Read lugbara Nehemia 2 Bible Online

Nehemia 2 - lugbara bible

Nehemia 2

¹Te ma ovu ’ba okelea fepi opi driri’i. Eri nga eli eca ’dini mba Nisani ma alia, eli kali iri Aritaserisesini opi nyazurisi, patiefi ma suni ovuria eri ma drilia, ma nga patiefi ma su nde ’du fe opi dri. De isu oku drio ecazu curu’do ma ovuni nga candisi eri ma milia ku.

²Opi nga di ’yo ma tia, Mile mini ovu candisi a’elisi, de isu mi ovuni azoru ku ya? ’Di ovuni e’yo azini ku, kiri candi asini. Ma nga eli ovu urisi tu.

³Ma nga ’yo opi tia, Opi, mi rua ma adri ala ’dani ’dani fo! Ma mileni ovu canelisi ku a’elisi ya, de aku ma a’bipi osazuri ovu andruru, te ve kalitile erini acisi ra?

⁴Opi nga ’yo ma tia, Mi le a’eli zi ya? ’Dini ma zi Mungu ’buari ma tia.

⁵Azini ma ’yo opi ma tia, Eri ka ovu opi ma milia onyiru, azini ati’bo mini ka asi ndriza isu mi milia ’bo, mi pe ma ti Yudaa kpere aku amboru ma a’bipi ma nyadrini ovuzu aleniaria, ’dini ma ma si eri dika ani.

⁶Opi nga ’yo ma tia (oku opinirini de riria eri ma ageia indi), Aci mini nga ovu o’du ngopini ya? Mi nga emvi a’dungare ya? ’Dini eri ovu onyiru opi ma milia ma ti pezu; azini ma la eri dri o’duni.

⁷Ma nga vini ’yo opi ma ria, Eri ka ovu onyiru opi ma milia, ma fe ma dri waraga ’ba amboru ’ba dri cepi ovupi Yi Ara tia ’aa’dasi ’diyi vu, yi ma ku ma ma aga kpere cazu ’Yudaa;

⁸ma fe vini waraga indi Asafu oce opiniri ma agei tepiri vu, leri ma fe pati ma dri, ma ma ede ani bau jo okporu ovupi jo nde ma ageiari ma tileru, ma ma ede vini bau aku nde ma kali abiruri dri, azini jo mani ngazu ovuzu aleniari sizu indio Opi a’i mani ra, ekile dri onyiru Mungu manirini ovule ma driarile.

⁹Vutinia ma eca ’ba amboru Yi Ara tia ’aa’dasi ’diyi vu, ma fe yi dri waraga opini ’diyi. Isu opi pe ’ba asikari ongulumuru dri cepi ’diyi pi ma ti ma be, ’ba tupi akanya dria ’diyi pie tualu,

¹⁰Te Sanibalati ’ba Horoniari pi ka e’yo ’diri eri, ati’bo Tobia ’ba Amoniari be, yi ovuni ayikosi ku ’bani ecale e’yo Israeli anzipini ndazu ’bazu barurisi,

¹¹’Dini ma eca Yerusalemua ra, ma ovu ’dale o’du na,

¹²Te ma Inga enga inisi, ma’i ’ba were azini ’diyi be; te ma eceni ’ba azini tia e’yo Mungu manini ’bale ma asia ’yezu Yerusalemu ma aza kozuri aluni ku. Isu anyapa azini ovuni ma be ku, kiri mani tuzu driniari’i.

¹³Ma fu inisi Kalitile E’buarisi muzu Yi A’di Obalakoniri vuleru cazu kpere Kalitile Okurunya Ofuzuria, ma one abi kaliru Yerusalemuni i asupi vari, azini kalitile evele acisi ’bo ’diyi.

¹⁴Vutinia ma aga cazu Kalitile Yi ’A’diniria azini Yi Alio Opiniria indi; te pari ovuni anyapa mani tuzu driniari dri agazu ku.

¹⁵Ma nga di tu inisi acizu yi tisi, abi kaliru onezu, ma nga di dri da vile fizu Kalitile E’buarisi, emvizu ’dini.

¹⁶’Ba ’wa-ra nini ma mu ngoa ya, kani ma ’ye a’dini yari ku; isu ma eceni nga e’yoni ’ba Yahudini dri ku, ’ba kuhaniru ’diyi pie, ’ba opiru ’diyi pie, ’ba ’ba dri cepi ’diyi pie, ’ba azini azi ’yepi ’diyi pie.

¹⁷Vutinia ma nga ’yo yi tia kini, Emi ndre e’yo amani ovu onzi tu, Yerusalemu ovu andruru, ’ba eve kalitileni acisi ’bo Emi emu, ama ma si abi kaliru Yerusalemuni dika, ama ma ovu drinzasi dika ku ani.

¹⁸Ma nga vini e’yo Mungu mani ma drini ovuzu ma dria onyiruri ece, azini e’yo opini ’yole ma tia ’diyi indio Yi nga ’yo ra, Onyiru ama ma enga, ama ma si. E’yo ’disi yi ma dri mba azi nde onyiru ’diri ’yezu.

¹⁹Te Sanibalati ’ba Horoniari pi ka e’yo nde eri, ati’bo Tobia ’ba Amoniari pie, Gesemu ’ba Arabuari pie, yi ama ogu ogu aparakasi, yi onzo ama indi, yi ’yo ra, Emi ’dini a’di e’yo ’ye ya? Emi le mbu opi ma ruaasi amve ya?

²⁰Etu ’dasi ma omvi e’yo yi tia kini, Mungu ’buari nga drileba fe ama dri, e’yo ’disi ama ati’ba erini ’diyi nga enga, ama nga si; te emi’i, emi ovuni esele be, kani e’yo be, kani afa egata fepiri be Yerusalemua ku.