Read lugbara Nehemia 5 Bible Online

Nehemia 5 - lugbara bible

Nehemia 5

¹Te otreta ambo ’ba ongulumuru ’diyi pini oku yini ’diyi pieri nga efu adripi yini ’ba Yahudini ma dria.

²Yi ma azi ’yo kini, Ama’i, agupianzi amani pie, ezoanzi amani pie, ama ovu kakau; onyiru ama ma isu anya, ’dini ama ma nya alu indi, ama ma ovu idriru ani.

³Yi ma azi ’yo vini kini, Ama nya mari amvu amani pi ofezu tinia’i, amvu zabibuni amani ’diyi pie, jo amani pie, ama ma isu anya liki ma e’yosi ani.

⁴Yi ma azi ’yo vini kini, Ama a’i mari e’yo musoro opinirisi amvu amani pi ofezu tinia’i amvu zabibuni be.

⁵Te curu’do rua amani ovu ekile rua ama adripinile, azini anzi amani ovu anzi yinile; de di ama fe agupianzini ovuzu ati’baru ezoanzi amani ’diyi be, ada ezoanzi amani azini ’diyi ovu ati’baru curu’do; te okpo amani e’yo nderi edezu yo, a’disiku ’ba azi ’diyi ovu amvu amani be, amvu amani zabibuni ’diyi pie.

⁶Ma ka otreta ’ diri eri, e’yo ’yoza ’diyi be, ma ovu ani aokosi tu.

⁷Te ma nga ega ma asia, ma nga di agata ga ’ba opiru ’diyi pi be, ’ba ’ba dri cepi ’diyi be indi, ma nga ’yo yi tia kini, Emi alu alu adripi emini nya ereza be drinia onzi. Ma nga ani okuza omve amboru dri aruzu yi be,

⁸ma nga ’yo yi tia kini, Ama’i, ama onze ama adripi ’ba Yahudini ’bani jele ’ba juru ma eselia ’diyi ’bo ekile amani ecolerile; te emi’i, emi le fe emi adripi ozi, ’dini yi ma fe yi je avi ama dri ya? Te yi adri ciri, isuni e’yo omvizaru aluni ku.

⁹Ma nga ’yo vini kini, E’yo emini ’yeleri ovuni onyiru ku. Emini acizu Mungu amani ma ruzasi, o’data ari’ba amani juruni o’dale ’diyi ma e’yosiri, ovuni onyiru emi milia ku ya?

¹⁰Ma’i ma ’ye ’dinile indi, adripi mani pie, ati’ba mani ’diyi pie, ama adri silingi pi fe anya be yi dri mariru. Te kirikiri ama ma ku ereni ’bazu ’diri ja.

¹¹Ma matu ’ba emi vu, emi ma omvi yi dri andru amvu yini, amvu zabibuni pie, amvu mizeituni pie, jo yini pie, azini emi omvi silingi pi ma esele alu turuni, anya pie, patiefi ma su pie, odu pie, emini nyale yi dri erezasiri.

¹²Te yi nga e’yo omvi kini, Ama nga yi omvi ra, ama ngani afa azini a’i yi vu ku. Ama nga ’ye mini ’yolerile ra. Etu ’dasi ma nga ’ba edeta edepi ’diyi omve, nga fe yi ma so oyo ci yi ma ’ye yini azilerile.

¹³Ma nga vini bongo ma ili driari oya, nga ’yo, Munguni nga ’ba ’yepi ekile aziza ’dorile kuri oya ’dini, engazu jo iniasi, azi iniasi indio Eri ma oya eri ’dini ’di eri ma ovu pirini ani. ’Ba ongulumuru dria nga ’yo, Amena, yi nga di Yehovani linzi. ’Ba nde ’diyi nga ’ye ekile aziza, ’dirile.

¹⁴Engazu ewu ’bani ma pezu ’bazu ambo yi ma drilia angu Yudaarisi, engazu eli nde kali iri opi Aritaserisesini opi nyazurisi cazu eli kali na drini iriri vu, dria eli mudri drini iri, ama ma adripi be ama nyani nyaka amboniri ku.

¹⁵Te ambo ma drilia oko ’diyi adri ndra e’yo nzizaru ’ba ’ba nde ’diyi dria, yi adri enya pi ’du yi ma dria patiefi ma su be, azini drinia sekeli dahabuni kali suo Ati’ba yini ovu vini ekile opile ’ba ongulumuru ma drilia. Te ma’i, ma ’yeni ’dini ku, mani Mungu rulerisi.

¹⁶Ma ebi ma azi abi kaliru sizuri ’yezu indi, azini ama jeni angu azini ku; ati’ba mani dria oku yi ’dia azi ndea.

¹⁷Te ’ba Yahudini, ’ba ’ba dri cepi ’diyi be turu alu drini kali towi, yi adri nyaka nya mesa mani ma tia, azini ’ba engapi ’ba jururu ama ageia ’diyi ma eselia ecapi ama vu ’diyi adri nya indi.

¹⁸Nyaka ’bani adrile edele o’du vusiri ovu ’dini, ti alu, kabilo onyiru azia ’diyi pie; azini ’ba a’di ma dri a’u piyi indi, azini pale alu alu o’du mudri mudri eselia patiefi ma su suruti ndu ndu dria; te e’yo ’diyi ma eselia dria ti, ma azini ’bani nyaka amboniri fezu ma dri ku, a’disiku ovuzu ati’baruri ovu ’ba nde ’diyi dri nzizaru.

¹⁹Mungu mani la, mi ma ega e’yo mani onyiru, e’yo dria mani ’yele ’ba ’diyi vuri indi fo.