Read lugbara Nehemia 13 Bible Online

Nehemia 13 - lugbara bible

Nehemia 13

¹O’du ndesi yi la buku Musania ’ba dria ma bilia; isu alenia e’yo si i ’dini, ’ba Amonini kani ’ba Moabuni ma fi okuza Munguni ma alia ku ’dani ’dani;

²a’disiku yini emule enya be, yi be, dri fuzu anzi Israelini be kurisi, te yi je Balamuni yi dri aruzu, yi trizu,te Mungu amaniri oja triza nderi drilebaru.

³Eri nga eca ’dini, ’ba ka azita ’diri eri ra, yi co ’ba Israelini pi ma esele ’ba ongulumuru jururu ’diyi be.

⁴’Di ma drilia, Eliasibu ’ba edeta edepi, pele jo Munguni ma ale alizari ma driliari, erini i sizu tualu Tobia berisi,

⁵eri ede eri dri jo ale aliza amboru, pari nde ndra yini adrile edeta anyafuraru ’diyi pi o’bazu, obiese pie, afazu pie, anya ma esele alu mudrini ’diyi pie, patiefi ma su pie, odu pie, ’bani adrile fele azitasi ’ba Levini ’diyi dri, ’ba ongo ngopi ’diyi pie, ’ba jotile agei tepi ’diyi pieri; yi adri vini edeta yini e’dule uru ’diyi ’ba ’ba edeta edepi ’diyi dri, jo ale aliza nderi ma alia.

⁶Te ewu ndesi dria ma ovuni ndra Yerusalemua ku, te ma mu opi vu eli kali na drini iri Aritaserisesi opi Babuloniarini opi nyazurisi. Te o’du azini ma vutia ma zi opi tia ma dri geri fezu,

⁷te ma ka eca Yerusalemua ’bo, ma nga di ne onyiru e’yo onzi Eliasibuni ’yele Tobia driri, erini jo ale aliza edele Tobia dri jo Munguni ma irii aliarisi.

⁸E’yo nde fe ma dri candi tu, e’yo ’disi ma o’be afa dria Tobiani ovupi jo nde ma alia ’diyi amve.

⁹Vutinia ma fe azita, re yi nga jo ale aliza nde ’diyi ’ba alaru; te ma nga di afazu jo Munguni vile ’diyi omvi dika, edeta anyafuraru ’diyi pi, obiese be.

¹⁰Te ma ne yi feni ’ba Levini ’diyi dri esele yini ku; e’yo ’disi ma isu ’ba Levini pi ’ba ongo ngopi, azi nde ngapi ’diyi, apa dria alu alu angu ,yinia.

¹¹Te ma nga ani agata ga opiyi be, ’yozu, Ku jo Munguni pirini a’di e’yosi ya? Te ma nga yi oku tualu, ma nga yi o’ba pari yinia.

¹²’Ba Yudaa ’diyi dria nga di anya pi esele alu mudrini ’diyi eji pari afa ta mbazuria, patiefi ma su pie, odu pie.

¹³Ma ’ba ani ’ba azini lonyi ta mbazu pari lonyi ta mbazuria, yi Selemia ’ba edeta edepiri pi, Zadoki ’ba waraga sipiri pie, ’ba Levini ma eselia Pedaya pie, eri ma vutia Hanani, Zakuri Matania mvi ma mvi pie, a’disiku omve yi ’ba kililini; azi yini ’dini, afa awazu adripi yini dri.

¹⁴Mi ma ega ma e’yo ’disi, Mungu mani la, mi ma ini azi onyiru mani ’yele jo Mungu manirini pi ta mbazu inzita aleniari beri ku.

¹⁵Ewu ndesi ma ndre angu Yudania ’ba azini yini ndra patisu zabibuni turia o’du sabatonisi, azini Yi eji anya loza, yi ombe yi akanya dria; yi ’ye patiefi ma susi ’dini indi, zabibuni pie, elio efi pie, afa suruti ndu ndu dria yini ejile Yerusalemua o’du sabatonisi ’diyi pie; te ma nze e’yo yi ma ruaa o’du yini onyoko olezurisi.

¹⁶’Ba Turoni ovu angu ndea indi, ’ba ’diyi adri e’bi eji, afa suruti ndu ndu dria be, yi adri fe je o’du sabatonisi anzi Yudani ’diyi dri, azini yi fe je vini Yerusalemua indi.

¹⁷Etu ’dasi ma ga agata ’ba ’wara Yudani ’diyi be, ma ’yo yi tia, E’yo onzi emini ’yele o’du sabatoni ezazu ’dori ngoni ya?

¹⁸A’bi emini ’yeni ndra ’dini ku ya? Mungu amani ejini ndra ani e’yo onzi ’diyi dria ama dria azini aku ’diri ma dria indi ku ya? Te ti, emi adra azini eji Israeli ma dria, emini o’du sabatoni ezalerisi.

¹⁹Eri nga eca ’dini, anguni ’yeria biria kalitile Yerusalemua o’du sabatoni drilia, ma azi ’ba ma opi kalitile ci, azini ma azi ’ba ma zi kalitile nde ’diyi dika ku de nga sabato deni i ku. Ma ’ba vini ati’ba azini mani ’diyi kalitile ma ta mbazu, yi ma ndre ’ba ma eji afa alenia o’du sabatonisi aluni ku.

²⁰E’yo ’disi ’ba afa ozipi ’diyi, ’ba afa suruti dria olepi ’diyi be, yi te Yerusalemua amve pale alu kani iri.

²¹Ma nga di e’yo eti nze yi ruaa, ma ’yo yi tia, Emi o’a abi kaliru ma kalaa a’disi ya? Emi ka ’ye ’dini dika, ma nga emi obi ci. Engazu o’du ’dasi yi ecani o’du sabatonisi dika ku.

²²Te ma azi ’ba Levini ’diyi dri, yi ma ’ba yi ngulupi rua alaru, yi ma emu kalitile agei te, o’du sabatoni ’bazu alatararu. Mi ega ma e’yo ’dirisi indi fo, Mungu mani la, mi ku e’yo mani yiki mini ambo alerurisi.

²³Ewu nderisi ma ndre vini ’ba Yahudini oku Asidodia ’diyi pi jepi oku yiniru Amonia ’diyi pie, Moabua ’diyi pie;

²⁴te anzi yini ma azi ’yo e’yo Asidodi tisi, te econi ’yozaru Yahudi tisi ku, te ’yo ekile suru alu, ’doyini ’yolerile.

²⁵Ma ga agata yi be, ma tri yi, ma co yi ma azi ’diyi, ma si yi ma dri’bi; ma omi yi oyo sozu Mungu rusi kini, Emi ma fe ezoanzi emini agianzi yini dri okuru ku, emi ma je vini ezoanzi yini agianzi emini dri okuru ku, emi i ngulupi dri ku indi.

²⁶Sulemani opi Israelini ezani ndra e’yo ’diyisi ku ya? Te ka suru kakau ma eselia ti, opi azini erileni yo, azini Mungu eriniri le eri tu, Mungu ’ba eri opiru Israeli dria ma drilia; te di ti, oku jururu ’diyi fe eri dri e’yo onzi ’yezuni.

²⁷Onyiru ama ma eri e’yo emini, e’yo onzi amboru ’dori ’yezu dria, ezata ezazu Mungu amaniri vu, amani oku jururu ’diyi jezu ya?

²⁸Isu de Yehoyada ma anzipi ma eselia, kuhani amboru Eliasibu ma anzipi ma eselia mva alu je ndra Sanibalati ’ba Horoniari ma zini okuru; e’yo ’disi ma dro eri ma vurisi ra.

²⁹Mi ega e’yo yini fo, Mungu mani la, yini azi atalau edeta edepirini ezale, aziza ’ba edeta edepiri pini, ’ba Levini be indirisi.

³⁰Geri ’disi ma ’ba yi alaru e’yo juruni yi eselia ’diyisi dria, ma ope pari ’ba edeta edepi ’diyi pi dri ’ba Levini ’diyi be, ’ba alu alu dria azi yini vusi;

³¹ma ede vini e’yo feta ejani pi, ewu peleri vusi, ori kapi okori pie. Mi ega e’yo mani onyiru fo, Mungu maniri la.