Read lugbara Efuza 19 Bible Online

Efuza 19 - lugbara bible

Efuza 19

¹Mba na anzi Israelini yini efuzu anga Misiriasi ’bori ma eselia, o’du nderisi yi ca roko Sinaiaria.

²Yini engaria Refi-dimua ’boria, ka ca roko Sinaiaria ’bo, yi aso hema yini roko dria; ’dale Israeli adri oni nderi ma drilia.

³Te Musa nga di tu Mungu vu, te Yehova omve eri oni alia o’dukosi ’yozu, Mi ma ’yo ’dini suru Yakoboni tia, mi olu e’yo anzi Israelini ’diyi ma tia indi:

⁴Emi ne e’yo mani ’yele ’ba Misiria ’diyi ma ruaari ra, mani emi ’duzu uru aji opilesi, emi ejizu ma ngulupi vuri.

⁵Ka’dini curu’do emi ka e’yo ma tiari inzi ada, emi ka aziza mani ma ta mba, ka ’dini emi nga ovu ma ngulupi ma afaru engazu suru dria ma eselia; a’disiku nyaku dria ovu mani,

⁶emi nga adri ma dri suru atalau edeta edepi ’diyiniru, azini suru alatararuri. E’yo mini ngale ’yole anzi Israelini tia yi ’diyi.

⁷Musa emu ’ba ’wara ’ba nde ’diyini omve, eri ece e’yo dria Yehovani azile eri dri ’diyi yi drilia.

⁸’Ba nde dria omvi e’yo tualu kini, Ama nga e’yo dria Yehovani ’yoleri ’ye ra. Te Musa nga di e’yo dria ’ba nde ’diyini ’yoleri ece Yehova tia.

⁹Te Yehova ’yo Musa tia, Mi ne, ma nga emu mi vu iriti asepi iniciciri, ma alia, ’dini ’ba nde ma eri mani e’yo ’yoria mi be, ma a’i mi ani ’dani ’dani beni. Musa ece Yehova tia e’yo ’ba nde ’diyini ’yoleri.

¹⁰Yehova ’yo Musa tia, Mi mu ’ba nde ’diyi vu, mi ’ba yi alaru andru azini dru, yi ma oji bongo yini,

¹¹ma ovu ngonde o’du narisi; a’disiku o’du na nderisi Yehovani nga esi va oni Sinai ma dria ’ba nde ma milia dria.

¹²Mi ma ede lokiri ’ba nde dri kala vusi kuru kuru, kini, Emi te emi agei, emi kazu tuzu oni dria ku, kani oni ma kala elozu ku; ’ba oni elopiri yi nga eri fu ada;

¹³dri aluni ngani ’ba nderi elo ku, te adaru yi nga eri o’be onisi kani ca ’yesi; kani anyapani kani ’bani, eri ngani ovu idriru ku. Guka ka owu izu, yi ma esi oni vu ogogo.

¹⁴Musa esi oni driarisi ’ba nde ’diyi vu va, eri ’ba yi alaru; yi i oji bongo yini indi.

¹⁵Eri ’yo ’ba nde ’diyi tia, Emi ede emi ngonde o’du nari tezu; emi mu ogogo oku vu ku.

¹⁶Eri eca ’dini o’du na nderi ma o’bitisi, angu onoza piyi ovi ogaza be, iriti asepi iniciciri be oni dria, o’duko gukani okporu turi be; ’ba dria ovupi pari yini hema asozuria, ’diyi ma rua ya ya.

¹⁷Musa nga ’ba ’diyi ofu pari yini hema asozuriasi muzu yi isuzu Mungu be; te yi so pa oni etia.

¹⁸Acika enga oni Sinai dria dria, Yehovani esile va eri dria aci aliarisi; te acika nderi nga ru uru ekile ci drole amboruri ma acikale, oni nderi dria nga ya ya okporu.

¹⁹O’duko gukani ka wu i erezu okporu dika dika, Musani e’yo ’yo, Munguni e’yo omvi tinia o’dukosi.

²⁰Te Yehova nga esi oni Sinai ma dria kpere drini mbiliria; Yehova nga Musani omve tuzu oni dri mbiliria; Musa tu ra.

²¹Yehova nga ’yo, Musa tia, Mi si va, mi azi e’yo ’ba nde ’diyi dri, yi kazu lokiri agazu Yehovani nizu milesi birri ku, yi ma azi kazu odrazu kakau ani ku.

²²Mi fe ’ba edeta edepi osipi ogogo Mungu vu ’diyi ma ’ba yi alaru indi, Yehova kazu e’dezu yi ma dria adrasi ku.

²³Te Musa nga ’yo Yehova tia, ’Ba nde econi tuzu oni Sinai dria ku; mini azita fele ama dri ’borisi kini, Mi osi lokiri oni ageia, mi ’ba eri alaru.

²⁴Yehova nga ’yo eri tia, Mi mu, mi si va, mi nga eru uru, emi Aroni be tualu; te ’ba edeta edepi ’diyi ’ba nde be yi ma anyo lokiri agazu tuzu Yehova vu ku, eri kazu e’dezu yi ma dria adrasi ku.

²⁵Ka’dini Musa nga si va ’ba nde vu, olu yi tia ra.