Read lugbara Efuza 38 Bible Online

Efuza 38 - lugbara bible

Efuza 38

¹Eri ede pari edeta vezuri asarau patisi; oconi alazari ovu wuale towi, walani wuale towi; kala erini su ’diyi ovu tro tro, tro tro, oconi edrezari ovu wuale na.

²Eri ede o’yuni pari kalati su’diyini yi ecizuria; o’yu ’diyi ovu eri be rua aluru, eri a’bu ruani dria dria molasi.

³Eri ede afa pari edeta edezuri vile ’diyi dria, imvuni pie, pauni ’diyi pie,okeleni ’diyi pie, aya si be za sozu ’diyi pie, imvu ajikoru acioluni ’diyi pie: afa erini dria eri ede molasi.

⁴Eri ede pari edeta edezuri dri keikei molasi, pari edeta edezuri ma ti kalaari ma etia valeru, eri ovu uruleru agadua.

⁵Eri ede emve su mola akapi acisirisi ecizu keikei ma kala su ’diyia, pari pati suzu ’diyi;

⁶eri ede pati eri ’duzu ’diyiru asarau pati’i, eri a’bu yi rua dria dria molasi.

⁷Eri osu pati ’diyi emve pari edeta edezuri ma kalaa ’diyi ma talaa eri ’duzu; eri ede eri bausi ale be pirini.

⁸Eri ede awala rua ojizuri molasi, pani molasi indi, ede eri mandara oku yi okopi azi ngazu hema ti ecitaniri ma jotilea ’diyinisi.

⁹Eri ede irii bereni; kala uruleruria o’i bongo mile be nyiria ’diyi irii ma ageia oconi wuale turu alu;

¹⁰patini agoferu ’diyi ovu kali iri, ’bileni ’diyi kali iri, yi molaru, te iwu agofe ruaa ’diyi pi kalini alazaru ’diyi be ovu dahaburu.

¹¹Kala andraleruria oconi wuale turu alu, patini agoferu ’diyi ovu kali iri, ’bileni ’diyi kali iri, yi molaru, te iwu agofe ruaa ’diyi piyi kalini alazaru ’diyi be ovu dahaburu.

¹²Irii ma wala etuni ’dezurialeruria bongo o’iza ovu oco be wuale kali towi, patini agoferu ’diyi mudri, ’bileni mudri indi; iwuni agofe ma ruaa ’diyi pi kalini alazaru ’diyi be ovu dahaburu.

¹³Walani etuni efurialeruria ovu wuale kali towi.

¹⁴Bongo o’izaru irii tile ma kala aluria ’diyi ovu wuale mudri drini towi, agofeni na, ’bileni vini na.

¹⁵Yi ovu ’dinile indi kala aziniria; irii tilia dri ejialeru azini dri ndialeru iri tro bongo o’ile ’diyi ma oconi ovu wuale mudri drini towi, agofeni na, ’bileni na indi.

¹⁶Bongo o’ile irii ma ageia ’diyi dria ovu bongo mile be nyiriaru ’diyi.

¹⁷’Bile agofe ’diyini ovu molaru, iwu agofe ma ruaa ’diyi pi kalini alazaru ’diyi be ovu dahaburu; afa drini a’buzuri dahabuni, azini agofe irii ma kalaa ’diyi dria ma kali alazaru ’diyi ovu dahabusi.

¹⁸Bongo o’izaru irii ma tile a’buzu ’diyi ovu onduou wura sopi bongo ruaari ma dripamvu, ede eri bongo bluru pisi okalakokalari pie, ekari pie, bongo mile be nyiriari pie; oconi wuale kali iri, azini oconi edrezari wuale towi, ekile bongo iriini ’diyile.

¹⁹Agofeni su, ’bileni vini su molaru; iwuni ’diyi ovu dahaburu, afa drini piyi a’buzu kalini alazaru ’diyi beri dahaburu.

²⁰Alo bereni dria azini alo iriini ’diyi be dria, yi ovu molani.

²¹Afa bereni ’diyi ma kalafe ’di, bere nde e’yo eti nzezaniri, ekile kuhani Itamari Aroni mvini yi lale ’ba Levini ’diyini azi ngazu azita Musani vusirile.

²²Te Bezaleli, Uri Huri mvi ma mva, suru Yudaniari, ede afa Yehovani azile Musa tia ’diyi dria ra;

²³te Oholiaba Ahisamaki mvi, suru Daniniari, ovu tualu eri be, eri ovu onduou wura opapi aya ruaari, onduou onduaru, eri ’ba wura sopi bongo blururi pi ma ruaa, okalakokalari pie, ekaruri pie, bongo mile be nyiriaruri pieri.

²⁴Mele dria pari alatararuri ma azi ngazu driari, mele nde ’bani fele awa’diforori’i, ca onzi kali iri drini oromi, azini sekeli turo aziri drini kali na, sekeli pari alatararori vilerile.

²⁵Dahabu, ’ba ovupi lazaro ’ba ongulumuru ma eselia ’diyini feleri, ca onzi turo alu, azini sekeli alifu alu turo aziri drini kali aziri drini towi, sekeli pari alatararuri vilerile:

²⁶’ba dria alu alu agapi fipi ’ba lale ’bo ’diyi ma eselia ’diyi, e’dozu ’ba capi eli be kali iri ’diyisi, ’ba eli kali iri agapi ’bo ’diyi be, yi fe beka alu (efini sekeli alu ma ali, sekeli pari alatararuri vilerile), yi ovu ’ba alifu turo azia drini na, drini turo towi drini kali towi.

²⁷Onzi turo alu dahabuni ’diyi ma azi ovu ’bile pari alatararoria ’diyi edezu, ’bile bongo jo ale alizurini ’diyi be; onzi turo alu ’bile turo alu ’diyi edezu, onzi alu ’bile alu vusi.

²⁸Sekeli alifu alu turo aziri drini kali aziri drini towi ’diyisi, eri ede iwu pati agofero ’diyi dri, azini eri a’bu dri yini ma ruaa dria dria, ede vini kali alazaru ’diyi yi dri indio

²⁹Mola yini fele awa’diforori ca onzi kali aziri, azini sekeli alifu iri drini turo su;

³⁰mola ndesi eri ede ’bile hema ti ecitaniri ma tileni ’diyi, pari edeta edezu molaruri pie, keikei molaru erini pie, afa dria pari edeta edezuria ’diyi pie,

³¹’bile irii ma ageisi ’diyi pie, ’bile kalitilia ’diyi pie, alo dria bereni ’diyi pie, alo irii ma ageia ’diyi be dria.