Read lugbara Efuza 10 Bible Online

Efuza 10 - lugbara bible

Efuza 10

¹Te Yehova ’yo Musa tia, Mi, fi Farau vu; te ma ’ba asi erini mbazaru ’bo, ati’ba erini ma asi be, ’dini ma eco eceta mani ’diyi ecezu yi ma eselia beni,

²’dini vini indi mi eco e’yo mani ’yele angu Misirini ’vu ’diyi, eceta mani ’yele yi ma eselia ’diyi be, ecezaru mva mini bilia, azini mva mini ma mva ma bilia indi; ’dini emi ma ni ani ma Yehova ’i beni.

³Te Musa pi Aroni be yi nga fi Farau vu, yi nga ’yo eri tia kini, Yehova Mungu ’ba Ebranianiri ’yo ’dini, Mi nga ga mi ’ba kokoru ele ma drilia kpere o’du ngopi ya? Mi fe ’ba mani ma mu, ’dini yi ma nga,azi ma dri ani.

⁴Te mi ka ga i geriko feko yi dri si, mi ne, dru ma i nga ombi eji angu mini eselia kpere kalatia,

⁵te yi nga nyaku ma mile a’bu teke teke, ’ba ngani eco nyaku ma dri nezu ani ku; te yi nga afa jolokoru odrapi anga ku sini kule ’diyi mbe, yi nga pati dria ovupi emi vile angua ’diyi mbe ra,

⁶yi nga ga jo mini ’diyi ma alia tre, ati’ba! mini dria ma jo ma alia tre tre indi, azini jo ’ba dria Misiria ’diyini ma alia tre indi; ekile mi atapini nelei a’bi mini be andra oku engazu ewu yinisi ecazu kpere andru nga kurile. Eri oja i, fu Farau vurisi ra.

⁷Ati’ba Farauni ’diyi ’yo eri tia, Agu ’diri nga ovu ama dri embaru kpere o’du ngopi ya? Mi fe ’ba nde ’diyi ma mu, ma nga azi Yehova Mungu yini dri fo! Mi nini nga angu Misirini ja dri ’bori ku ya?

⁸Te yi nga di Musa pi eji dika Aroni be Farau vu; eci ’yo yi tia, Emi mu di azi nga Yehova Mungu eminiri dri; te a’dipi nga mu munini ya?

⁹Musa ’yo ra, Ama nga mu anzi nyiri amani be azini ’ba ’wara amani be; agianzi amani pi ezoanzi amani be, kabilo amani o’biru ’diyi pi ti amani o’biru be indi; a’disiku onyiruni ama ma ’ba omu amboru Yehova dri.

¹⁰Eri ’yo yi be, Yehova ma ovu emi be indi ka, ma nga emi ku muzu anzi nyiri emini be ndo. Emi ne, emi ovu e’yo onzi be emi asia.

¹¹’Dini yo! Emi agupi ’wararu ’diyi emi mu azi Yehovani ngazu, te e’yo emini leleri ’di’i. Dro yi Farau driliarisi ra.

¹²Te Yehova ’yo Musa tia, Mi eju mi dri angu Misirini dria ombi omvezu, yi ma eca angu Misirini dria, afa engaza dria acepi angu alia sini kuleri mbezu.

¹³’Dini Musa nga kali ini su angu Misirini dria, te Yehova nga oli engapi etuni efuriari ma ti pe angu nderia etu zu, inisi rra; angu ka ati ’bo oli engapi etuni efuria nderi nga ombi eji.

¹⁴Te ombi yi ere yi angu Misirini ma dria dria, yi ’de angu nde ma alesi dria, yi ocokoru tu; ndra drio ti, ombi ’dinileni yo, yi ma vutia ti, ngani eca ’dini ku indi.

¹⁵Te yi a’bu nyaku ma dri ci, ’dini angu oja i iniru, te yi mbe afa engaza nyakuari dria patiefi be dria sini kuleri; ibibi aceni aluni ku, kani patini, kani afa engaza amvuari angu Misirini ma alia dria.

¹⁶Farau nga Musa pi omve Aroni be mbele, nga ’yo ra, Ma ’ye onzi Yehova Mungu eminiri vu, emi vu indio

¹⁷E’yo ’disi curu’do ma matu ’ba emi vu emi ku onzi mani kiri pale alu ’dorisi, emi zi Yehova Mungu emini tia matusi, ’dini eri ma ’du dra ’dori kiri ma vusi ra fo.

¹⁸Te Musa nga fu Farau vurisi ra, nga matu ’ba Yehova vu.

¹⁹Te Yehova nga oli okporu tu engapi etuni ’deriari oja ra, eri nga ombi ’du dria, nga yi dro da Miri Ekaruri alia; ombi ngani ace aluani ku angu Misirini ma eselia dria.

²⁰Te Yehova ’ba asi Farauni mbazaru, eri kuni anzi Israelini ’diyi dri geri muzu ku.

²¹Yehova nga ’yo Musa tia, Mi eju mi dri uru ’bua, ’dini angu Misirini ma ovu bizaru ini ’bani ecole amale yi ma ruaa rarisi.

²²Te Musa nga i dri eju uru ’bua, ini inicici iduru nderi nga angu Misirini bi dria o’du pale na;

²³yi econi yi nezaru yi eselia ku, ’ba aluni econi muzaru pari azinia ku o’du pale na ’diyisi; te anzi Israelini ’diyi ma jo alia dria angu mve ini mve mve.

²⁴Te Farau omve Musani kini, Emi mu azi nga Yehova emini dri; te anyapa nyiri ti emini be dria ma ovu ’doa; anzi emini yi nga mu emi beni.

²⁵Te Musa ’yo ra, Mi ma fe ama dri anyapa edeta edezu azini vezu Mungu dri ’diyi, ’dini ama ma ede edeta Yehova Mungu amani dri beni.

²⁶Ti amani dria nga mu ama be; ama ngani ti onyofi aluni ku vileni ku, a’disiku ama ma ’du yi ma eselia azini azi ngazu Yehova Mungu amani dri, te ama nini nga ku kani ama nga azi nga Yehova Mungu amani dri a’di afasi ya, de nga ama cani ’dale ku.

²⁷Te Yehova ’ba asi Farauni mbazaru, kuni yi dri geri muzu ku.

²⁸Te Farau ’yo Musa tia, Mi da mi ma miliarisi ra; mi ne onyiru mi ma ne ma mile dika ku; a’disiku o’du mini ma mile nezurisi mi nga dra ra.

²⁹Musa ’yo ra, Mi ’yo ’yeke! Ma ngani mi nile ndre dika ku.