Read lugbara Efuza 18 Bible Online

Efuza 18 - lugbara bible

Efuza 18

¹Te Yetero kuhani Midianiari, Musa anyi, eri e’yo dria Munguni ’yele Musa pi vu, Israeli ’ba eri vile ’diyi beri, e’yo Yehovani Israeli ofuzu Misiriasi ngoni ngoniyari.

²Yetero Musa anyi ’du Zipora Musa vile okuri, Musani ndra tini pele tezu o’dipiari,

³agupianzi erini iri ’diyi be; aluri ma ru Gerisomu’i2 (a’disiku Musa kini, Ma ovu ndra ani’boru angu azinia),

⁴aziniri ma ru Eliezeri’i (a’disiku eri kini, Mungu ma atiniri ko ndra ma aza ra, pa ma sei Farauni ma siasi ra).

⁵Yetero Musa anyi ca Musa vu, anzi erini piyi oku erini be, pari erini hema asozu roko dria oni Mungunia.

⁶Eri ’yo Musa tia, Ma Yetero mi anyi, ma eca mi vu oku mini be, agupianzi erini iri ’diyi eri be indi.

⁷Te Musa fu dri fuzu anyi ini be, eri osi kumuti eri drilia, eri o’de eri ombelekoa inzitasi; yi ozi yi eselia e’yo ngoni ngoni yari, yi fi hema alia.

⁸Azini Musa olu anyi tia e’yo dria Yehovani ’yele Farau pi vu ’ba Misiria ’diyi be Israeli ma e’yosiri, azini candi okporu dria yi isupi geria ’diyi, azini e’yo Yehovani yi pazu ngoni ngoni yari.

⁹Te Yetero ma asi ovu ayikosi e’yo onyiru dria Yehovani ’yele Israeli vurusi, a’disiku erini yi pale ’ba Misiria ’diyi ma driarisi.

¹⁰Te Yetero ’yo, Yehova ma ovu inzizaru, eri’i emi papi ’ba Misiria ’diyi ma dria, azini Farau ma dria ’bori; eri’i ’ba nde ’diyi papi ’ba Misiria ’diyi ma dria ’bori.

¹¹Curu’do ma ni Yehova ovu amboru aga adrou dria ra, adaru eri aga yi e’yo yini ’yele yi ruaa dri mbazasiri ma alia ra.

¹²Yetero Musa anyi ’du afa veza edeta edezuri, edeta edeza azini be fezu Mungu dri; te Aroni eca ’ba ’wara Israelini ’diyi be dria nyaka nyazu Mungu drilia tualu Musa anyi pie.

¹³Dru ’dini Musa ri va e’yo lizu ’ba nde ’diyi dri, ’ba yi so pa Musa ageia engazu o’bitisi ecazu kpere ondresi.

¹⁴Musa anyi ka e’yo dria erini ’yele ’ba nde ’diyi vuri ndre, eri’yo ra, Mi ’dini ’ba vu a’di ’e’yo ’ye ya? Mi ri a’dule, te ’ba dria yi so pa mi ageia engazu o’bitisi ecazu kpere ondresi, efini ngoni ya?

¹⁵Musa omvi anyi tia, A’disiku ’ba yi emu ma vu e’yo zizu Mungu tia;

¹⁶yi ka ovu e’yo be yi emu ma vu, te ma e’yo yi ma eselia agyi beri li, azini ma yi imba azita Mungunisi, e’yo erini azile ’diyi be.

¹⁷Musa anyi ’yo eri tia, E’yo mini ’yeleri ovuni onyiru ku.

¹⁸Okpo mini nga de ra ada, mi’i ’ba nde ovupi tualu mi be ’diyi be, e’yo nderi ovu mi dri nzizaru aga ra; mi econi eri ’yezaru a’dule ’ku.

¹⁹Curu’do mi eri e’yo ma tiari; ma mini e’yo ama, azini Mungu ma ovu mi be! Mi ma ovu ’ba pa sopi Mungu pi ma eselia ’ba nde ’diyi beri, mi ma ji e’yo ’bani Mungu vu;

²⁰te mi ma imba yi azita nizu azini e’yo azile ’diyi be, mi ma ece yi dri geri onyiru yini ngazu acizuri, azini azi onyiru yini ngale ’yeleri indi.

²¹Mi ma ope vini ’ba nde ’diyi ma eselia dria ’ba onduaru Mungu rupi ’diyi, ’ba adaru, ’ba afa ’ba ti razuri ngupi onzi ’diyi; mi ’ba ’ba ’dinile ’diyi ’ba nde ’diyi ma drilia, ovuzu opiru ’ba alifu ’diyi ma drilia, azini ’ba turu ’diyi ma drilia, azini ’ba kali towi ’diyi ma drilia, azini ’ba mudri ’diyi ma drilia.

²²Mi ku yi ma li e’yo ’ba nde ’diyini o’du dria; eri nga eca ’dini, e’yo ambo ambo ’diyi dria yi nga eji mi vu, te e’yo were were ’diyi dria yi nga lini;dini e’yo nderi ngani ovu ewaru mi dri ku, te yi nga e’yo nde ma nziza ’du mi be tualu.

²³Mi ka e’yo ’diri ’ye, Mungu ka mi dri azita fe ’dinile, ka’dini mi nga eco e’yo ’yezaru okpo be ’dani ani, azini ’ba nde ’diyi dria nga mvi pari yinia asi anzuru be.

²⁴’Dini Musa eri e’yo i ma anyi tiari ra, eri ’ye e’yo dria erini ’yolerile.

²⁵Musa ope ’ba onduaru ’ba dria Israelini ma eselia, eri ’ba yi opiru ’ba nde ’diyi ma drilia, ’ba alifu ’diyi ma drilia, azini ’ba turu ’diyi ma drilia, azini ’ba kali towi ’diyi ma drilia, azini ’ba mudri ’diyi ma drilia.

²⁶Te yi li ’ba nde ’diyi ma e’yo o’du dria; e’yo ewaru ’diyi yi eji Musa vu, te e’yo were were ’diyi dria yi li yi’i.

²⁷Te Musa fe di geri i anyi dri; eri ’du geri erini muzu i vile angua.