Read lugbara Efuza 37 Bible Online

Efuza 37 - lugbara bible

Efuza 37

¹Te Bezaleli ede sanduku asarau patisi; oconi alazari ovu wuale iri ali be, walani wuale alu ali be, oconi edrezari wuale alu ali be.

²Eri a’bu eri rua dria dria mele alarurisi, alialeru azini amveleru, azini eri ede ekilaza melesi drinia kalaniasi kuru,

³Eri ede emve erini su mele akapi acisirisi eri ma paa su tro, emve iri kala aluria, emve iri kala aziniria.

⁴Eri ede patiniru asarau pati’i, eri a’bu yi rua dria dria melesi,

⁵eri su pati nde ’diyi emve sanduku ma kalaa ’diyi ma alia, sanduku ’duzu.

⁶Azini eri ede oguna yikiniri mele alarurisi; oconi alazari ovu wuale iri ali be, walani wuale alu ali be.

⁷Eri ede kerubi iri melesi, eri ede yi mele dile dirisi; ’ba yi sanduku kalaa irile irile,

⁸eri ’ba kerubi alu kala aluria, kerubi azini kala aziniria; eri ede kerubi kala nde iria ’diyi tualu oguna yikiniri be ovuzu afa aluru.

⁹Kerubi ’diyi aja yi ma opile uru oguna yikiniri a’buzu yi ma opilesi, ofe yi ma andreti; kerubi ’diyi ma andreti ovu oguna yikiniri vuleru.

¹⁰Eri ede mesa asarau patisi;oconi alazari ovu wuale iri, walani ovu wuale alu, oconi edrezari wuale alu ali be;

¹¹eri a’bu ruani dria dria mele alarusi, azini eri ede ekilaza melesi drinia kalaasi kuru.

¹²Eri ede eri dri eri ma kalaa dria eseleni tini beri, walani drianzi su, azini eri ede indi ekilaza melesi esele nderi ma tia kalaniasi kuru.

¹³Eri ede eri dri emve su mele rapi acisirisi, eri o’ba yi kalania su tro pani su ’diyia dria.

¹⁴Emve ’diyi ovu ogogo eseleni tini beria, pari pati eri ’duzu ’diyi suzuriru.

¹⁵Eri ede patiniru asarau pati’i, eri a’bu yi rua dria dria melesi, mesa ’duzu.

¹⁶Eri ede afazu mesa dria ’diyi mele alarusi, saani erini pie, kabileni pie, okeleani pie, imvuni pie, yi bezu ’diyi.

¹⁷Eri ede talapati mele alarusi, Eri ede talapati nderi mele dile dirisi, nduni pi ruani be; koponi pie, ongbuni pie, funi pie dria ovu dria tala nderi ma ruaa afa aluru.

¹⁸Arakala azia efu eri ma ruaa, tala arakala na eje aluria, tala arakala na eje aziniria;

¹⁹kopo na ekile alimondi fule ovu eri ma arakala aluria, ongbu alu azini fu alu; kopo na ekile alimondi fule ovu eri ma arakala aziniria, ongbu alu azini fu alu-arakala azia fupi tala nderi ma ruaa ’diyi ovu ’dinile,

²⁰Tala nderi ma pati adaria kopo su ekile alimondi fule, ongbuni ’diyi pie funi be,

²¹ongbu alu arakala iri etia tala nderi ma ruaa afa aluru, azini ongbu alu arakala iri etia tala nderi, ma ruaa afa aluru, azini ongbu alu arakala iri etia tala nderi ma ruaa afa aluru-arakala azia fupi tala nderi ma ruaa ’diyi yi ovu ’dinile.

²²Ongbu yini piyi arakala yini be ovu tala nderi ma ruaa afa aluru; tala nderi dria ovu edezaru mele alaru dile dirisi.

²³Eri ede tala erini aziri, akpaani pie, ajikoani be, mele alarusi.

²⁴Eri ede eri, afa erini ’diyi be dria, mele alaru ma onzi alusi.

²⁵Azini eri ede pari obiese vezuri asarau patisi; oconi alazari ovu wuale alu, walani wuale alu; kala erini su ’diyi ovu tro tro, tro tro, oconi edrezari ovu wuale iri; o’yu erini ovu pari nderi ma ruaa afa aluru.

²⁶Eri a’bu eri rua dria dria mele alarusi, drini pi, kalani pie, o’yuni pie dria; eri ede ekilaza melesi drinia kalaniasi kuru,

²⁷eri ede eri dri emve iri melesi, ecizu ekilaza eriniri ma etia, eri ’ba yi ejenia kalaniasi iri tro, ovuzu pari kali suzu eri ’duzuriru.

²⁸Eri ede kali nde ’diyi asarau patisi, a’bu yi rua dria dria melesi.

²⁹Eri ede indi odu alatararu osule osuri, azini obiese vele ve alaru osale afa aji be arikariru ’diyisiri, onduouni osale ondua erinisirile.