Read lugbara Efuza 30 Bible Online

Efuza 30 - lugbara bible

Efuza 30

¹Mi ma ede pari edeta edezu obiese vezu driniari; mi ede eri pati asaraururisi.

²Oconi alazari ma ovu wuale alu, walani wuale alu; kala erini su ’diyi ma ovu tro tro, tro tro, oconi edrezari ma ovu wuale iri; o’yu erini ma ovu pari nderi ma ruaa afa aluru.

³Mi ma a’bu ruani dria dria mele alarusi, drini pi, kalani pie, o’yuni pie dria; mi ede ekilaza melesi drinia kalaniasi kuru.

⁴Mi ma ede eri dri emve iri melesi; ma eci yi ekilaza eriniri ma etia, ma ’ba yi ejenia kalaniasi iri tro, yi ma ovu pari kali suzu eri ’duzuri.

⁵Mi ma ede kali nde ’diyi pati asaraururisi, ma a’bu yi rua dria dria melesi.

⁶Mi ma ’ba eri bongo ’ile sanduku e’yo eti nzezaniri ma driliari ma drilia, oguna yikini sanduku e’yo eti nzezani driari ma drilia, pari amani ngazu dri fuzu mi beria.

⁷Aroni ma ve obiese edele afa aji be arikariru ’diyisiri drinia; ma ve eri o’biti vusi o’biti vusi erini tala ederia,

⁸ma ve eri vini ondre vusi ondre vusi erini tala ’iria, ovuzu obiese vele ve i depi kuriru Yehova drilia a’bianzi emini vusi dria.

⁹Mi ma ede obiese vele ve nduri drinia ku, kani edeta vezaruri kani edeta edele anyafurasiri drinia ku; mi ma osu vini edeta mvuzaruri drinia ku.

¹⁰Te Aroni ma ede e’yo onzi o’yuni ma dria pale alu eli vusi; eri ma ede e’yo onzi anyapa edetaru e’yo onziniri ma arisi pale alu eli vusi a’bianzi emini vusi dria; eri ovu alatararu tu Yehova dri.

¹¹Yehova ’yo Musa ma tia kini,

¹²Mi ka anzi Israelini ’diyi ma kalafe la, ’ba ’bani adrile lale ’diyi vusi, etu nderisi ’ba dria alu alu ma fe afa yi ma orindi onzezuri Yehova dri mini yi laria, dra muaruri kazu yi ’yezu o’du mini yi lazurisi ku.

¹³’Ba dria agapi fipi ’ba lale ’bo ’diyi eselia ’diyi ma fe ’dini: sekeli ali, sekeli pari alatararu vileri vusi (sekeli alu alu ovu gera be kali iri), sekeli ali nderi ovu afa fele Yehova driri.

¹⁴’Ba dria agapi fipi ’ba lale ’bo ’diyi ma eselia ’diyi, e’dozu ’ba capi eli kali iri ’diyisi, yi ma fe afa feza nderi Yehova dri ’ba eli kali iri agapi ’bo ’diyi be.

¹⁵Afa e’i ma fe tu ku, alio ma fe vini were ku, yi ma fe sekeli ali’i, yi ka afa feza nderi fe Yehova dri orindi emini ma e’yo onzi edezu.

¹⁶Mi ma a’i sekeli e’yo onzi edezu ’diyi anzi Israelini dri, ma pe sekeli ’diyi hema ti ecizaniri ma azi ’yezu; eri ma ovu egata fepiriru Yehova ma milia anzi Israelini ’diyi ma e’yosi, orindi emini ma e’yo onzi edezu.

¹⁷Yehova ’yo Musa ma tia kini,

¹⁸Mi ma ede awala rua ojizuri molasi, ede pani molasi indi, rua ojizu. Mi ma ’ba eri hema ti ecizaniri pi ma eselia pari edeta edezuri beria, mi ma osu yi alenia.

¹⁹Te Aroni pi anzipi be yi ma oji yi ma dri pa be alenia ani.

²⁰Yi ma oji yi yisi yini firia hema ti ecizaniria, yi kazu drazu ku, kani yini ecaria ogogo pari edeta edezuri vu azi ngazu, afa edetaru vezu acisi Yehova dri,

²¹Yi ma oji yi ma dri pa be, yi kazu odrazu ku; eri ma ovu azitaru yi dri ’dani ’dani, eri dri azini eri ma ori dri a’bianzi yini vusi dria.

²²Yehova ’yo vini Musa ma tia lindi kini,

²³Mi ’du mini afa aji be arikariru agapi ’diyi: odu arikariru rapi sururi sekeli turu towi, azini pati o’boko madalasiniru aluzaru kalafe ’di ma ali, ’di sekeli turu iri drini kali towi, azini eka aluzaruri sekeli turu iri drini kali towi,

²⁴azini kasia turu towi sekeli pari alatararu vileri vusi, azini odu mizeituni otekua alu;

²⁵te mi ma ede eri odu alatararu osule osuriru, afa aji be arikariru osale tualu onduouni osalerileri; eri nga ovu odu alatararu osule osuri,

²⁶Mi ma tri eri hema ti ecizanziri pi ma ruaa sanduku e’yo eti nzezaniri be,

²⁷mesa pi ma rua afazu erini ’diyi pie, tala pie afazu eri vile ’diyi pie, pari obiese vele veri edezuri pie,

²⁸pari edeta edezuri pie afazu eri vile ’diyi pie dria, awala rua ojizuri pie pani pie dria;

²⁹mi ma ’ba yi alaru, ’dini yi ma ovu alatarararu ani; afa dria yi rua elopi ’diyi ma ovu alatararu indi,

³⁰Mi ma osu odu Aroni pi ma dria anzipi be, mi ma ’ba yi ndu alaru, ’dini yi ma nga azi kuhanini ma dri ani beni,

³¹Mi ma ’yo anzi Israelini ’diyi ria kini, ’Diri nga ovu ma dri odu alatararu osule osuri, a’bianzi emini vusi dria.

³²Ma osu eri ’ba tokori ma ruaa ku, mi ma ede odu azini i sipi erile tro troni ku, ekile odu ’bani osale ’dirile; eri ovu alatararu, eri ma ovu di alatararu emi dri indio

³³’Ba ngoni ngori ti odu azini ’dirileri osapiri, kani ’ba odu ’diri osupi ’ba andi driari, yi nga eri nze o’dipi ma eseliasi amve li kpi.

³⁴Yehova ’yo Musa tia, Mi ’du mini afa aji be arikariru ’diyi, ese sitaketiru, etiriko ongoro’bo onikaruri pie, ese galabanoru pie, afa aji be arikariru ’diyi tualu obiese vele ve alaruri be (afa mini sole ’diyi dria ma nziza ma ovu tro tro, tro tro),

³⁵te mi ma ede eri obiese vele veriru afa aji be arikariru edezaru onduouni osale ondua erinisirile, osazaru a’isi, onyiru azini alatararu;

³⁶mi ndi were eri ’izu inikini, ma ’ba eri sanduku e’yo eti nzezaniri ma drilia, hema ti ecizaniri ma alia, pari amani ngazu dri fuzu mi beria; eri nga ovu emi dri alatatararu.

³⁷Obiese vele veri mini ngale edeleri, emi ma ede emi ngulupi dri emini ’diri osalerile ku; eri ma ovu Yehova dri alatararu emi ma milia.

³⁸’Ba ngoni ngori ti ka afa ede ajini ka ngu ’dirile, yi nga eri nze o’dipi ma eseliasi amve li kpi.