Read lugbara Efuza 22 Bible Online

Efuza 22 - lugbara bible

Efuza 22

¹Agu ka ti ogu, kani kabiloni, eri ka eri li kani ozi ra, eri nga ti ofe towi ti nde aluri ma arotiru, kani kabilo su kabilo alu ma arotiru.

²Te ka oguou isu jo eti luria, ka eri co kai, ka dra ra, ma ofe arini ku;

³te etuni efuzu drinia ’borisi, yi arini ofe ra. Te oguouni nga afa erini oguleri ofe; te ka eco ofezu ku, eri nga ovu jezaru ati’boru ogu erinisi.

⁴Te anyapa erini oguleri ka nga ovu idriru eri vu, eri ka ovu tini, kani akanyani, kani kabiloni, eri ma ofe pale iri.

⁵Te ’ba azini ka ’ba azini ma amvu fe eza, kani amvu zabibuni, ka anyapa erini ku saaru erini ’ba azini ma amvu ezazu ani, agu nderi nga afa esele onyiru agapi ra i vile amvuari, kani afa esele onyiru agapi ra nga i vile amvu zabibuniari, ofe tinia.

⁶Aci ka i pa, ka ti ko oci ruaarisi, ’dini anya go driari, kani lole nga kuri, kani amvu nde ma adani ka ve, adaru agu ad nderi dupiri nga ofeni.

⁷’Ba azini ka silingi kani afa fe ’ba aku erini ejeliari dri tani mbazu, te ’ba azini ka nga eri ogu agu nde vile joarisi ra, yi ka oguou nde isu ra eri ma ofe pale iri.

⁸Te ka oguouni isu ku, jo e’i ma esi ogogo Mungu vu e’yoni ndazu kani i ma ngulupi su i dri i agyi ma afa alia ku ya.

⁹E’yo ezatanisi dria, kani e’yo tini, kani akanyani, kani kabiloni, kani bongoni, kani afa ngoni ngori ka avi, ’ba aluni ani ’yozu, Eri ’di’i-ri ma e’yosi, yi iri tro ma e’yo ma eca Mungu drilia; ’ba Munguni e’yoni lile onziri nga i agyini ofe pale iri.

¹⁰’Ba azini ka akanya fe, kani tini, kani kabiloni, kani anyapa azini ’ba i aku ejeliari dri tani mbazu, ka dra ra, kani afa azini ’ye erini, kani agu dro eri ’bani nekokoru,

¹¹oyo soza Yehovani ma adri yi ma eselia iri tro, e’yoni ndazu kani i su i dri i ma agyi ma afa alia ku ya; te anyapa nderi ma e’i ma a’i e’yoni ra, agu nderi ngani ofe ku.

¹²Te eri ka ovu oguzaru eri vu ’dasi, eri ma ofe e’i dri be.

¹³Te nguru ka eri cini, eri ma eji avuni ecezu, eri ngani nguruni cileniri ofe ku.

¹⁴Agu ka anyapa a’i i agyi dri, afa ka eri ’ye ra, kani dra dra, e’ini ovuzu yoria, eri ngani ece ofezu ku.

¹⁵E’i ka ovu indi, eri ngani ofe ku; ka eri omve azi ngazu oyasi, eri emu mi vu oya nde ’dasi.

¹⁶’Ba azini ka zamva ’bale jele kuri ma bile o’bu, ka la erisini, eri ma fe a’bu eri jezu oku eriniru ecekokoru.

¹⁷Ati ka ga eri fekokoru eri dri si, eri ma ofe ali alirianiri’i.

¹⁸Mi ma ku oku enaa beri ma ovu idriru ku.

¹⁹’Ba dria alu alu lapi anyapa beri, ma fu eri ecekokoru.

²⁰’Ba edeta edepi Mungu azini dri, kiri Yehova dri a’dule kuri, ma ja eri dri teketeke ra.

²¹Emi ma ’ye ani’bo onzi ku, emi inza eri ku indi, emini ovule ndra angu Misirinia ani’banirisi.

²²Emi ecandi oku awuzioru kani mva imvoaruri ku.

²³Mi ka yi dri candi fe e’yo ngonirisi ti, yi ka wu ma vu, ma nga wuta yini eri adaru;

²⁴adra mani nga di aciru, ma nga emi ofu seisi, oku emini nga ovu awuzioru, anzi emini nga ovu imvoanziru indi.

²⁵Mi ka silingi fe ’ba alioru ’ba mani ovupi mi be ’diyi ma eseliari dri mariru, mi ma ovu ekile ’ba adripi mari fepirile ku, mi ’ba drinia orodri azini ku.

²⁶Mi ka bongo ’ba aku mini ejeliarini ’du toboru, mi ma omvi eri dri de etu ’deni ku;

²⁷a’disiku bongo nderi ovu bongo erini alu a’dule i ma rua a’buzuri; eri nga la a’disi ya? Eri nga eca ’dini, eri ka wu ma vu, ma nga eri ra, mani ovule asi ndriza berisi.

²⁸Mi ma o’da Mungu ku, mi ma otri ambo suru emininiri ku indi.

²⁹Mi ma te ku anya kapi mi vile a’ucea ’diyi ma esele fezu ma dri, azini patiefi su mini ma esele indi. Mi fe ma dri amuruamva osipi oko agupianzi mini ma eseliari.

³⁰Mi ’ye ’dini indi ti minisi, kabilo mini pie; eri ma ovu andri erini be o’du aziri, o’du arosi mi ma fe eri ma dri ndo.

³¹Te emi ma ovu ’ba alatararu ma dri; e’yo ’disi mi nya za nguruni die aseaniri aluni ku; mi ’be eri oce dri.