Read lugbara Efuza 21 Bible Online

Efuza 21 - lugbara bible

Efuza 21

¹E’yo liza mini ngale ’bale yi ma drilia ’diyi yi ’di.

²Mi ka Ebraniou je ati’boru, eri ma nga azi eli azia, te eli aziririsi ma tru eri pirini, ma onze afasi ku.

³Eri ka ndra fi a’dule, ma fu a’dule; ka ndra ovu oku be ka, oku erini ma fu eri be tualu.

⁴Agu eri jepiri ka eri dri oku feni, eri ka agupianzi ti eri dri kani ezoanzi be, oku nderi anzi yini be yi ovu afa agu eri jepirini, i ati’bo nderi ma fu a’dule.

⁵Te ati’bo nderi ka ’yo mgba kini, Ma le ’ba ma jepiri, oku mani pie, anzi mani be; ma leni ma tru ma ku,

⁶ka ’dini ’ba eri jepiri ma ji eri Mungu drilia, ejizu jotilea kani jotile kalaa; te ’ba eri jepiri nga bi erini lu aya si ndririsi; eri nga azi nga eri dri ’dani ’dani.

⁷’Ba azini ka zamva ini fe ozi ati’boru, eri ma fu ati’ba agupiru ’diyini fulerile ku.

⁸Eri ka ayiko fe ’ba eri jepiri dri ku, ndra ’yepi eri ’dupi oku eriniruri’i, ma onze eri onze onze; okpo erini eri fezu jezu ’ba jururu dri yo, a’disiku ’ye eri lokirisi ’bo.

⁹Ka eri azi mva ini dri okuru, eri ma ’ye eri vu ekile ’bani adrile ’yele ezopi vurile.

¹⁰Te eri ka oku azini bi ti, eri ma fe nyaka erini pi, bongo erini pie, adriza erini oku bizaniri be dria ma anu ku.

¹¹Te eri ka e’yo na ’diyi ’ye eri dri ku, oku nderi nga fu truzaru pirini onzekokoru.

¹²’Ba ka ’ba azini co kai, yi ma fu eri ecekokoru.

¹³Te ’ba ka ’ba azini mba fu aka ku, te Mungu fe eri eri ma driani, ka’dini ma nga pari erini apazuri azi.

¹⁴Te agu ka mu pirimasi ’ba eri jo ejeliari vu eri fuzu lokirisi, mi nga eri nze pari ma dri edeta edezuriarisi ra, ma dra ra.

¹⁵’Ba i atini kani i andrini copiri, ma fu eri ecekokoru.

¹⁶’Ba azini ka i agyini ogu jezu, te ka eri isu eri ma dria, ma fu eri ecekokoru.

¹⁷’Ba i atini kani i andrini o’dapiri, ma fu eri ecekokoru.

¹⁸Te ’ba ka yi fu yi eselia, ’ba alu ka agyini di onisi, kani drisi, te eri ka dra ku, eri la pari dria va,

¹⁹eri ka enga dika, eri ka ad kali erinisi amve, ’ba eri copiri ngani ovu e’yo liza be ku; te eri ma ofe eri o’du erini ovuzu azoru ’diyi vusi, eri ma omve eri cazu ruani atizu teketekeria.

²⁰Agu ka ati’bo agupiru kani ati’bo okuru erini co kalisi, ka dra eri ma dri agelea, eri nga e’yo onzi isu i dria ecekokoru.

²¹Te ati’bo nde ka la etu alu kani iri, eri ngani e’yo onzi isu i dria ku; a’disiku ati’bo nderi ovu afa erini.

²²Te ’ba ka yi fu yi eselia, ka oku oporovuru ’ye onzi, mva erini ka e’be ani ra, te vutinia dra azini ka e’da ku, adaru eri ngani ece ku ofezu ekile oku nderi ma agupini lile eri ma driarile; te eri nga ofe ekile ’ba e’yo lipirini lilerile.

²³Te dra azini ka e’da vutinia ani, ka ’dini mi ma ofe idri ma aroti idrisi,

²⁴mile ma aroti milesi, si ma aroti sisi, dri ma aroti drisi, pa ma aroti pasi,

²⁵veza ma aroti vezasi, nyibileko ma aroti nyibilekosi, coza ma aroti cozasi.

²⁶Agu ka ati’bo erini ma mile kani ati’bo okuru erini ma mile co, eri ka dra ra, ma tru eri pirini mile erini ma e’yosi.

²⁷Te eri ka ati’bo agupiru eriniri ma si kani ati’bo okuru eriniri ma si gba, ka ’de ra, ma tru eri pirini si erini ma e’yosi.

²⁸Ti ka agupi kani oku fu o’yusi, ka dra ra, ma o’be ti nderi onisi, ma nya zani ku; te ti e’i ngani ovu e’yo liza be i dria ku.

²⁹Te ti nde ka ndra adri ovu ombaru oku drio ra, ece e’yo nderi e’i dri ra, te ti, ’ini eri ku, eri fu agupi kani oku ani, ma o’be ti nderi onisi, ma fu ti e’ini indio

³⁰Te ’ba ka avuta li eri ma dria, eri ma ofe yini lile eri ma driarile idri ini onzezu.

³¹Ti nderi ka mvi erini fu kani zi erini fu ra, ma ’ye eri e’yo liza ’diri vusi.

³²Ti ka ati’bo agupiru kani ati’bo okuru fu o’yusi, ti e’i ma fe ’ba yi jepiri dri seke i kali na dahabuni, azini ma o’be ti nderi onisi.

³³Agu ka ’bile ma ti zi, kani ka ’bile ga te ka tileni ase ku, ti kani akanya ka ’de alenia ani,

³⁴’bile e’ini nga ofeni; eri nga silingi fe anyapa e’i dri, te anyapa avu nderi nga ovu erini.

³⁵’Ba azini ma ti ka ti ’ba azinini fu, ka dra ani, yi nga ti idriruri fe ozi, yi nga ajeni awa yi eselia; yi nga avururi awa indio

³⁶Te yi ka ni ti nderi adri ’ba ofu o’yusi drio ra, te di e’i ’ini eri ku, adaru eri nga ti nderi ma aroti ofe tisi, te ti avuni nga ovu erini.