Read lugbara Efuza 11 Bible Online

Efuza 11 - lugbara bible

Efuza 11

¹Te Yehova ’yo Musa tia, Ace nga dra alu ma nga ji Farau dria azini Misiri dria; ’diri ma vutia eri nga emi ku muzu; eri ka nga emi ku muzu, adaru eri nga emi dro ’doarisi iriti,

²Mi ’yo curu’do ’ba ongulumuru ma bilia, kini agupi dria alu alu ma zi yi agyi aku ejeliari tia, azini oku dria alu alu ma zi yi agyi aku ejeliari tia afa onyiafa dahaburu azini onyiafa meleru.

³Te Yehova a fe ’ba nde ’diyi dri asi ndriza isuzu ’ba Misiria ’diyi ma milia. Indi vini agupi nde Musa eri ovu ’ba amboru tu angu Misirinia, ati’ba Farauni ’diyi ma milia azini ’ba erini ’diyi ma milia indi. Musa kini, Yehova ’yo ’dini:

⁴Eleile iniayiile ma nga efu angu Misirini ma eselia;

⁵azini aliriaanzi osipi oko angu Misirinia ’diyi nga odra dria, e’dozu Farau ripi oguna ini driari ma mva osipi okori vu, asizu oku ati’boru ripi oni anya ’izuri ma vutiari ma mva osipi okori vu; azini koanzi tipi oko ’diyi dria indi.

⁶Awu amboruni nga ovu angu Misirini ma alia dria, awu azini andra oko ’dinileni yo, ngani ovu ’dinile dika ku indio

⁷Te anzi, Israelini vu oce aluni ngani andre ini mbe ku, kani ’ba vu kani anya pa vu; emi ma ni geri Yehovani ’ba Misirini piyi ma esele cozu ’ba Israelini beri ani.

⁸Te ati’ba dria mini ’diyi nga esi ma vu, nga kumuti osi ma drilia ’yozu, Kiri kiri emi fu, ’ba dria mi vuti bipi ’diyi be fo! ’Di ma vutia ma di nga fu ra. Eri fu Farau vusi adra acirusi.

⁹Te Yehova ’yo Musa tia kini, Farau ngani emi eri ku; ’dini tali osutaru mani ’yele ’diyi ma ezu kakau angu Misirini ma alia ani.

¹⁰Te Musa pi Aroni be yi ’yeli tali osutaru ’diyi dria Farau drilia; te Yehova ’ba Farau ma asi mbazaru, kuni anzi Israelini dri geri muzu ku.