Read lugbara Efuza 24 Bible Online

Efuza 24 - lugbara bible

Efuza 24

¹Eri ’yo Musa tia, Mi’i, mi etu uru Yehova vu, Aroni pie, Nadabu pie, Abihu pie, ’ba ’wara Israelini kali aziri ’diyi be, emi so pa ma inzizu re.

²Te kiri Musa a’dule ma emu Yehova vu ogogoni; te yi ma emu ogogo ku, azini ’ba ongulumuru ma etu eri be ku indi.

³Te Musa eca e’yo dria Yehovani ’yoleri ecezu ’ba ongulumuru dri, e’yo liza be dria; ’ba ongulumuru omvi e’yo o’duko alusi kini, Ama nga e’yo dria Yehovani ’yole ’bori ’ye ra.

⁴Te Musa si e’yo dria Yehovani ’yoleri ra. Eri enga o’biti drio drio, eri si pari edeta edezuri oni nde etia, oni biza izu izu ageinia mudri drini iri suruti Israelini mudri drini iri ’diyi vusi.

⁵Eri pe karile anzi Israelini eselia ’diyi ma ti afa edetaru vezu, yi so ti edeta asi anzuruni ’diyi Yehova dri.

⁶Te Musa abe ari iri, osu ari ma azi okele alia, oya ari nderi ma aziri pari edeta edezuri ma dria.

⁷Eri ’du buku azizani, la eri ’ba ongulumuru bilia; te yi ’yo, Ama nga e’yo dria Yehovani ’yole ’bori ’ye ra, ama nga yi inzi ra.

⁸Te Musa ’du ari nderi, eri oya eri ’ba ongulumuru dria, kini, Emi ne, aziza Yehovani azile emi be e’yo ’diyi dria ma e’yosiri ma ari ’di.

⁹’Di ma vutia Musa pi tu Aroni pie, Nadabu pie, Abihu pie, ’ba ’wara kali aziri Israelini ’diyi be,

¹⁰te yi ne Mungu Israelini ra; eri ma pa etia oni otile ’dere ’dere ’diyi indi, ekile oni ajeambosi safirarurile, ’ba ma milia nezaniri ’bu ma mileni ovule alatararurile.

¹¹Eri ’bani i ma dri ’ba anzi Israelini ma dri cepi ’diyi ma dria ku; te yi ne Mungu, yi nya, yi mvu indi.

¹²Te Yehova ’yo Musa tia, Mi etu ma vu oni dria, mi ovu ’daa; ma nga mi dri oni ’bararu, mani azita Pi sizu e’yo azile ’diyi be ’bori fe, ’dini mi ma imba yi beni.

¹³Te Musa pi nga Yosua eri ma aza kopiri be, Musa nga di tu oni Munguni dria.

¹⁴Eri ’yo ’ba ’wara tia, Emi te ama ’doa, cazu etu amani ecazu emi vu dikaria; emi ne, Aroni pi Huri be ovu emi be ’di; ’ba ka ovu e’yo be eri ma emu di yi vu.

¹⁵Te Musa tu uru oni dria, iriti a’bu oni nderi ma dri ci.

¹⁶Diza Yehovani ri oni Sinai ma dria, iriti a’bu eri o’du azia; o’du azirisi eri omve Musani iriti aliasi.

¹⁷Diza Yehovani e’da i anzi Israelini ’diyi ma milia wura be ekile aci vepi dipi okporu oni mbili ma driarile.

¹⁸Te Musa fi iriti ma eselia agadua, tu oni dria. Musa ovu di oni dria etu kali su, ini kali su.