Read lugbara Efuza 26 Bible Online

Efuza 26 - lugbara bible

Efuza 26

¹Azini mi ma ede bere bongo ’izaru mudri be, bongo mile be nyiriaruri pisi, blururi pie, okalakokalari pie, ekaruri pie; mi ede yi wura kerubini be, onduou ma dri pamvu.

²Bongo alu alu ma zoza ma ovu wuale kali iri drini aro, bongo alu alu ma wala ma ovu wuale su; bongo dria ma o’biza ma ovu tro tro.

³Ma eci bongo towi tualu, ma isu yi ti agyi be; ma eci bongo towi azini tualu, ma isu yi ti agyi be.

⁴Mi tra bongo bluru anzirikule, mi eci yi bongo towi ’diyi ma bongo kalaari ma tia; mi ma ’ye ’dinile bongo towi azini ’diyi ma bongo kalaari ma tia indio

⁵Mi ma eci bongo traza anzirikule kali towi bongo aluri ma tia, azini bongo traza anzirikule kali towi bongo aziniri ma tia; bongo traza anzirikule ’diyi ma oti yi agyi be agyi be kilili.

⁶Azini mi ma ede afa eciza kali towi melesi bongo ti ecizu, bongo ma ti ecizu tualu afa eciza nde ’diyisi, ’dini bereni ovuzu ani alu beni.

⁷Mi ma ede bongo ndri podosi ’izu bere ma dria hemale; mi ma ede yi mudri drini alu.

⁸Bongo alu alu nde ’diyi ma zoza ma ovu wuale kali na kali na, azini bongo alu alu ma wala wuale su; bongo mudri drini alu ’diyi ma o’biza ma ovu dria tro tro.

⁹Mi ma eci bongo towi ’diyi tualu, azini bongo azia ’diyi tualu, mi ma agbo bongo nde aziari uru bere drilialeru.

¹⁰Mi ma eci bongo traza anzirikule kali towi, bongo towi ’diyi ma bongo kalaari ma tia, azini mi ma eci bongo traza anzirikule kali towi bongo azini azia ’diyi ma bongo kalaari ma tia.

¹¹Mi ma ede vini afa eciza kali towi molasi, ma osu yi afa anzirikule ’diyi ma alia, ma eci hema tualu erini ovuzu ani alu beni.

¹²Bongo hemani ma jolo acepi ’depi keleri eri bongo alu ma ali acepiri’i, mi ma ’i bere ma dria ngukualeru.

¹³Bongo hemani ma wuale alu acepi tini aluriari, azini bongo hemani ma wuale alu acepi tini aziniriari be, mi ma ’i yi hema kala ’doria azini kala ’daria, eri a’buzu.

¹⁴Mi ma ede afa hema a’buzuri kabiloago ma enyi ojale ekaru ’diyisi, azini drinia uru mi a’bu eri yianya ma enyirikosi.

¹⁵Bereni mi ede bau asarau patisi edrezaru.

¹⁶Bau alu ma oconi wuale mudri, bau alu ma walani wuale alu ali be,

¹⁷Bau ’diyi alu alu ovu si drile be iri iri, yini yi ecizu tualu yi agyi be ani; mi ma ede bau bereni dria ’dinile.

¹⁸Mi ma ede bau bereni kali iri kala uruleruria;

¹⁹mi ma ede ’bile dahaburu bau ma si drile suzu ’diyi kali su, bau kali iri ’diyi ma etia, ’bile ’diyi iri bau alu etia sini suzu iri tro alenia, azini ’bile ’diyi iri bau azini etia sini suzu iri tro alenia;

²⁰azini bau kali iri bere ma kala iriri andraleruria,

²¹’bile dahaburu yini kali su be, ’bile ’diyi iri bau alu etia, azini ’bile ’diyi iri bau azini etia;

²²mi ma ede bau azia ’bazu bere ma kala ngukualeru etuni ’dezurialeruria.

²³Mi ma ede bau iri ’bazu bere ma kala ngukualeru, pari tinini yi ecizuria;

²⁴etinia yi iri iri, te mi ma eci yi tualu uruleru, emve aluri ma tia; yi ma ovu iri tro ’dinile; yi ma ovu pari iri tiniru yi ecizuriru.

²⁵Bau ma ovu aro, ’bile dahaburu yini be mudri drini azia; ’bile iri bau alu etia, azini ’bile iri bau azini etia.

²⁶Mi ma ede asarau pati rwe rwe, mi ma ede yi towi bau bere ma eje aluria ’diyi bizu,

²⁷azini pati rwe rwe towi bau bere ma eje aziniria ’diyi bizu, azini pati rwe rwe towi bau bere ma nguku etuni ’derialeruria ’diyi bizu.

²⁸Pati rwe rwe agaduari nga fi bau ma ruaasi engazu tini aluria cazu kpere tini aziria.

²⁹Mi ma a’bu bau ma rua dria dria melesi, ma ede emveni melesi indi, pari pati rwe rwe ’diyi osuzu aleniariru; mi ma a’bu pati rwe rwe ’diyi ma rua dria dria melesi indi.

³⁰Mi ma aso bere uru ekile wura ovupi ecezaru mi dri oni dria ’borile.

³¹Mi ma ede bongo jo ale alizuri bongo blururi pisi, okalakokalari pie, ekari pie, bongo mile be nyiriari pie; ma ede eri wura kerubinisi onduou ma dri pamvu;

³²mi ma ’i eri asarau pati agoferu su ’bani ruani a’bule dria dria melesi ’diyi ma ruaa; iwu yini ma ovumeleni, yi ma ovu ’bile dahabuni su ’diyi ma dria.

³³Mi ma ’i bongo nderi afa eri ecipi ’diyi etia, mi ofi sanduku e’yo eti nzezaniri bongo nderi ma kala alialeruria; bongo nderi nga emi dri pari alatararu pi ma esele co pari alatararu agapi turi be.

³⁴Mi ma ’ba oguna yikiniri sanduku e’yo eti nzezaniri dria, pari alatararu agapi turi ma alia.

³⁵Mi ma ’ba mesa bongo nderi ma kala drilenialeruria, azini mi ma ’ba tala nde bere ma kala uruleruria, ma oti i mesa be; mi ma ’ba mesa kala andraleruria,

³⁶Mi ma ede bongo ile Hema tiliari, bongo blururi pisi, okalakokalari pie, ekaruri pie, bongo mile be nyiriari pie, wura onduouni cileri be yi ma ruaa.

³⁷Mi ma ede bongo nderi dri asarau pati agoferu ’diyi towi, mi ma a’bu yi ma rua dria dria melesi; iwu yini ma ovu meleni, mi ma ede ’bile towi molani yi dri indio