Read lugbara Efuza 23 Bible Online

Efuza 23 - lugbara bible

Efuza 23

¹Mi ma oji e’yo inzoru ku. Mi eci ti ’ba e’yo onzi ’yepi ’diyi be e’yo inzoru ma eti nzezu ku.

²Mi ma bi ’ba ongulumuru ma vuti e’yo onzi ’yezu ku; mi ma nze e’yo ma eti, mini mi ojaria vile ’ba ongulumuru ma vutia e’yo liza kililiru ezazu ku indi;

³azini vini mi ma ovu asi ndriza be ’ba alioru vu alio erinisi ku.

⁴Mi ka ari’bo mini ma ti kani akanya avipiri isu ra, mi ma omvi eri dri ece kokoru.

⁵Mi ka akanya ’ba mi ngupi onzirini ne erini laria nyakua afa nziza erini ejileri ma etia, asi mini ka le eri aza ko ku ti, mi nga eri aza ko be.

⁶Mi ma eza alio mini ma e’yo liza kililiri ku.

⁷Mi da mi e’yo inzorurisi ziri, mi fu ’ba e’yo onzi ’yepi kuri pi ’ba onyi beri be ku, a’disiku ma ngani ’ba onziri ja ’ba kililiru ku.

⁸Mi ma a’i afa fele ’ba ti razuri ku, a’disiku afa fele ’ba ti razuri ’ba mile beri ma mile obi, azini eri ’ba kililiruri ma e’yo ’yoza oja inzoru.

⁹Mi ma inza ani’bo ku; a’disiku emini asisile ani’boni nile rarisi,i emini ovule ndra angu Misirini ma alia ani’banirisi.

¹⁰Mi fa ori amvu mini ma alia eli azia, mi oku afa kapi alenia ’diyi indi;

¹¹te eli azirisi mi ku eri ma oji ovuzu tokoru, ’dini ’ba alioru suru mini ma eselia ’diyi ma nga nya beni; afa yini kuleri anyapa asea yi nga nyani. Mi ma ’ye ’dinile nga zabibuni miniri be, nga mizeituni miniri be indi.

¹²Mi ma nga azi mini o’du azia, te o’du azirisi mi ma li ava: ti mini pi akanya mini be ma li ava ani, oku ati’boru mini ma mva pi, ani’bo be, ma isu okpo o’diru beni.

¹³Mi mba e’yo dria mani ’yole mi tiari ma ta; mi omve adrou ma ru aluni ku, ’ba ma eri vini yi ma ru mi tilia ku indio

¹⁴Eli alu ma alia pale na mi ma ’ba omu amboru ma dri.

¹⁵Mi ma mba o’du omu mikate akufi kokorurini ma ta; mi ma nya mikate akufi kokoru o’du aziri, mani ndra azile mi tiarile, emi ma nya eri mba Abibuni ma alia o’du mani ndra azilerisi, a’disiku emi efu Misiriasi mba nderisi. ’Ba aluni ma eca ma drilia dri be pirini ku.

¹⁶Azini omu anyadri nyazuri, azi okporu mini ma efi kapi okori, mini fale nga aliari. Azini vini omu anya aroefi nyazuri elini i deria, ewu mini azi okporu mini ma efi kaza okuzu ngaasiri.

¹⁷Pale na eli vusi agupi emini dria ma e’da yi Opi Yehova ma drilia.

¹⁸Mi ma fe edeta mani ma ari tualu mikate akufi beri be ku, azini vini oso fele omu maniari ma la ini rra cazu o’bitisi ku.

¹⁹Anyadri ma esele kapi okokele angu mini ma aliari, mi ma eji Yehova Mungu mini ma joa, Mi ma a’di ndrimva andri ma lesusi ku.

²⁰Mi ne, ma malaika ti pe mi drilia, mi ta mbazu geria, mi jizu pari mani edele ’boria.

²¹Mi ma ovu inzitasi eri vu, mi eri o’duko erini, mi fe aoko ma nya eri ku, a’disiku ngani ezata mini ku ku; ma runi ovule eri aliarisi.

²²Te mi ka o’duko erini eri adaru, ka e’yo dria mani ’yoleri ’ye, ma nga ovu jururu juru mini vu, azini ’ba yi ecandipiriru ’ba mi ecandipi ’diyi dri.

²³A’disiku malaika mani nga mu mi drilia, mi jizu ’ba Amorini pi vu, ’ba Hitini pie, ’ba Perizini pie, ’ba Kananini pie, ’ba Hivini pie, ’ba Yebusini pie, ma nga yi dri ja ra.

²⁴Mi ma osi kumuti mini va adrou yini drilia ku, mi ma nga azi yi dri ku, mi ma ’ye ’yeta yini vusi ku, te mi ma ogu yi va teketeke, ma onyo pati yini i’dile inzizaru ’diyi nyingi riki.

²⁵Emi ma nga azi Yehova Mungu emini dri, eri nga asi ndriza ’ba enya mini pi ma dria, yi mvuza mini be ani; ma nga azo nze emi eselia ra.

²⁶Angu minia oku aluni ma mva ngani e’be ku, aluni ngani ovu ondoru ku indi; ma nga ewu mini se izu cazu de tia.

²⁷Ma nga afa uriuriruri ma ti pe mi drilia, ma nga asi otiza fe ’ba dria mini ngazu cazu yi vu ’diyi dri, azini ma nga fe ari’ba mini dria ma oja yi nguku mi drilia.

²⁸Ma nga dirili ma ti pe mi drilia, eri nga ’ba Hivini piyi dro mi drilia, ’ba Kananini pie, ’ba Hitini pie.

²⁹Ma ngani yi dro eli alu ma alia coti ku, angu kazu cazu andruru ku, anyapa asea ’diyi kazu ezuzu mi ageia ku.

³⁰Ma nga yi dro were were mi drilia kpere etu mini ezuzu tre angu nyazu mi afaruria.

³¹Ma nga angu mini ma lokiri ’ba engazu Miri Ekarua cazu miri ’ba Filistiniria, azini engazu rokoa cazu Yi Ara nderia; a’disiku ma nga ’ba ovupi angu nde ma alia ’diyi fe mi dria, te mi nga yi dro mi drilia ra.

³²Mi azi aziza yi be ku, kani adrou yini be ku indio

³³Yi ma ovu angu mini a ku, yi kazu fezu mini onzi ’yezu ma vu ku; a’disiku mi ka azi nga adrou yini dri, e’yo nderi nga ovu mi dri awule ada.