Read lugbara Nehemia 8 Bible Online

Nehemia 8 - lugbara bible

Nehemia 8

¹Mba azirini egaria, Israeli anziyi ovu aku yini ’diyi ma alia. Te ’ba dria oku yi tualu ekile ’ba alule, irii Kalitile Yiari ma driliaria; te yi ’yo Ezira ’ba waraga sipiri ma tia eri ma eji buku azita Musani, Yehovani ndra azile Israeli driri.

²Mba aziri ma o’du alusi kuhani Ezira nga buku azitaniri eji ’ba ongulumuru ma milia, agupi pi oku pie, ’ba dria ecopi e’yo eripi e’yo vaza be ’diyi pie.

³Eri nga e’yo ovupi aleniari la, irii Kalitile Yiari ma driliaria, engazu o’bitisi cazu etu agaa birri, agupi pi ma drilia okuyi pie, ’ba dria ecopi e’yo vapi ’diyi pie; ’ba dria co yi ma bile buku azitaniri erizu.

⁴Te Ezira ’ba waraga sipiri so pa pari e’yo oluzu edele patisi, ’bani edele pila azi ’ dirisiri ma dria; ’ba eri ma ageia ’diyi yi ’di: Matitia pi, Sema pie, Anaya pie, Uria pie, Hilikia pie, Maaseya pie, yi so pa eri ma dri ndiria; pa sopi eri ma dri ejia ’diyi yi ’di: Pedaya pi, Misaeli pie, Malikiya pie, Hasumu pie, Hasibadani pie, Zekaria pie, Mesulamu pie.

⁵Ezira nga di buku zi ’ba dria ma milia, te eri so pa ’ba dria ma drilia uru; te eri ka eri zi ra, ’ba dria so pa uru.

⁶Te Ezira inzi Yehova Mungu amboruri; te ’ba dria nga ’yo kini, Amena, Amena, yini dri ejuria uru; te yi nga yi dri elu va Yehovani inzizu, mile suza be va nyakua.

⁷Te Yesua pi nga yi dri e’yo ece yini vazu, Bani pie, Serebia pie, Yamini pie, Akubu pie’i Sabetai pie, Hodia pie, Maaseya pie, Kelita pie, Azaria pie, Yozabadi pie, Hanani pie, Pelaya pie, ’ba Levini ’diyi pie; ’ba ongulumuru nga pa so yi ma paria.

⁸Te yi la bukua azita Munguni kilili; yi ece efini indi, ’dini ’ba nde ’diyi va e’yo yini lale ’diyi ra.

⁹Te Nehemia omvele Tirisatari, kuhani Ezira ’ba waraga sipiri pie, ’ba Levini ’ba ongulumuru imbapi ’diyi pie, yi ’yo ’ba dria tia kini, O’du ’dori ovu alatararu Yehova Mungu eminiri driri; emi ma ovu candisi ku, emi ma wu ku. A’disiku ’ba dria yi wu yini e’yo azita ma alia ’diyi ema.

¹⁰Eri nga di ’yo yi tia, Emi ma mu emini mu mu, emi nya afa osoru, emi mvu afa aluzaru, emi pe nyaka emini ma esele ma ti ’ba nyaka koko ’diyi dri; te o’du ’dori ovu alatararu Opi amani dri; emi ma ovu candisi ku, a’disiku ayiko Yehovanirini ovule okpo eminirisi.

¹¹’Dini ’ba Levini ’diyi yi omi ’ba ongulumuru ’diyi ma asi ovuzu ciri, ’yozu kini, Emi ma ovu ciri, o’du andrurini ovule alatararurisi; emi ma ovu candisi ku indi.

¹²Azini ’ba ongulumuru dria mu yi parisi nyaka nyazu, afa mvuzu, afa esele fezu, ayiko ’bazu amboru ani, yini e’yo ’bani olule yi tiari vale rarisi.

¹³O’du irisi ’ba ’wara ori’ba dria dri cepi ’diyi pi, ’ba edeta edepi ’diyi pie, ’ba Levini pie, yi oku yi Ezira ’ba waraga sipiri vu bile cozu e’yo ’yoza azitani ’diyi erizu ani.

¹⁴Te yi isu e’yo sizaru azita ma alia kini, Yehova azi ndra azita Musa ma tisi kini, anzi Israelini ma adri boroko ma alia omu amboru mba azirisirisi,

¹⁵azini kini yi ma olu e’yo, ma eku e’yo nderi aku amboru yini vusi dria, azini Yerusalemua indi kini, Emi efu mu oni dria, emi cii pati arakala mizeituni pi, mizeitu asearini pie, icifi malaruni pie, ituni pie, pati arakala be treri ma arakala pie, boroko sizu ekile ovupi sizarurile.

¹⁶’Dini ’ba ongulumuru nga efu ra, nga yi eji boroko sizu yi dri, ’ba dria alu alu jo yini ma dri senderuria, azini irii yinia, azini jo Munguni ma iriia indi, azini angu walaru Kalitile Yiari vuleruria, azini angu walaru Kalitile Efiraimuniri vuleruria indi.

¹⁷’Ba ongulumuru dria efupi pari ndra yini ovuzu ati’baruriasi ’diyi yi nga boroko si, nga adri boroko nde ’diyi ma alia; te engazu ewu Yesua Nuni mvini ovuzurisi cazu o’du ’dasi Israeli anziyi ’yeni ’dini ku. Te ayiko amboru tu indio

¹⁸Etu vusi etu vusi engazu o’duni e’doria kpere asiria, eri la bukua azita Munguni. Yi ’ba omu nde o’du vu aziri; o’du arorisi yi ’ba okuza alatararu ekile azitani ’yolerile.