Read lugbara Efuza 25 Bible Online

Efuza 25 - lugbara bible

Efuza 25

¹Yehova ’yo Musa tia kini,

²Mi ’yo anzi Israelini tia, yi ma a’i mani afa feza awa’diforuri; emi ma a’i afa feza mani ’ba dria lepi fepi asisi ’diyi dri.

³Afa feza emini ngale a’ile yi dri ’diyi yi ’di: mele pi, dahabu pie, mola pie,

⁴bongo blururi pie, bongo okalakokalari pie, ekaruri pie, mile be nyiriri pie, ndri podo pie,

⁵kabiloago ma enyi ojale wura ekarusi ’diyi pie, yianya ma enyi pie, asarau pati pie,

⁶tala odu pie, afa aji be arikariru odu efiza pi edezu obiese vele veri beri pie,

⁷oni onikiru piyi oni osule osu ’diyi be, yini ngale osule koti alinari pi ma ruaa bongo sule agatiari be ’diyi.

⁸Mi fe yi ma ede pari alatararu ma dri, ’dini ma ma adri yi ma eselia ani.

⁹Ekile afa dria mani ecele mi dri ’diyile, wura bereni pi afa alenia ’diyini be dria, emi ede yi ’dini.

¹⁰Yi ma ede sanduku asarau patisi; oconi alazari ovu wuale iri ali be, walani wuale alu ali be, oconi wuale alu ali be.

¹¹Mi ma a’bu ruani dria dria mele alarusi, mi ma a’bu ruani alialeru azini amvemveleru indi, azini mi ma ede ekilaza melesi ,drinia kalaniasi kuru.

¹²Mimaede ,emve erini su mele akapi acisirisi, mi eci yi eri ma paa su tro, emve iri kala aluria, emve iri kala aziniria.

¹³Mi ma ede patiniru asarau pati’i, mima a’bu yi rua dria dria melesi.

¹⁴Mi ma su pati nde ’diyi emve sanduku ma kalaa ’diyi ma alia, sanduku ’duzu.

¹⁵Pati nde ’diyi ma adri emve sanduku ruaa ’diyi ma talaa; ma nze yi ku.

¹⁶Mi ma ’ba sanduku nde ma alia e’yo eti nzeza mani ngale fele mi driri.

¹⁷Mi ma ede oguna yikiniri mele alarurisi; oconi alazari nga ovu wuale iri ali be, walani wuale alu ali be.

¹⁸Mi ma ede kerubi iri melesi; mi ede yi mele dile dirisi, mi ’ba yi sanduku kalaa irile irile.

¹⁹Mi ’ba kerubi alu kala aluria, kerubi azini kala aziniria; mi ma ede kerubi kala nde iria ’diyi tualu oguna yikiniri be ovuzu afa aluru.

²⁰Kerubi ’diyi nga yi ma opile aja uru, oguna yikiniri a’buzu yi ma opilesi, yi nga yi ma andreti ofe; kerubi ’diyi ma andretini nga ovu oguna yikiniri vuleru.

²¹Mi ma ’ba oguna yikiniri uru sanduku ma dria; azini sanduku alia mi ma ’ba e’yo eti nzeza mani ngale fele mi driri.

²²’Dale ama nga ama isu mi be, engazu oguna nde yikiniri ma dria, kerubi iri ovupi sanduku e’yo eti nzezani ma dria ’diyi ma eselia, ama nga ti eci mi be e’yo oluzu, e’yo mani ngale fele mi dri azitaru Israeli anzi dririsi.

²³Mi ma ede mesa asarau patisi: oconi alazari ma ovu wuale iri, walani wuale alu, oconi edrezari wuale alu ali be.

²⁴Mi ma a’bu ruani dria dria mele alarusi, azini mi ma ede ekilaza melesi drinia kalaniasi kuru.

²⁵Mi ma ede eri dri eseleni tini beri, walani drianzi su, eri ma kalaa dria, mi ede indi ekilaza melesi esele nderi ma tia kalaniasi kuru.

²⁶Azini mi ma ede eri dri emve su meleni, mi eci yi kalania su tro pani su ’diyi dria.

²⁷Emve ’diyi ma ovu ogogo eseleni tini beria, pari pati eri ’duzu ’diyi ecizuriru.

²⁸Mi ma ede patiniru asarau pati’i, ma a’bu ruani dria dria melesi, mesa ’duzu ani.

²⁹Mi ma ede saani erini, kabileni pie, imvuni pie, okelea yi bezu ’diyi pie; ma ede yi mele alarusi.

³⁰Mi ma ’ba mikate ecetaruri mesa nderi ma dria ovuzu ma milia zu zu.

³¹Mi ma ede tala pati mele alarusi. Mi ede tala pati nderi mele dile dirisi, nduni pi ruani be; koponi pie, ongbuni pie, funi pie dria, yi nga ovu dria tala nderi ma ruaa afa aluru;

³²arakala azia ma fu eri ma ruaa, tala arakala na eje aluria, tala arakala na eje aziniria;

³³kopo na ekile alimondi fule ovu eri ma arakala aluria, ongbu alu azini fu alu; kopo na ekile alimondi fule ovu eri ma arakala aziniria, ongbu alu azini fu alu-arakala azia fupi tala nderi ma ruaa ’diyi yi ovu ’dinile;

³⁴tala nderi ma pati adaria kopo su ekile alimondi fule, ongbu ’diyi pi funi be,

³⁵ongbu alu arakala iri etia tala nderi ma ruaa afa aluru, azini ongbu alu arakala iri etia tala nderi ma ruaa afa aluru, azini ongbu alu arakala iri etia tala nderi ma ruaa afa aluruarakala azia fupi tala nderi ma ruaa ’diyi yi ovu ’dinile.

³⁶Ongbu yini piyi arakala yini be ovu tala nderi ma ruaa afa aluru; tala nderi dria ma ovu edezaru mele alaru dile dirisi.

³⁷Mi ma ede tala erini aziri; yi nga tala erini ’diyi o’i, dizani ma di ruani e’dazu ani.

³⁸Akpaani ’diyi piyi ajikuani be ma ovu edezaru mele alarusi.

³⁹Mi ma ede eri afazu ’diyi be dria, mele alaru ma onzi alusi.

⁴⁰Mi ne onyiru mi ede afa ’diyi ekile wura mani ecele mi dri oni dria ’borile.