Read lugbara Efuza 16 Bible Online

Efuza 16 - lugbara bible

Efuza 16

¹Yi nga Elimuarisi, te o’du mudri drini towi mba iri yini angu Misirini kuzuri ma vutiarisi, ’ba ongulumuru dria anzi Israelini ’diyi ca roko Sini ovupi Elimu pi ma eselia Sinai beria.

²’Ba ongulumuru dria anzi Israelini ’diyi ono Musa pi vu Aroni be roko dria ono ono.

³Anzi Israelini ’yo yi tia, Ama ka ndra di odra Yehova ma dria angu Misirinia ’daa ba, amani ndra riria otaka za beri ma tia, amani enya nyazu trazu indiria; te emi ofu ama roko ’dori dria ’ba ongulumuru dria ofuzu abirisi beni.

⁴Te Yehova ’yo Musa be, Mi ne ma nga fe enyani ’di mi dri ’bua ozoole; etuvusi etuvusi ’ba yi nga efu, yi nga eri oku ekile erini ecole etu ndesirile, ’dini ma ma o’bi yi ani, nizu kani yi nga aci azita mani ma alia kani yo ya.

⁵Eri nga eca ’dinile o’du aziasi, yi nga afa yini okule ejile joari ede, isu eri nga afa yini okule etuvusi etuvusiri aga pale iri.

⁶Te Musa pi Aroni be yi ’yo anzi Israelini tia dria, Ondresi emi nga ni Yehova ofu emi angu Misi-riniasi ’bo,

⁷azini o’bitisi emi nga diza Yehovani ne, a’disiku eri eri onoza emini onole Yehova ma driari ra. Te ama a’dini ya, ’dini emini onoza onozu ama dria ya?

⁸Musa ’yo, Te ondresi Yehovani nga emi dri za nyaza fe, o’bitisi enya ’bani trazuri’i, a’disiku Yehova eri onoza emini onole i ma driari ra; te ama a’dini ya? Onoza emini onoleri emi ononi ama dria ku te Yehova dria.

⁹Te Musa ’yo Aroni tia, Mi ’yo ’ba ongulumuru dria anzi Israelini ’diyi tia, Emi osi emi Yehova drilia ogogo, a’disiku eri eri onoza emini ’bo.

¹⁰Eri eca ’dinile, Aronini e’yo ’yoria ’ba ongulumuru dria anzi Israelini ma tiaria, yi lu roko dria, te mi ne, diza Yehovani efu iriti alia.

¹¹Te Yehova ’yo Musa tia kini,

¹²Ma eri anzi Israelini ma onoza ’bo; mi ’yo yi tia kini, Ondresi emi nga za nya, azini o’bitisi emi nga tra enyasi ra; ’dini emi nga ni ma Yehova Mungu eminiri’i.

¹³Eri eca ’dini ondresi, ali’bo eca, a’bu pari yini hema asozuri dria; azini o’bitisi andrali eri ’ya pari yini hema asozuri ma ageia kuru.

¹⁴Andrali ’yapiri ka ya ’bo, mi ne, afa nyiria olizaru roko dria, nyingirikia i ekile si nyaku driarile.

¹⁵Anzi Israelini yini eri neria, ’yo yi eselia, ’Di a’di afani ya? A’disiku yi nini eri a’di afani yari ku. Te Musa ’yo yi tia, Eri ovu enya Yehovani fele emi dri nyazaruri’i.

¹⁶’Diri ovu azita Munguni azileri: ’ba dria alu alu ma oku eri elille nyaza inini ovulerile; afazu goberu omvele omeriri alu ’ba dria dri alu alu, ’ba emini ’diyi ma kalafe vusi, ’ba ma ’du eri ’ba ovupi hema inia ’diyi vusi.

¹⁷Anzi Israelini ’ye ’dini, azini oku ambo, azini oku were.

¹⁸Yi ka eri o’bi gobe nderisi ’ba okupi ambori kuni jolokoni ku, ’ba okupi wereri yini fudri ra; yi oku eri nyaza yini vusi.

¹⁹Azini Musa ’yo yi tia, ’Ba aluni ma ku esani cazu o’bitisi ku.

²⁰Te ti, yi erini e’yo Musani ku; te ’ba azini yi eselia yi ku esani cazu o’bitisi, o’bu ti alenia ci, eri ngu ngu; Musa ovu aokosi yi vu ani.

²¹Yi oku eri o’biti vusi o’biti vusi ’ba dria nyaza yini vusi; te etu ka dri ra eri aka ra.

²²Eri eca ’dini o’du aziasi yi oku enya pale iri aga yini adrile okuleri ra, gobe iri ’ba alu alu dri; ’ba ’wara dria ’ba ongulumuruni ’diyi emu e’yoni ece Musa dri.

²³Eri ’yo yi tia, ’Diri e’yo Yehovani ’yole ’bori, Dru eri ava liza inzitaru, sabato alatararu Yehova driri; emi ozo afa emini lele ozoleri, emi a’di afa emini lele a’dileri, te emi ’ba emini joloko acepiri dria kalaa tani mbazu cazu dru o’bitisi.

²⁴Yi mba tani cazu o’bitisi, ekile Musani azilerile ra; nguni ku, o’bu tini alenia aluni ku.

²⁵Musa ’yo, Emi nya andru ’diri’i, o’du andrurini ovule sabato Yehovanirisi; emi ngani eri isu amve andru ku.

²⁶Emi oku eri o’du azia; te o’du aziriri sabatoni, o’du nderisi ngani ovu ku.

²⁷Eri nga eca ’dini 0’du aziririsi, ’ba azini yi eselia yi fu eri okuzu, te yi isuni ku.

²⁸Yehova ’yo Musa tia, Emi nga azita mani ga inzikokoru, e’yo mani, azile ’diyi be, izu ngopi ya?

²⁹Emi ne, Yehovani sabato fele emi dririsi, e’yo ’disi fe emi dri o’du aziarisi enya dri fupi o’du iri nde ’diyisiri ra; emi dria alu alu ma ri pari eminia, ’ba aluni ma fu i pariasi o’du aziririsi ku.

³⁰’Dini ’ba ongulumuru li ava o’du aziririsi.

³¹Te suru Israelini omve eri ma ru mana’i; eri ovu ekile kulu’bu efile emveru, ajini ovu ekile mikate were edele anyuososirile.

³²Musa ’yo, Di azita Yehovani azileri, Emi mba afa nderi o’bizaru gobe alusiri ma ta a’bianzi emini vusi, ’dini yi ma ne enya mani fele emi dri emi ezozu roko dria mani emi ofuria angu Misiriniasiri.

³³Musa ’yo Aroni tia, Mi ’du imvu, mi ’ba gobe alu manani alenia, mi mba tani Yehova drilia a’bianzi emini ngapi efupi emi vutia ’diyi dri.

³⁴’Dini Aroni ’ba eri E’yo Eti Nzezaniri ma drilia tani mbazu ekile Yehovani azile Musa Itiarile.

³⁵Anzi Israelini nya mana nderi eli kali su, de nga yi cani angu ’ba beria ku; yi nya mana kpere yini cazu lokiri Kananiniria.

³⁶(Isu gobe alu ovu afazu abakaru ma esele mudri ma azi aluri.)