Read lugbara Efuza 15 Bible Online

Efuza 15 - lugbara bible

Efuza 15

¹Etu nderisi Musa pi anzi Israelini be yi ngo ongo ’diri Yehova dri, ’yozu kini, Ma nga ongo ngo Yehova dri, erini juru agale diza be turisi; akanya pi ’ba nzupi eri driari be, eri o’be yi miri ma alia ’bo.

²Yehova eri ovu okpo mani azini ongo mani, eri oja i pata maniru indi; ’diri Mungu mani, ma nga eri inzi ra, eri ovu Mungu ma atini, ma nga eri ’ba uru.

³Yehova eri ’ba ombaniri; ru erini Yehova’i.

⁴Gari ombani Farau vile ’diyi azini ’ba ongulumuru erini ’diyi be, eri o’be yi miri alia ’bo; azini ’ba asikari drilia erini opele ’diyi yi o’de Miri Ekaru etia ’bo;

⁵Yi aliru a’bu yi ra; yi si va yi aliru etia ekile onile ’bo.

⁶Yehova la, mi dri ndiri eri dizaru okpo minisi, Yehova la, mi dri ndiri eri ari’ba amani onyo nyingiriki.

⁷Ambo mini agapi driarisi, mi ’ba engapi mi ruaa ’diyi oze ’barra va; mi adra mini ma ti pe, eri yi ve ekile ase a’wile.

⁸Ava efupi mi ma omvuliarisi Yi mirini oku yi tualu ngurru, yi mirini so pa uru otukole, yi aliruri miri ma asia ku ku.

⁹Ari’bo ’yo ra, Ma nga yi vuti dro, ma nga yi bi, ma nga afa yini mani opale ’diyi awa ra, e’yo ma asini lele ’yeleri nga i ’ye yi ruaa. Ma nga sei mani nze, ma drini nga yi dri ja ra.

¹⁰Mi fe oli mini li, miri a’bu yi ani; yi o’de va yi amboru aliru etia ekile ’ye efile.

¹¹Yehova la, adrou ’diyi eselia a’di ovu milenini ya? A’di ovu mileni dizaru alatara mini ma aliasi, uri fezu inzita alia, e’yo osutaru ’yezuni ya?

¹²Mi eju mi dri ndiri, nyaku oki yi ra.

¹³Asi ndriza minirisi mi ce ’ba mini onzele ’diyi ma dri, mi ce yi dri okpo minisi cazu kpere pari alatararu mini ovuzuria.

¹⁴Suru yi eri ’bo, yi ya ya urisi; rua suza bi ’ba Filistia ’diyi ra.

¹⁵Etu nderisi opi Edomua ’diyi ma mile oka tu; ’ba okporu Moabua ’diyi ma rua ’ba ya ya; ’ba Kanania ’diyi dria aka di ’bo.

¹⁶Uri okporu ’de yi dria asi otiza be; wu okporu minisi yi oji dri ekile onile, ecazu ’ba minini agazu zozu ’boria, Yehova la, ecazu ’ba mini jele ’bo ’diyini agazu zozu ’boria.

¹⁷Mi nga yi ofi, sa oni mini awurusoru ma dria, Yehova la, pari nde mini edele mi dri ovuzu aleniari, Yehova la, pari alatararu nde mi drini ’baleri.

¹⁸Yehovani nga opi nya ’dani ’danini.

¹⁹Te akanya Farauni gari ombani erini be fi miri eseliasi ’ba nzupi akanya dria ’diyi be, te Yehova omvi yi mirini yi ma dria; te anzi Israelini ri aci nyaku angazaru ma dria miri eseliasi.

²⁰Te Miriamu nabi okuru, Aroni amvi, eri ’du arimva eri dria; oku dria efu eri vutia arianzi be, ongo inzitani tuzu indi.

²¹Te Miriamu omvi e’yo yi tia: Emi ngo ongo Yehova dri, erini juru agale diza be turisi; akanya pi ’ba nzupi driniari be, eri o’be yi miri alia ’bo.

²²Te Musa ce Israeli dri drile engazu Miri Ekarua, yi fi roko Suri ma alia; yi ad o’du pale na, te isuni yi ku.

²³Yi ka ca Maraa, isu yi econi yi Marani mvuzaru ku, yini ovule drazarurisi; e’yo ’disi ’da runi Mara’i.

²⁴Te ’ba ongulumuru ono Musa ruaa, kini, Ama nga di a’dimvuya?

²⁵Te eri wu Yehova vu; Yehova nga di pati ece eri dri, eri ’be eri yi alia, yi nderi nga i oja aluzaru ani. ’Dale pari nderia eri azi azita yi dri e’yo aziza be, o’bi yi vini ’dale indi,

²⁶azini eri ’yo, Mi ka o’duko Yehova Mungu minirini eri asi tezasi, mi ka e’yo ovupi onyiru eri miliari ’ye, bile cozu e’yo erini azileri vu, azita erini dria ma ta mbazu, ma ngani azo mani ’bale ’ba Misiria ’diyi ma ruaa ’diyi ’ba mi ruaa aluni ku; mani ovule Yehova mi rua atipiri’irisi.

²⁷Te yi ca Elimua, pari yi a’di adiza mudri drini irini azini itu kali azirini ovuzuria; yi aso hema yini ’dale.