Read lugbara Efuza 36 Bible Online

Efuza 36 - lugbara bible

Efuza 36

¹Bezaleli pi Oholiaba pie, ’ba ondua be asia, Yehovani ondua ’bale yi ma asia e’yo vaza be, nizu azi ndu ndu pari alatararurini ’yezu ’diyi pie dria, yi ma nga azi e’yo dria Yehovani azilerile.

²Musa nga di Bezaleli pi omve, Oholiaba be, azini ’ba dria alu alu ondua be yi asia ’diyi, Yehovani ondua ’bale yi asia ’diyi, yi ’ba dria alu alu yi ma asini yi engale emuzu azi nderi ngazu ’diyi;

³yi a’i Musa ma dria afa feza awa’diforu dria anzi Israelini diyini ejile azi pari alatararurini ’yezuri. Yi eji afa feza fele avasiri ’dani o’biti vusi o’biti vusi.

⁴’Ba onduou azi ndu ndu dria pari alatararuria ’diyi ’yepi ’diyi, dria alu; alu nga azi yini ’yeleri ku,

⁵emu ’yo Musa tia kini, ’Ba yi eji afa aga azi Yehovani azileri ’yezuri ra.

⁶Te Musa fe azita, yi oji e’yoni pari yini hema asozuri ma eselia dria, ’yozu kini, Agupi kani oku ma fe afa azini awa’diforu pari alatararuniri di ku. ’Dini oga di ’ba nde dri afa azini eji kokorusi;

⁷a’disiku afa ovupi yi vu indi ’diyi ovu fudri azi nde dezu dria, aga vini tu.

⁸’Ba ondua be yi asia ’ba azi ngapi ’diyi eselia ’diyi, ede bere, bongo ’ileri be mudri; bongo mile be nyiriaruri pisi, biururi pie, okalakokalari pie, ekaruri pie, kerubi ma wura be sozaru ruaania, onduou ma dri pamvu.

⁹Bongo ’ileri alu alu ma zoza ovu wuale kali iri drini aro, azini bongo alu alu ma wala ovu wuale su; bongo ’ile ’diyi ma o’biza ovu dria tro tro.

¹⁰Eri eci bongo towi tualu yini yi ti isuzu yi agyi be, azini eri eci bongo towi azini ’diyi tualu yini yi ti isuzu yi agyi be.

¹¹Eri tra bongo bluru anzirikule, eri eci yi bongo towi ’diyi ma bongo kalaari ma tia; eri ’ye ’dinile bongo towi azini ’diyi ma bongo kalaari ma tia indi;

¹²eri eci bongo traza anzirikule kali towi bongo aluri tia, azini bongo traza anzirikule kali towi bongo aziniri ma tia; bongo traza anzirikule ’diyi oti yi agyi be agyi be kilili.

¹³Azini eri ede afa eciza kali towi melesi bongo ti ecizu, eri eci bongo ma ti tualu afa eciza nde ’diyisi; bere ovu di ani alu.

¹⁴Eri ede bongo ndripodosi ’izu bere ma dria hemale; eri ede yi mudri drini alu.

¹⁵Bongo alu alu nde ’diyi ma zoza ovu wuale kali na kali na, azini bongo alu alu ma wala wuale su; bongo mudri drini alu ’diyi ma o’biza ovu dria tro tro.

¹⁶Eri eci bongo towi ’diyi tualu, azini bongo azia ’diyi tualu.

¹⁷Eri eci bongo traza anzirikule kali towi bongo towi ’diyi ma bongo kalaari ma tia, azini eri eci bongo traza anzirikule kali towi bongo azini azia ’diyi ma bongo kalaari ma tia.

¹⁸Azini eri ede afa eciza kali towi molasi hemani ecizu tualu, erini ovuzu ani alu beni.

¹⁹Eri ede afa hema a’buzuri kabiloago ma enyi ojale ekaru ’diyisi, azini drinia uru eri a’bu eri yianya ma enyirikosi.

²⁰Bereni eri ede bau asarau patisi edrezaru.

²¹Bau alu ma oconi wuale mudri, bau alu ma walani wuale alu ali be.

²²Bau ’diyi alu alu ovu sidrile be iri iri, yini yi ecizu tualu yi agyi be; eri ede bau bereni dria ’dinile.

²³Eri ede bau bereni: kali iri kala uruleruria;

²⁴eri ede ’bile dahaburu bau ma sidrile suzu ’diyi kali su, bau kali iri ’diyi ma etia, ’bile ’diyi iri bau alu etia, sini suzu iri tro alenia, azini ’bile ’diyi iri bau azini etia, sini suzu iri tro alenia.

²⁵Azini eri ede bau kali iri bere ma kala iriri andraleruria

²⁶’bile dahaburu yini kali su be, ’bile ’diyi iri bau alu etia, azini ’bile ’diyi iri bau azini etia.

²⁷Eri ede bau azia ’bazu bere ma kala ngukualeru etuni ’dezurialeruria.

²⁸Azini eri ede bau iri ’bazu bere ma kala ngukualeru, pari tinini yi ecizuria.

²⁹Etinia yi ovu iri iri, te eri eci yi tualu uruleru emve aluri ma tia; eri ede yi iri tro ’dinile tinini yi ecizuria.

³⁰Bau ovu aro, ’bile dahaburu yini be mudri drinia azia; ’bile iri ovu bau alu alu ma etia.

³¹Eri ede asarau pati rwe rwe, eri ede yi towi bau bere ma eje aluria ’diyi bizu,

³²azini pati rwe rwe towi bau bere ma eje aziniria ’diyi bizu, azini pati rwe rwe towi bau bere ma nguku etuni ’derialeruria ’diyi bizu.

³³Azini eri ede pati rwe rwe agaduari ma fi bau ma ruaasi aliasi engazu tini aluria cazu kpere tini aziria.

³⁴Eri a’bu bau ma rua dria dria melesi, eri ede emveni melesi indi, pari pati rwe rwe ’diyini ovuzu aleniariru, eri a’bu pati rwe rwe ’diyi ma rua dria dria melesi indi.

³⁵Eri ede bongo jo ale alizuri blururi pisi, okalakokalari pie, ekaruri pie, bongo mile be nyiriaruri pie; eri ede eri wura kerubinisi, onduou ma dri pamvu.

³⁶Eri ede bongo nde dri asarau pati su ’bani ruani a’bule dria dria melesi, pati agoferu ’diyi; iwu yini ovu meleni, eri ede ’bile yini su dahabu rapi acisirisi.

³⁷Eri ede bongo ’ile hema tiliari, bongo blururi pisi, okalakokalari pie, ekaruri pie, bongo mile be nyiriaruri pie, wura onduouni soleri be yi ma ruaa;

³⁸eri ede eri dri pati agoferu towi, iwu yini ’diyi be. Eri a’bu dri yini azini kali yini alazaru ’diyi ma rua dria dria melesi, azini ’bile yini towi ’diyi ovu molani.