Read lugbara Efuza 12 Bible Online

Efuza 12 - lugbara bible

Efuza 12

¹Yehova ’yo Musa pi tia Aroni be angu Misirini alia, ’yozu,

²Mba ’dori nga ovu mba e’dopiriru emi dri; eri nga ovu emini mba oko eliniriru.

³Emi ’yo ’ba ongulumuru Israelini be dria kini, O’du mudri mba ’dorinisi yi dria alu alu ma ’du kabilomva ata yini vusi alu alu, kabilo alu jo vusi jo vusi;

⁴te jo alu ma alia ’ba ka ovu were, eri nga kabilomva ’du tualu ’ba aku erini ma ejelia ’diyi be, ekile kalafe ’bani vusi; emi ma la ’ba kabilomva nde ma nyaza vusi.

⁵Kabilomva emini ma ovu nyibile kokoru, ma ovu agoaru eli be alu; emi ma ’du eri kabilo eselia, kani ndri eselia;

⁶emi ma mba eri ma ta cazu o’du mudri drini suri mba ndeniria; ’ba ongulumuru dria Israelini yi okupi ’diyi nga eri li ondresi.

⁷Te yi nga arini a’i, emi nga eri oco jotile kalaa irile irile azini uruleruria, joyini ngazu nyazu aleniaria.

⁸Te yi nga za ozo acisi; nga nya ini ndesi mikate akufi kokorurisi, yi nga eri nya tibi drapi okakaalerisi.

⁹Ma nya eri ibiru ku, ma a’di eri yisi ku indi, te emi ozo eri acisi, dri erini pa erini be, afa alenia ’diyi be dria.

¹⁰Emi ma ku esani aluni ku cazu dru o’bitisi, te esani acepi ecazu o’bitisiri emi ma ve acisi.

¹¹Emi ma nya eri ’dinile: opile a’dizaru be, enyiriko be emi paa, kali be emi dria; azini emi ma nya eri mbele. Eri ovu omu Yehovani agazu ’ba drilesiri.

¹²Te ini ndesi ma nga aga angu: Misirini ma eseliasi, ma nga aliriaanzi dria angu Misirinia ’diyi oco, ’ba piyi anyapa be indi; ma nga adrou dria Misirini ’diyi ma e’yo li: ma Yehova’i.

¹³Te ari nde nga ovu emi dri ecetaru jo emini ovuzu ’diyi ma ruaa; ma ka ari nderi ndre ma nga aga emi drilesi, dra aluni ngani eca emi dria emi dri jazu mani angu Misirini coria ku.

¹⁴O’du ’diri nga ovu emi dri e’yo egaza fepiriru, azini emi nga eri ta mba omuru Yehova dri; emi nga eri ma ta mba azitasi omuru a’bianzi,emini vusi ’dani ’dani.

¹⁵O’du, azirisi emi nga mikate akufi kokoruri nya ra; o’du nde oko ’disi emi nga akufi ofu jo eminiasi dria, te ’ba ka mikate akufi beri nya engazu o’du alurisi ecazu o’du aziririsi, yi nga ’ba nderi nze Israeli ma eseliasi amve li ’kpi.

¹⁶O’du okorisi okuza alatararurini nga ovu emi drini, azini o’du azirisi okuza alatararu vini indi; o’du nde ’diyisi emi ’ye azi aluni ku, pe kiri azi nyaka dri fupi ’ba alu alu dri nyazuri ’yezu.

¹⁷Emi nga omu mikate akufi kokorurini ma ta mba; mani ’ba ongulumuru emini ofule o’du nde ma ngulupisi angu Misiriniasi ’borisi: e’yo ’disi emi nga o’du ’diri ma ta mba azitasi a’bianzi emini vusi dria ’dani ’dani.

¹⁸Mba aluri ma o’du mudri drini sua ondresi, emi nga mikate akufi kokoruri nya, ecazu kpere o’du kali iri drini alu mba ndeniria ondresi,

¹⁹O’du aziri ’diyisi ’ba ma isu akufi jo emini ma alia aluni ku; a’disiku ’ba ngo ngori yani ka afa akufi beri nya ra, yi nga ’ba nderi nze ’ba ongulumuru Israelini ma eseliasi amve li kpi, eri ka ovu ani’boni kani kari’bani ti.

²⁰Emi ma nya afa akufi beri aluni ku; jo emini alia dria emi nga mikate akufi kokoruri nya’i.

²¹Te Musa omve ’ba ’wara Israelini ’diyi dria, eri ’yo yi tia, Emi mu, emi ’du emini kabiloanzi joti emini vusi, emi li kabilo omu agaza jo drilesiriniri,

²²Emi ma ’du edikobi ombezaru, ma su eri ari okeleaari ma alia, ma co eri jotilea uruleru azini kalaa irile irile ari okeleaarisi; azini ’ba aluni ma fu eri jotileasi amve ku, cazu kpere o’bitisi.

²³A’disiku Yehovani nga aga ’ba Misirini ofuzu; te eri ka ari ne jotilea uruleru azini kalaa irile irileria, Yehovani nga aga jotile ma driasi aga, eri ngani ’ba ’ba dri japiri ku fizu jo eminia emi ofuzu ku.

²⁴Emi nga e’yo ’diri ma ta mba azitaru emi dri azini anzi emini dri ’dani ’dani.

²⁵Eri nga eca ’dini, emi ka nga ca angu Yehovani ngale fele emi dri erini azile ’borileria, emi nga azi ’diri ma ta mba.

²⁶Eri nga eca ’dini, anzi emini ka nga te zi emi tia, E’yo ’dori emini ’yeleri ma efi ngonile ya?

²⁷emi nga omvi yi tia,Eri ovu edeta agaza jo drilesi Yehovaniri, eri aga ndra jo anzi Israelini ovupi Misiria ’diyini driasi, erini ’ba Misirini ofuri a, pa ndra jo amani ra. ’Ba ongulumuru yi elu dri yini va inzitasi.

²⁸Anzi Israelini yi mu, yi ’ye ’dini; ekile Yehovani azile Musa pi tia Aroni berile, yi ’ye ’dini.

²⁹Eri eca iniayiisi ’dinile, Yehova co aliriaanzi osipi oko angu Misirinia ’diyi dria, e’dozu Farau ripi oguna ini driari ma mva osipi okori vu, asizu ’ba o’ile ’bile gale arujoruri ma aliari ma mva osipi okori vu, anyapa tipi oko ’diyi dria indi.

³⁰Te Farau enga inisi, eri’i ati’ba ini be dria, ’ba Misirini ’diyi be dria; awu amboru ovu Misiri alia, a’disiku jo aluni ’bani drazu kuni yo.

³¹Te leri omve Musa pi Aroni be inisi, eri ’yo, Emi enga, emi fu ’ba mani eseliasi, emi’i tualu anzi Israelini ’diyi be; emi mu, emi nga azi Yehova dri ekile emini ’yole ’borile.

³²Emi dro anyapa nyiri emini ti emini be, ekile emini ’yole ’borile, emi mu di; azini emi fe asi ndriza ma etri indi!

³³Te ’ba Misirini yi omi ’ba ongulumuru, yi etuzu angu nde eseliasi mbele; te yi ’yo, Ama odra de dria ’bo

³⁴’Ba ongulumuru yi ’du mikate yini de nga ’bani akufi alenia ku, nga di wari mikate itizu ’diyi ombe bongosi ’izu budria ani.

³⁵Anzi Israelini ’ye ekile Musani ’yolerile, yi a’i onyiafa dahaburu, onyiafa meleru pie, bongo suza pie ’ba Misirini ’diyi vu;

³⁶te Yehova fe ’ba nde ’diyi dri asi ndriza isuzu ’ba Misirini ma milia, ’dini yi fe yi dri afa yini a’ile ’diyi ani. Yi opa ’ba angu Misiria ’diyi ma afa yiniru ’dinile.

³⁷Te anzi Israelini yi nga Ramesesia yi ca Sukotia. Agupi acipi pasi ’diyi yi ovu ekile alifu turu aziale, te lani anziyi ku.

³⁸’Ba ongulumuru yi osapi yi be ’diyi fu tu yi be, kabilo pie, ti pie, adaru anyapa be o’biru tu.

³⁹Yi nga mikate ibiru yini ejile Misiriari ozo akufi kokoru enya olemiru; isu de ’bani yi etule etu Misiriasirisi, econi ndra yini tezaru, ku, yi awuni mira nga nyaka ede yini ku.

⁴⁰Ewu anzi Israelini adrizu Misiriari ovu eli turu su drini kali na,

⁴¹Eri eca ’dinile, eli turu su drini kali na ka yi de ’bo, o’du nde ’darisi coti eri eca ’dinile ’ba ongulumuru Yehovani fu dria angu Misiriniasi ra.

⁴²Eri ovu ini yini e’yoni egale tu tani mbazu Yehova driri, erini yi ofule angu Misiriniarisi; ’diri ini nde Yehovaniri, anzi Israelini dria tani mbale tu azitasi a’bianzi yini vusiri.

⁴³Te Yehova ’yo Musa pi tia Aroni be, E’yo aziza omu agaza jo drilesirini eri ’di ani’ba ma nya ku;

⁴⁴te ati’ba dria ’bani jele afasi ’diyi, ka yi ma agele li ra, eco nyazaru ra.

⁴⁵Ani’bo pi ’ba azi ngapi oyasi ’diyi be ngani nya ku.

⁴⁶Emi nga eri nya jo alu ma alia; emi ma ’du za nderi ma joloko ji amve aluni ku; emi ma nyo vini fala erini aluni ku.

⁴⁷’Ba ongulumuru Israelini dria ma ’yeni.

⁴⁸Te ani’bo lapi emi vile anguari ka le omu agaza jo drilesiri ’ye Yehova dri, ma li agupi dria yi eselia ’diyi ma agele raka, erii ma esi ogogo eri ’yezu ndo eri nga ’di ovu ekile ’ba kari’barule tro tro. Te ’ba lile kuri ma nya aluni ku.

⁴⁹Azitani nga ovu alu kari’ba pi dri ani’bo emi eseliari be.

⁵⁰Anzi Israelini dria yi ’ye ’dini, ekile Yehovani azita fele Musa pi! dri Aroni berile, yi ’ye ’dini.

⁵¹Eri nga eca ’dinile etu ndesi, Yehova ofu anzi Israelini angu Misiriniasi ’ba ongulumuru yini vusi.