Read lugbara Efuza 13 Bible Online

Efuza 13 - lugbara bible

Efuza 13

¹Te Yehova ’yo Musa tia kini,

²Mi ope ndu ma dri aliriaanzi dria alaru; anzi alu alu andri ma opojo ti zipi oko anzi Israelini eselia ’diyi, kani ’ba anzini kani anyapa anzini; yi afa mani.

³Te Musa ’yo ’ba ongulumuru ma tia, Emi avi o’du ’dirisi ku, o’du nde emini fuzu Misiriasi engazu jo ati’baniarisiri’i, a’disiku Yehova ofu emi engazu pari ’diria dri okpo inisi; emi nya mikate akufi beri aluni ku.

⁴Emi fu andru ’dorisi mba Abibunisi.

⁵Azini eri nga ovu ’dinile, mi mamba azi ’diri ma ta mba ’dori vusi, Yehova ka nga mi ofi angu ’ba Kananini pini, Hitini pie, Amorani pie, Hivini pie, Yebusini pieri ma alia ra, angu nde erini oyo sole a’bi mini tia fezu mi dri, angu gapi tre lesu pisi anyu beria.

⁶Mi ma ya mikate akufi kokoruri o’du aziri, te o du azirisi omu Yehovani nga ovuni.

⁷Mi ma nya mikate akufi kokoru o’du aziri nde ’diyisi dria; ’ba ma ndre mikate akufi beri mi vu ku, ma ndre vini akufi mi vu ku angu mini ma eselia dria.

⁸O’du nderisi mi ma olu mva mini ma tia kini, E’yo ’diri ’dini a’disiku e’yo Yehovani ’yele ma vu mani efuria Misiriasirisi.

⁹Te eri nga ovu mi dri ecetaru mi dri agelia, azini e’yo egata fepiriru mi andretia, ’dini azita Yehovani ma ovu mi tilia ani; Yehovani mi ofule dri okporusi Misiria ’borisi.

¹⁰E’yo ’disi mi ma mba e’yo aziza ’diri ma ta eli vusi eli vusi ewu erini vusi.

¹¹Eri nga ovu ’dini, Yehova ka nga mi ofi angu Kananini ma alia ra, ekile erini oyo sole ndra mi tia azini mi atapi tiarile, eri ka nga angu nderi fe mi dri ra,

¹²mi ma ope Yehova vu aliriaanzi dria andri opojo ti zipi ’diyi, anzi anyapani tile oko ’diyi be; agupianzi anyapa agoru ’diyi be yi Yehovani.

¹³Mi ma onze akanya ganari mva tipi okori kabilomvasi; mi ka eri onze ku mi nyo ombeleni ra. Azini anzi mini ma eselia mi ma onze anzi osipi oko ’diyi dria ra.

¹⁴Eri nga ovu ’dinile, mva mini ka mi zi ewu azinisi kini, ’Di a’dini ya? mi ma ’yo eri tia, Yehova ofu ama Misiriasi dri okpo inisi jo ati’baniria.

¹⁵Eri eca ndra ’dini, Farau ma asi ka mba okporu ama ogazu muko si, Yehova ofu aliriaanzi angu Misirinia ’diyi dria, aliriaanzi ’bani, anyapa anzi tipi oko ’diyi be. E’yo ’disi ma efe anyapa dria agoru opojo ti zipi ’diyi edetaru Yehova dri; te aliriaanzi mani agupiru, ma yi onze dria ra.

¹⁶Eri nga ovu ecetaru mi dri agelia, azini afa a’diza mi andretiariru; Yehovani ama ofule Misiria dri okpo inisirisi.

¹⁷Eri eca ’dinile, Farau ka ’ba ongulumuru ku muzu ’boria, Mungu ceni yi dri geri angu Filistiniarisi ku, ka tro eri ogogo ti; Munguni ’yolerisi kini, ’Ba nde ’diyi kazu yi ojazu vile mvizu Misiria ku, yi ka nga omba ne ra.

¹⁸Te Mungu ce yi dri geri roko dria Miri Ekaru tiarisi. Te anzi Israelini yi tu angu Misiriniasi afa yini ombani be dria.

¹⁹Te Musa ’du fala Yusufuni i be; erini ndra fele anzi Israelini ma so oyo okporu kini, Ada Munguni nga emi andri ra; azini emi nga fala mani ji tualu emi be engazu angu ’doria-risi.

²⁰Yi nga enga Sukotia, yi aso hema yini Etamua ogogo roko tia.

²¹Yehova mu yi drilia etusi iriti pa sopi piriru yi driliari ma alia, te inisi aci pa sopi piriru yi driliari ma alia, diza fezu yi dri, ’dini yi eco muzaru etusi inisi beni;

²²iriti nde pa sopi piriru etusiri, azini aci nde pa sopi piriru inisiri, eceni ovuzu ’ba drilia ku.