma eseliari, Ebedi Yonatani mvi’i; ’ba agupiru ’diyi eri be kali towi.

⁷Anzi Elamuni ma eseliari, Yesaya Atalia mvi’i; agupi eri be kali aziri.

⁸Anzi Sefatiani ma eseliari, Zebadia Mikaeli mvi’i; agupi eri be kali aro,

⁹Anzi Yoabuni ma eseliari, Obadia Yehieli mvi’i; agupi eri be turu iri drini mudri drini aro.

¹⁰Anzi Selomitini ma eseliari, Yosifia mvi’i; agupi eri be turu alu kali azia.

¹¹Anzi Bebaini ma eseliari, Zakaria Bebai mvi’i; agupi eri be kali iri drini aro.

¹²Anzi Azigadini ma eseliari, Yohanani Hakatani mvi’i; agupi eri be turu alu drini mudri.

¹³Azini anzi Adonikamuni ecapi vile ’diyi, yi ma ru ’dini: Elifeleti pi, Yeueli pie, Semaya pie; agupi yi be kali azia.

¹⁴Azini anzi Bigivaini ma eselia, Utai pi, Zabudu be; agupi yi be kali aziri.

¹⁵Te ma oku yi tualu yi ara rapi Ahavaari vu, ama te yi be ’daa pale na. Ma one ’ba nde ’diyi, atalau edeta edepi ’diyi be, te ma isuni anzi Levini yi ma eselia aluni ku.

¹⁶’Dini ma pe ’ba ti Eliezeri pi omvezu, Arieli pie, Semaya pie, Elinatani pie, Yaribu pie, Elinatani pie, Natani pie, Zekaria pie, Mesulamu pie, yi ’ba amboru ’diyi; Yoyaribu pi omvezu indi Elinatani be, yi ’ba imbapi ’diyi.

¹⁷Ma nga di yi ma ti pe Ido ’ba ’ba dri cepiri vu pari omvele Kasifiaria; ma olu yi ma tia e’yo yini ngale olule Ido ma tia, adripi erini ’ba Netini pie, pari Kasifiaria ’diyi, ’dini yi ma eji amani ’ba Mungu amaniri ma jo ma azi ngapi ’diyi.

¹⁸Te ekile Mungu amani ma drini ovule ama dria onyirurile, eji ama dri ’ba alu ovupi e’yo vaza beri, eri anzi Mahili Levi Israeli mvi ma mvini ma eseliari, azini Serebia, anzi erini pie, adripi erini pie dria, mudri drini aro.

¹⁹Eji vini Hasabia pi, Yesaya be, anzi Merarini ma eselia, adripi erini pie, anzi yini pie, yi kali iri;

²⁰azini engazu ’ba Netini ma eselia, opi Daudi pini fele opianzi ’diyi be azi ngazu ’ba Levini dri ’diyi, ’ba Netini nde ruru iri kali iri. Yi dria ovu ecezaru rusi rusi.

²¹O’du ’dasi ma oga ’ba dri nyaka nyako si, yi ara Ahava ma tia ’dale, ’dini ama ma ’ba ama afu kokoru Mungu amani ma milia, geri kililiru ndruzu eri vu ama ngulupi dri, anzi nyiri amani ’diyi dri, azini afa dria amani ovuzu yi be ’diyi dri indi.

²²A’disiku eri ovu ma dri drinzaru opini zizu asikari erini azini ’ba erini nzupi akanya dria ’diyisi, emuzu ama aza kozu ari’basi geria; a’disiku ama ’yo ndra opi ma tia ’bo kini, Mungu amaniri ma dri ovu ’ba dria eri ndapi ’diyi ma dria yi aza kozu onyiru, te okpo erini pi adra erini be ovu ’ba dria eri kupi ’diyi ma dria.

²³E’yo ’disi ama ’da nyaka, azini ama ’ba matu Mungu amani vu e’yo ’disi, te eri eri matu ’baza amani ra.

²⁴Etu nderisi ma ope atalau edeta edepi ’diyi ma dri cepi ’diyi ma eselia ’ba mudri drini iri ’diyi ndu: Serebia pi, Hasabia pie, azini adripi yini ma eselia ’ba mudri ovuzu yi be.

²⁵Azini ma o’bi yi ma dria dahabu nde pi, mele pie, afazu ’diyi pie, yi afa feza Mungu amaniri ma jo sizu ’diyi, opi piyini fele, ’ba erini e’yo amapi ’diyi pie, opianzi pie, anzi Israelini dria pari ’daa’diyipie’diyi;

²⁶ma o’biyima dria, ma la onzi dahaburu turu azia drini kali towi, azini afazu dahaburu onzi turu alu, azini onzi meleru turu alu indi,

²⁷azini otekua meleru kali iri, ecopi silingi opi Darioni edeleri alifu alu ’diyi, azini afazu iri edele mola dizaru ndrizarurisi ’diyi, aje be ekile trotro melele.

²⁸Ma nga ’yo yi ma tia, Emi ovu di alatararu Yehova dri, afazu nde ovu di alatararu indi; dahabu pi mele nde be yi ovu afa ’bani fele ceni avasi Yehova Mungu emi atapiniri dri ’diyi.

²⁹Emi ndre, emi mba yi ma ta, kpere emini yi ma nziza o’biria lambo atalau edeta edepi ’diyi pi ma drilia ’ba Levini be ’diyi yi mamilla, opianzi atapi ma suru Israelini ma dri cepi ’diyi be, Yerusalemua jo ale aliza Yehovaniri ma alia.

³⁰’Dini atalau edeta edepi ’diyi, ’ba Levini be, a’i o’biza dahabu pini mele be, afazu pie, yi ejizu Yerusalemua, ngazu ’bazu Mungu amani ma joa.

³¹’Dini ama ku yi ara Ahavani mba okori ma o’du mudri drini irisi muzu Yerusalemua; Mungu amani ma dri ovu ama dria, eri opa ama ari’ba amani piyi dri ’ba ama mbapi geria ’diyi be.

³²Ama nga di eca Yerusalemua ra, ama ovu ’daa pale na.

³³O’du surisi ama o’bi dahabu mele pie jo Mungu amanini ma alia, afazu ’diyi be, Meremoti Uria mvi atalau edeta edepiri dri, de isu Eleazari Finehasi mvi ovu eri be indi, azini Yozabadi Yesua mvi pi ovu yi be, Noadia Binui mvi pie, yi ’ba Levini.

³⁴Ama o’bi afa ’diyi dria kalafe yini vusi, nziza yini vusi indi, te ’ba si nzizani dria etu ’dasi ci.

³⁵Anzi Israelini engapi angu ’bani yi jizu ati’baruria ’diyi, fe edeta vezaru Mungu Israeliniri dri, monio mudri drini iri anzi Israelini driasi, kabilo ranya kali oromi drini azia, kabileanzi kali aziri drini aziri, ndriago mudri drini iri edeta e’yo onzi edezuriru; afa ’diyi dria ’ba fe ndra edeta vezaru Yehova dri.

³⁶Azini yi fe azita opini ’ba opini ’bale angu nyazu ’diyi dri, ambo ’ba dri cepi angu Yi Ara ma tia ’aa’dasiria ’diyi dri indi; ’ba nde ’diyi ko ’ba ma aza ani, jo Munguni be.