Read lugbara Nehemia 9 Bible Online

Nehemia 9 - lugbara bible

Nehemia 9

¹Te mba nde ma o’du kali iri drini susi anzi Israelini oku yi, yi ’da nyaka, su koliba yi ma ruaa, omvu nyaku yi ma dria indi.

²Te ori’ba Israelini nga yi ma esele co ’ba jururu ’diyi be dria, nga pa so ezata yini e’dazu, e’yo onzi yi ma atipini ’diyi be.

³Te yi nga pa so pari yinia, nga la bukua azita Yehova Mungu yinirini, etu alu ma esele a’jo narisi; engazu etu alu ma a’jo narisi cazu etu dria bini yi e’da e’yo onzi yini, yi inzi Yehova Mungu yiniri indi.

⁴Etu ’dasi Yesua pi nga pa so pari ’ba Levini tuzu ururia Bani pie, Kadimieli pie, Sebania pie, Buni pie, Serebia pie, Bani pie, Cenani pie; yi nga owu o’duko urusi Yehova Mungu yiniri vu.

⁵Vutinia ’ba Levini, Yesua pi, Kadimieli pie, Bani pie, Hasabineya pie, Serebia pie, Hodia pie, Sebania pie, nga ’yo Petahia be kini, Emi so pa uru Yehova Mungu emini inzizu, eri’i engapi driowu eti kokoru kpere ’dani ’daniri’i. Te ru mini dizaru ovupi uru tu, asi ndriza pi agapi inzita be dria rari ma ovu inzizaru.

⁶Te Ezira ’yo ra kini, Mi’i, mi a’dule ovu Yehova’i; mi ’ba ndra ’bu pi, ’bu ’bu ma drilia ururi pie, afa ongulumuru alenia ’diyi pie dria, nyaku pi afa alenia ’diyi be dria, miri pi afa alenia ’diyi be dria indi; mi adri yi ma ta mba dria mi’i; ongulumu ’bua ’diyi yi mi inzi.

⁷Mi ovu Yehova Mungu ndra Iburamuni pepi, eri ofupi engazu Uri ’ba Kalidea ’diyiniriasi, ru erini ’dapi Iburahimu’iri’i.

⁸Mi isu ndra asi erini ovu mi drilia adaru, mi azi ndra aziza eri be ’ba Kanania ’diyi pi ma angu fezu a’bianzi erini ’diyi dri, ’ba Hitini pie, ’ba Amorini pie, ’ba Perizini pie, ’ba Yebusini pie, ’ba Girigasini pie; te mi ’ye ekile mini’yolerile ’bo, mini ovule kililirurisi.

⁹Mi ndre ndra ecandiza a’bi amanini Misiriari, mi eri wuta yini Miri Ekaru ma tiari ra,

¹⁰mi ece eceta tali osutaru be Farau pi ma dria ati’ba erini ’diyi pie dria, ’ba ovupi angu erinia ’diyi pie dria, mini nile yi ’ye a’bi amani vu ambosirisi; mi ru ku tu, ekile curu’dorile.

¹¹Te mi awa miri yi ma drilia, yi aga nyaku angazaru ma dria miri eselesi ani; te ’ba yi dropi ’diyi mi o’be yi yi aliru ma alia, ekile oni o’bele yi amboru ma aliarile.

¹²Vini indi mi ce yi ma dri etusi iriti pa sopi pirirurisi, azini inisi aci pirirurisi diza fezu yi dri geri yini ngazu acizuria.

¹³Mi esi va ndra oni Sinai ma dria, mi ’yo e’yo yi tia engazu ’bua, mi fe yi dri e’yo liza kililiru ’diyi pi azita adaru ’diyi be, azita sizaru onyiru ’diyi pi e’yo azile onyiru ’diyi be,

¹⁴mi ece ndra yi dri sabato mini alatararuri ma e’yo, mi azi e’yo aziza ’diyi pi, azita sizaru ’diyi pie, azita pie Musa ati’bo mini ma tisi.

¹⁵Mi fe ndra yi dri enya ’buari abiri yini ma e’yosi, mi fe vini yi mvuza efu oni ma alia yi avijo yinisi, mi azi ndra yi tia yi ma fi angu mini azile ndra fele yi driri ma alia eri pazu yiniru.

¹⁶Te yi’i a’bi amani be ’ye ambosi, ombele yini mba tu, yi erini azita mini ku;

¹⁷yi ga ’yeko si, yi egani tali mini ’yele yi ma eselia ’diyi ku; te yi ma ombele mba tu, yini mbuzu amveria yi pe ’ba ngazu yi dri cezu mvizu ovuzu ati’baru. Te mi’i, mi ovu Mungu ovupi ngonde e’yo onzi wuzuri’i, gapi asi ndriza pisi yiki beri, mi ’bani aoko mbele ku, te mi ovu yiki ale beri be tre, mi kuni ndra yi ku.

¹⁸Adaru, yi ka kojaa ede molasi ’yozu kini, Mungu emini emi ofupi ,angu Misiriasi emi ejipiri eri ’di’i; azini yi ka ndra e’yo amboru ’ye aka aoko fezu mi dri ti,

¹⁹yiki mini amborurisi mi kuni yi roko dria ku; iriti pa sopi piriru yi dri cepi geriari kuni yi etusi ku, te aci piriru inisi diza fepi yi dri geri yini ngazu acizuriari kuni yi ku indi.

²⁰Mi fe vini yi dri indi Orindi mini onyiruri yi imbazu, mi ogani yi dri mana nyako si ku, te mi fe vini yi dri yi, yi avijo yinisi ra.

²¹Adaru mi mba yi ma ta e’yosi dria eli kali su roko dria ’yeke, afa aloni yini ecezu ani rani yo; bongo yini deni ku, yi ma pa opini vini ku indi.

²²Mi fe opi nyaza yi dri suru be, mini awale dria yi dri afa yiniruri; ’dini yi nya Sihoni opi Hesiboniari vile angu, Ogi opi Basaniari ma angu indi.

²³Mi fe ndra anzi yini ezu kakau ekile ’bi’bio ’bua ’diyile, mi ofi yi angu nde mini ndra e’yoni azile yi ma atipi tia yi ma fi alenia eri ’duzu yiniruri ma alia ra.

²⁴’Dini anzi yi fi, yi ’du angu nde ra, azini mi ’ba ’ba Kanania angu e’ipiru ’diyi va yi ’ma drilia, azini mi fe yi yi ma dria ra, yi’i opi yini pie, ’ba ovupi angu nde ma alia ’diyi pie, ’dini yi ma ’ye ’ba nde ’diyi yini lelerile.

²⁵Yi pa aku abi kaliru be ’diyi pi angu nyaka kapi onyiruri be, yi ’du jo gapi tre afa onyirusi ’diyi pi yiniru, ’bile ’bani gale yini ’diyi pie, amvu zabibuni ’diyi pie, amvu pati mizeituni ’diyi pie, pati kakau azini efi kapi ’diyi pie; ’dini yi nya ra, tra ra, ngu ra, yi ovu ayikosi tu onyi mini amborurisi,

²⁶Te ti, yi ovu bile kokoru, yi mbu mi ruaasi ezeru amve, yi ’be azita mini yi ma ngukualeru, yi fu nabi mini e’yo eti nzepi yi ma ruaa o’bizu yi ojazu mi vu dika ’diyi, yi ’ye aka aoko fezu mi dri tu.

²⁷E’yo ’disi mi fe yi ari’ba yini dri ani, yi nga yi inza ra; te o’du yini ovozu candisirisi yini owuria mi vu, mi eri wuta yini ’bua ’da; te yiki mini ma o’bisi mi fe yi dri ’ba yi papi ’diyi, yi papi ari’ba yini ma dria ’diyi.

²⁸Te ti, ewu yini ovuzu e’yo kokoruri ka aga were ’bo, yi nga e’yo onzi ’ye dika mi milia, e’yo ’disi mi ku yi ari’ba yini dri, yi nga ovu opiru yi ma drilia ani; te yi ka yi oja, ka wu mi vu, mi eri wuta yini ’bua ’da, mi pa yi paleko karakarau yikimini vusi.

²⁹Te mi nze e’yo ma eti yi ruaa, mi ma omvi yi dika azita mini vu. Te yi ’ye ambosi, yi erini azita mini ’diyi ku, te eza e’yo liza mini ’diyi ra (’ba ngoni ngori ka e’yo liza nde ’diyi ’ye ra, eri nga idri isu ani), yi co yi nguku, ’ba yi ma ombele mbazaru, leni e’yo eri ku.

³⁰Te ti, mi ’ba asi ndriza yi vu eli kakau, mi nze e’yo eti yi imbazu Orindi minisi nabi mini ’diyi ma tisi; te yi leni e’yo eri ku. E’yo ’disi mi fe yi ’ba angu ndea ’diyi ma dria.

³¹Te yiki mini amborurisi, mi deni yi dria ku, kuni yi ku indi; a’disiku mi ovu Mungu asi ndriza be azini yiki beri’i.

³²Te curu’do, Mungu amani, Mungu amboru okpo be uriuriru, aziza erini ma ta mbapi yikisiri’i, mi fe candi dria ecapi ama dria, opi amani pie, opianzi amani pie, ’ba amani edeta edepi ’diyi pie, nabi amani pie, a’bi amani pie, ’ba dria mini ’diyi pie, engazu ewu opi Asuriaa ’diyiniria ecazu kpere andruri, ma ovu e’yo wereru mi ma milia ku.

³³Te mi’i, mi ’ye kililiru e’yo dria ecapi ama dria ’diyi ma eselia, a’disiku mi ’ye e’yo adaru, te ama ’ye e’yo onzi ama’i;

³⁴opi amani ’diyi pi, opianzi amani ’diyi pie, ’ba amani edeta edepi ’diyi pie, a’bi amani ’diyi pie, yi mbani azita mini pi ma ta ku, e’yo eti nzeza mini yi imbazu ’diyi pie.

³⁵A’disiku opi nyaza yinia yi ’yeni azi mi dri ku, azini asi ndriza amboru mini ’bale yi vuri pi ma alia, angu amboru nyaka kapi tu mini fele yi driri pie; yi ojani vini yi e’yo onzi yini kuzu ku.

³⁶Te mi ne, ama andru ati’bani; te angu nde mini fele a’bi amani dri yi ma nya efini afa onyiru erini beri, mi ne, ama ati’bani alenia.

³⁷Angu nderi efi ’ya tu opi mini ’bale ama drilia e’yo onzi amani ma e’yosi ’diyi dri; yi okpo be ’yezu ama ruaa, anyapa amani be yini lelerile, te ama ovu candi amboru alia.

³⁸Te ti, e’yo ’disi ama azi aziza, adaru ’diri, ama si eri ci, opi amani pi ti dri alenia, ’ba Levini amani ’diyi pie, ’ba amani edeta edepi ’diyi pie.