Read lugbara Esiteri 1 Bible Online

Esiteri 1 - lugbara bible

Esiteri 1

¹Eri nga eca ’dini ewu Ahasuerunisi (’di Ahasueru opi nyapi angu turu alu kali iri drini aziri, engazu angu Indiaria kpere Etiopiaa ’diyi ma driliari’i),

²ewu ndesi, Ahasueruni riria oguna ini opiniri ma dria, aku opini Susani ma alia,

³eli na erini opi nyazurisi eri ’ba omu amboru ’ba amboru erini ’diyi pi dri dria, ati’ba ini ’diyi be, ’ba okporu engapi Perisiaa azini Mediaa ’diyi pini ovuria eri drilia, ’ba ’wara anguni ’diyi pie, ’ba amboru ’diyi pie;

⁴eri nga lonyi opi nyaza dizaru erinirini pi ece, diza erini opini inzile turi be o’du kakausi, cazu kpere o’du turu alu drini kali aro.

⁵O’du ’diyi ka aga ra, opi ’ye omu eri vile aku opiniri ma iriia, ’ba dria ovupi aku Susania ’diyi dri, ’ba kuza pi dri ’ba soroa ’diyi be dria; omu nde nya o’du aziri.

⁶’Dale ’ba o’i bongo mile be nyiriari, azini emveru azini bluru; buka o’beza edele bongo mile be nyiriasiri pisi okalakokalari be ’diyi ombe bongo ’ile nde ’diyi emvea dahaburu ’diyi pi ma ruaa oni ndrizaru pa sopi piriru ’diyi be; ’ba gbolo meleru azini dahaburu oni otiza edele oni ekaru pisi, emveru pie, fororu pie, iniru pieri ma dria.

⁷Yi fe ’ba dri afa mvuza mvuzu okelea meleru ma alia (obi yini ndu ndu), azini patiefi ma su opi vile fudri ci tu, opi ma lonyile.

⁸’Ba mvu dria azita ’bani azileri vusi, ’ba econi ’ba omi ani okposi ku; opini e’yoni azile ’ba amboru eri vile joa ’diyi ma tia ’dinirisi, kini yi ma ’ye ekile ’ba alu aluni lelerile.

⁹’Dale vini indi oku opini Vasiti’i, eri ’ba omu okuyi dri opi Ahasueru vile joa.

¹⁰O’du azirisi, opi ma asini garia tre ayikosi patiefi susi, eri azi Mehumani pi dri, Bizita pie, Haribona pie, Bigita pie, Abagita pie, Zetari pie, Karikasi pie, yi ati’ba aziri azi ngapi Ahasueru ma ngulupi dri ’diyi,

¹¹yi ma eji Vasiti oku opini opi ma drilia, ekilaza opiniri be eri dria, onyi erini ecezu ’ba dria ma milia, azini ’ba ambo ’diyi ma milia indi; a’disiku eri ovu nezaru ndrizaru tu.

¹²Te oku opini Vasiti ga azita opini azile ati’ba erini ’diyi ma tiari eriko si, E’yo ’disi opi ovu aokosi tu, adra enga eri ma alia aciru.

¹³Opi nga di ’yo ’ba onduaru o’du nde nipi ’diyi ma tia-opini adri ’ye ’dini ’ba azita pi nipi e’yo liza suruni be ’diyi vu;

¹⁴’ba eri ageia ’diyi yi evu Karisena, Setari pie, Adimata pie, Tarisisi pie, Meresi pie, Marisena pie, Memukani pie, ’ba ’diyi yi ambo aziri Perisiaa azini Mediaa ’diyi, yi’i opi ma mile ndrepi, ripi drile suru opini nyaleri ma alia ’diyi-

¹⁵eri zi yi tia, Azita ’yo ama ma ’ye Vasiti oku opiniri vu ngoni ya, erini azita opi Ahasueruni azile ati’ba erini ’diyi ma tiari ’yele kurisi ya?

¹⁶Memukani nga di e’yo omvi opi ma drilia azini ’ba amboru ’diyi ma drilia indi, kini, Vasiti oku opini ’yeni onzi opi dri a’dule ku, te eri ’ye onzi ’ba ’wara ’diyi dri dria, azini ’ba dria ovupi angu opi Ahasueruni ma alia ’diyi dri indi.

¹⁷A’disiku e’yo Vasiti oku opinirini ’yele ’diri, eri nga ku wakaka oku dria ma eselia, yi nga ani agupi yini ’ba aparakaru yi ma milia, ’bani e’yoni oluria kini, Opi Ahasueru azi ’ba ma eji oku ini Vasitini i ma drilia, te eri emuni ku.

¹⁸O’du andrurisi ’ba amboru Perisiaa azini Mediaa ’diyi yi ma okupi, e’yo ’diri oku opinirini ’yeleri eripi ’diyi, yi nga mvi mu olu ’ba amboru opini ’diyi ma tia trotro ’dinile. E’yo ’disi edematara amboru nga fu ’ba ma eselia aoko amboru be tu.

¹⁹Opi ka e’yo ’di ndre onyiru, ma fe azita opini ma fu eri vurisi ra, ma si ’ba Perisiaa ’diyi pi ma azita ma alia ’ba Mediaa ’diyi be, ’ba ma oja eri dika ku ani, kini, Vasiti ma emu dika opi Ahasueru ma drilia ku; te opi ma fe bandre erini opiniri oku azini eri agapi onyisi rari dri.

²⁰Te azita opini ngale azileri, e’yoniri ka nga ku kpere opi erini nyaleri ma eselia dria ’bo (te opi nyaza nde ovu amboru tu), okuyi dria nga agupi yini ma e’yo inzi ra, ka ovu ’ba kuzani kani ’ba soroani ti,

²¹Opi pi ndre e’yo amaza ’diri onyiru, ’ba ’wara erini ’diyi be, opi ’ye trotro Memukanini ’yolerile;

²²eri pe waraga ti angu erini nyale ’diyia dria, angu alu alu vu ekile yini ti yini silerile, azini suru alu alu vu yini ti yini ’yolerile, kini, Agupi alu alu ma ovu amboru aku yinia, azini ma eku e’yo nderi ’ba yi vile ’diyi ma tisi.