Read lugbara Efuza 14 Bible Online

Efuza 14 - lugbara bible

Efuza 14

¹Te Yehova ’yo Musa tia kini,

²Mi ’yo anzi Israelini tia yi ma oja yi vile hema asozu Pihahiroti ovupi Migedoli pi ma eselia miri beri ma drilia, Baali-zefoni ma drilia; emi nga hema aso eri drilia miri kalaa ’aa’dosi.

³Te Farauni nga ’yo anzi Israelini ma ’eyosi, Angu ekila yi ci; angu rokoru ase yi ci.

⁴Te ma nga Farau ma asi ’ba mbazaru, eri nga yi vuti dro, te ma nga mani inzita isu Farau vu ani, ’ba erini ongulumuru ’diyi vu dria indi; ’ba Misiria ’diyi nga ni ma Yehova’i. Te yi ’ye ’dini.

⁵Te yi ece opi Misiriari dri e’yo ’bani apazu ’bori, te Farau pi ma asi oja yi ndu ati’ba erini ’diyi be ’ba nde ’diyi vu, yi ’yo ra, Ama ’ye ’doni a’dini ya, ’ba Israelini kuzu muzu azi nga kokoru ama dri?

⁶Eri ede gari ini ombaniri, eri ’du ’ba ini muzu i be tualu,

⁷eri ’du gari ombani opezaru turu azia, azini gari ombani dria Misiria ’diyi, ’ba yi drilia ’diyi be dria.

⁸Te Yehova ’ba Farau opi Misiriari ma asi mbazaru, eri bi anzi Israelini ma vuti, anzi Israelini yini fule Misiriasi arumadrisirisi.

⁹’Ba Misirini ’diyi dro yi ma vuti, akanya dria pie, gari ombani Farau vile dria ’diyi pie, ’ba nzupi akanya dria ’diyi pie, ’ba ongulumuru ’diyi be, yi isu ’ba Israelini yi aso hema yini ’bo, yi tia Pihahiroti ma kalaa, Baali-zefoni ma drilia.

¹⁰Farau ka eca ogogo, anzi Israelini enga yi mile uru, te mi ne, ’ba Misirini ’diyi ad yi ma vutia; yi ovu di urisi tu ani. Anzi Israelini nga di owu okposi Yehova vu.

¹¹Azini yi ’yo Musa tia kini, Mi eji ama odrazu roko dria, ’bile ’ba sazu ’diyini ovule Misiri ma alia yorisi ya? Mi ’ye ama ’dini a’di e’yosi ama ofuzu angu Misiriniarisi ya?

¹²Ama ’yoni ndra e’yo ’diri mi be Misiria ’da ku ya, ’yozu, Mi ku ama, ama ma nga azi ’ba Misirini dri ani? A’disiku azi ngazu ’ba Misiria ’diyi driri eri onyiru aga amani odrazu roko driari ra.

¹³Te Musa ’yo ’ba: ongulumuru tia, Emi ru ku, emi so pa ci, emi ne pata Yehovani erini e’dio ngale ’yele emi dri andruri; a’disiku ’ba Misirini emini ne andru ’diyi, emi ngani asi yi ne dika ewule ewule ku.

¹⁴Yehovani nga a’di’di emi drini,emi nga ovuciri.

¹⁵Te Yehova ’yo Musa tia, Mi owu ma vua’die’yosi ya? Mi ’yo anzi Israelini tia yi ma mu drile.

¹⁶Mi su kali mini uru, mi eju mi dri miri dria, mi co eseleni; anzi Israelini nga mu miri ma eselesi nyaku angaza ma driasi ani.

¹⁷Te ma’i, mi ne, ma nga ’ba Misirini ’diyi ma asi ’ba mbazaru, yi nga fi yi vutisi; te ma nga mani inzita isu Farau vu, ’ba ongulumuru erini dria pie, gari ombani erini pie, ’ba erini nzupi akanya dria ’diyi be.

¹⁸’Ba Misirini ’diyi nga ni ma Yehova’i ani, ma ka nga mani inzita isu Farau vu, gari ombani erini pie, ’ba erini nzupi akanya dria ’diyi be ’boria.

¹⁹Te malaika Munguni mupi ’ba ongulumuru Israelini ma driliari, eri oja i muzu yi vutiasi; azini iriti pa sopi piriru yi driliari oja i engazu yi driliarisi muzu yi vutialeru indi;

²⁰eri mu ri angu ’ba Misirini ’diyini ovuzuri ma eselia ’ba Israelini be. Iriti nde pi angu biza nde be yi indi, te iriti fe diza inisi; aluni ecani ogogo aziniri vu ku ini rra ani.

²¹Te Musa eju i dri miri dria; te Yehova fe miri awa i ini nderisi dria oli okporu engapi etuni efuriarisi, eri oja miri nyaku angazariru, yiniri co esele ra,

²²Anzi Israelini nga fi miri eseliasi nyaku angazaru driasi; yi nde ovu ekile abile yi dri ndia azini yi dri ejia.

²³Te ’ba Misirini ’diyi bi yi vuti, yi fi miri eseliasi yi vutia, akanya Farauni dria, gari ombani erini pie, ’ba nzupi akanya dria ’diyi be dria.

²⁴Eri eca ’dini angu trasi, Yehova lu ’ba ongulumuru Misirini ’diyi vu engazu aci piriru ma alia iriti beriasi, eri ecandi ’ba ongulumuru Misirini ’diyi tu.

²⁵Eri onze gari yini ma pa ra, ’dini sezani ovu di ani nzizaru; e’yo ’disi ’ba Misirini ’yo ra, Ama ma nzu Israeli ma miliasi; Yehovani a’di ’dile yi beni ’ba Misirini vurisi.

²⁶Te Yehova ’yo Musa tia, Mi eju mi dri miri dria, ’dini yi nderi ma omvi i dika ’ba Misirini ma dria beni, gari ombani yini pie, ’ba nzupi akanya dria ’diyi be.

²⁷Musa eju i dri miri dria, te anguni atiria miri nderi mvi okpo ini okuri vusi; ’ba Misirini yi o’bi apazu ra, te Yehova oze ’ba Misirini ’diyi ’barra miri alia.

²⁸Yi nderi nga di emvi, a’bu gari yini pie, ’ba nzupi akanya dria ’diyi pie, adaru ’ba ongulumuru Farauni fipi yi vutisi miri alia ’diyi be dria; yi ma alua aceni ku.

²⁹Te anzi Israelini aci yini nyaku angazaru ma dria miri eselesi; yi nde ovu abile yi ma dri ndia azini dri ejia indi.

³⁰’Dinile etu nderisi Yehova pa Israeli ’ba Misirini dria; azini ’ba Israelini ne ’ba Misirini ’diyi ma avu cinya dria yi tia.

³¹’Ba Israelini ne azi amboru Yehovani ’yele ’ba Misirini ’diyi ma ruaari, ’ba ongulumuru yi ru ani Yehovani tu; yi a’i Yehova pi ati’bo erini Musa be iri tro.