Read lugbara Esiteri 9 Bible Online

Esiteri 9 - lugbara bible

Esiteri 9

¹Mba mudri drini iri omvele Adariri ma o’du mudri drini nasi, ’di o’du ’bani ngazu azita opini azile e’yo kuza beri ’yezuri’i, o’du nde ovu vini o’du ari’ba ’ba Yahudini ’diyini egale ndra yi agazuri’i, te curu’do e’yo oja i ndu, ’dini ’ba Yahudini ’diyi yi nga ’ba yi ngupi onzi ’diyi aga ani,

²o’du nderisi ’ba Yahudini yi oku yi aku yinia angu dria opi Ahasueru vileria, yini lezu ’ba yi ’yepi onzi ’diyi ofuzu dri yinisi. Te di isu ’ba aluni yi ogapini yo, a’disiku rota ’ba ’diyi ruzurini ’dele ’ba dria ma dria ’borisi.

³’Ba ambo angu awaza dria ma drilia ’diyi, ’ba opiru angu nyapi ’diyi pie, ’ba ambo ’diyi pie, ’ba azi opini ngapi ’diyi pie, yi ko ’ba Yahudini ma aza, a’disiku ruta Moridekaini ruzuri ’de yi ma dria ’bo.

⁴Te Moridekai ovu ’ba amboru jo opiniria, azini ru erini ku angu dria ma alia; a’disiku agu Moridekairu ’do ma runi ku dika dika.

⁵’Dini ’ba Yahudini yi oli ari’ba yini dria seisi ra, yi ofuzu, yi dri jazu indi; yi ’ye ’ba yi ngupi onzi ’diyi vu ekile yini lelerile.

⁶Aku Susaniria, ’ba ’ba Yahudini ofule dri ale ’diyi ovu turu towi.

⁷Yi ofu ’ba ’diyi: Parisandata, Dalifoni pie, Asipata pie,

⁸Porata pie, Adalia pie, Aridata pie,

⁹Parimasita pie, Arisai pie, Aridai pie, Vaizata pie,

¹⁰’ba nde ’diyi ovu agupianzi mudri Hamani Hamedata mvi ari’bo ’ba Yahudiniri vile ’diyi; ofu yi ra, te ’bani yi ma dri afa ma ruaa ku.

¹¹O’du ndesi ’ba ece opi dri kalafe ’ba ’bani ofule aku Susania ’diyiniri.

¹²Opi ’yo Esiteri oku opiniri ma tia kini, ’Ba Yahudini ofu ’ba turu towi, ja yi ma dri aku Susania, agupianzi mudri Hamanini ’diyi be. Ka’dini ’ye opi vile angu azini ’diyia a’dini ya! Curu’do mi le a’dini ya? Ma nga fe mi dri. Kani e’yo mini lele a’ile dikari a’dini ya? Te ma nga ’ye ra.

¹³Esiteri ’yo ra, Ka ovu onyiru opi ma milia, mi fe ’ba Yahudini ovupi Susania ’diyi dri ’yezu dru dika ekile yini ’yele andru azita vusirile. Azini mi fe ’ba ma o’i agupianzi mudri Hamanini ’diyi pati sia uru.

¹⁴Te opi fe azita ’yezu ’dini; azita nde efu Susania, yi nga vini agupianzi Hamanini mudri ’diyi o’i pati sia uru.

¹⁵’Ba Yahudini ovupi aku Susania ’diyi yi oku yi tualu mba omvele Adariri ma o’du mudri drini susi, yi ofu vini ’ba dika turu na Susania; te di yi ’bani yi ma dri afa ma ruaa ku.

¹⁶’Ba Yahudini azini ovupi angu awaza opi vileria ’diyi yi oku yi tualu, a’di ’dizu idri yini pazu, isu ava liza yini ari’ba ofulerisi, yi ofu ari ’ba yini alifu kali aziri drini towi; te di yi ’bani yi ma dri afa ma ruaa ku.

¹⁷Yi ’ye e’yo ’diri mba omvele Adariri ma o’du mudri drini nasi, te o’du mudri drini su mba ndenirisi yi li ande, yi ’ba eri o’du omu nyazu azini ayikoniriru.

¹⁸Te ’ba Yahudini ovupi Susania ’diyi oku yi o’du mudri drini na mba nderinisi azini o’du mudri drini susi, yi li ande o’du mudri drini towisi, yi ’ba o’du nde omu nyazani azini ayikoni.

¹⁹E’yo ’disi ’ba Yahudini akuni, ovupi aku abi kaliru kokoru ’diyia ’diyi, yi adri mba omvele Adariri ma o’du mudri drini su ’ba o’du ayikoni, o’du omu nyazu, o’du ava lizu, azini odu ’bani afa fetaru fezu ’ba azini be yi eseliariru.

²⁰Moridekai si e’yo ’diyi dria, eri pe waraga ti ’ba Yahudini ovupi angu dria opi Ahasueruni ’diyi ma alia ’diyi dri, yi’i ovupi ogogo ’diyi azini ovupi re ’diyi dri indi.

²¹Eri azi yi ma mba mba omvele Adariri ma o’du mudri drini su, azini o’du mudri drini towi mba ndeniri ma ta eli vusi eli vusi,

²²a’disiku o’du nde ’diyisi ’ba Yahudini isu ava liza, Yini ari’ba yini ofulerisi, azini mba ’dosi candi oja i yi vu ayikoru, azini wuza oja i o’du ava lizuriru; ’dini yi ma ’ba o’du ’diyi o’du omu nyazu azini ayikoni, azini o’du afa fetaru fezu ’ba azini be yi eselia, azini afa ofezu ’ba alioru dririru.

²³Te ’ba Yahudini yi a’i e’yo ’yezu ekile yini e’dole ’yezu ’borile, ekile Moridekaini sile yi vurile.

²⁴A’disiku Hamani Hamedata mvi ’ba Agagiari, ari’bo Yahudini driari, otu ndra asi inia ’ba Yahudini ma dri jazu, eri ’be ndra Puri, efini odrisini, yi ofuzu dria, yi dri jazu;

²⁵te e’yo nderi ka eca opi ma bilia ’bo, eri pe azita ma ti waragasi, ’dini e’yo onzi Hamanini otule ’yele ’ba Yahudini vuri ma emvi eri ma ngulupi ma dria, azini ma o’i yi, anzipi be, pati sia uru.

²⁶E’yo ’disi yi omve o’du nde ’diyi Purimu, ru Puriri vusi. E’yo dria ndra waraga ’dori ma alia ’diyi pi ma e’yosi, e’yo dria ovupi yi drilia yini nele ngapi ecapi yi vu e’yo ’dori ma alia ’diyi pie, e’yo ecapi yi vu ’bo ’diyi pie,

²⁷’ba Yahudini fe azita, yi a’i eri yi ma ngulupi pi dri ori’ba yini pie, ’ba ngapi yi ecipi yi be tualu ’diyi pie, ’dini yi ma ece ku o’du iri ’diyi ma ta mbazu, ekile e’yo siza nderini ’yolerile, ekile o’du ndeni ecale eli vusi eli vusi ’bani pele ’borile,

²⁸’dini ’ba ma ega o’du ambo ’diyi ’dani, ma mba yi ma ta yi eselia a’bianzi vusi dria, enyati vusi dria’i angu awaza vusi dria, aku vusi dria, azini o’du ambo Purimuni ’diyi ma avi ’ba Yahudini ’diyi ma eseliasi ku, egatani ma de i ori’ba yini ma eseliasi ku indio,

²⁹Vilerisi Esiteri oku opini Abihaili zi, azini agu Yahudiouru Moridekai, yi si vini waraga dika, waraga iriri e’yo Purimuni azizuri edrezu.

³⁰Eri pe waraga ti ’ba Yahudini dria vu kpere angu turu alu drini kali iri drini aziri opi Ahasueruni nyale ’diyi vu, e’yo asi anzuru pini oluzu e’yo adaru be,

³¹’ba ma mba o’du Purimuni ’diyi ma ta o’du pele ’diyi vusi, ekile agu Yahudiouru Moridekai pini azile yi tia Esiteri oku opini berile, ekile vini yini ’bale yi ma ngulupi pi dri ori’ba yini be, e’yo nyaka ’dazuri pi ecezu awu wuza yiniri berile.

³²Azita Esiterini azileri edre e’yo Purimuni ’diyi okporu; ’ba si eri buku ma alia.