Read lugbara Efuza 31 Bible Online

Efuza 31 - lugbara bible

Efuza 31

¹Te Yehova ’yo Musa tia kini,

²Mi ne, ma omve Bezaleli, Uri Huri mvi ma mva, suru Yuda-niari rusi ’bo:

³azini ma fe eri ma ga tre Orindi Mungunisi, onduasi, e’yo vazasi, e’yo nizasi, azini ondua azi ndu ndu dria ’yezurisi,

⁴egazu azi onduouni ’yezu, azi ngazu melesi, azini dahabusi, azini molasi,

⁵azini oni osuza ’diyi olizu, azini endrilendri opazu pati ruaa, azi ndu ndu dria ngazu.

⁶Te ma’i, mi ne, ma pe Oholiaba Ahisamaki mvi, suru Daniniari ’bo; te ma ’ba ondua ’ba ovupi asi be onduaru ’diyi dria ma asia ’bo, yi ma ede afa dria mani azile mi dri ’bo ’diyi ani:

⁷hema ti ecizaniri pi, sanduku e’yo eti nzezaniri pie, oguna yikini ovupi driniari pie, afa dria adripi Hema alia ’diyi pie,

⁸mesa pi afazu erini ’diyi pie, tala alatararuri pi afazu erini ’diyi pie, pari obiese vezuri pie,

⁹pari edeta veza edezuri pi afazu erini ’diyi be dria, awala rua ojizuri pi pani be,

¹⁰bongo mile be nyiriaru ’diyi pie, bongo alatararu kuhani Aroni vile ’diyi piyi bongo anzipi vile ’diyi be, yini sule azi kuhanini ngazu ’diyi,

¹¹odu osule osuri pie, obiese vele ve osale afa aji be arikariru ’diyisi pari alatararuniri pie. Ekile e’yo dria mani azile mi dri ’borile, yi ma ’ye ’dini.

¹²Te Yehova ’yo Musa tia kini,

¹³Mi ’yo indi anzi Israelini ’diyi ma tia kini, Adaru emi ma mba o’du sabatoru mani ’diyi ma ta, erini ovule ecetaru ama eselia emi be a’bianzi emini vusirisi, ’dini emi ma ni ani ma Yehova emi ’bapi alaruri’i.

¹⁴E’yo ’disi emi ma mba o’du sabatoru ma ta, erini ovule alatararu emi dririsi; ’ba eri ezapi ’diyi dria nga ovu fuzaru adaru; ’ba ngoni ngori ti, azi ngapi 0’du nderisiri, yi nga orindi erini nze o’dipi ma eseliasi ra.

¹⁵’Ba ma nga azi o’du azia, te 0’du aziriri sabato ava liza inzitani ovupi alatararu Yehova driri; ’ba ngoni ngori ti azi ngapi sabatosiri, yi nga eri fu adaru.

¹⁶E’yo ’disi anzi Israelini ’diyi ma mba o’du sabatoni ma ta, 0’du sabatoni ma e’yo osuzu aziza ’daniriru a’bianzi yini vusi.

¹⁷Eri ovu eceta ’dani ’dani ama eselia anzi Israelini ’diyi beri: te o’du aziasi Yehova ’ba ndra ’bu nyaku be, te o’du aziririsi eri li ndra ava, asini emvi di ra.

¹⁸Eri ka de e’yo ’yozu Musa be oni Sinai dria ’bo, eri fe eri dri oni iri e’yo eti nzezani ’diyi, yi afa oniru Munguni e’yo sile drinia i ma dri drilesi ’diyi.